ជាតិ
×![]()
ដោយ: ផាត ដាណេ
ភ្នំពេញ៖ ក្នុងឆ្នាំ២០១៩នេះ មាននិស្សិតកម្ពុជាសរុបចំនួន ៥៤០នាក់ ទទួលបានអាហារូបករណ៍ទៅសិក្សានៅបរទេស ហើយក្នុងនោះមាននិស្សិតជាស្ត្រីចំនួន ១៧២នាក់។ នេះបើតាមរបារណ៍ពីក្រសួងអប់រំ យុវជន និងកីឡា។
របាយការណ៍ស្ដីពីនិស្សិតអាហារូបករណ៍កម្ពុជាទៅសិក្សានៅបរទេសនៃក្រសួងអប់រំ បានឲ្យដឹងថា ចំនួននិស្សិតដែលសិក្សាថ្នាក់បរិញ្ញាបត្រជាន់ខ្ពស់ មានចំនួន ១៤៦នាក់មានស្រី ៤៩នាក់ ដែលសិក្សានៅបណ្ដាប្រទេសមួយចំនួនដូចជា ចិន ហុងគ្រី ជប៉ុន រុស្ស៊ី ថៃ និងវៀតណាម។
សម្រាប់និស្សិតសិក្សាថ្នាក់បណ្ឌិតមានចំនួន ១៣នាក់ ដែលក្នុងនោះសុទ្ធតែជាបុរស និងកំពុងសិក្សានៅតាមប្រទេសមួយចំនួនដូចជា ចិន ហុងគ្រី ថៃ និងវៀតណាម។ និស្សិតដែលសិក្សាថ្នាក់បរិញ្ញាបត្រនៅប្រទេស ចិន ហុងគ្រី ជប៉ុន ឡាវ រុស្ស៊ី ថៃ និងវៀតណាមមានចំនួន ៣៩០នាក់ មានជាស្ត្រីចំនួន ១២២នាក់។ ចំពោះនិស្សិតដែលសិក្សាថ្នាក់បរិញ្ញាបត្ររងមានចំនួន ២១នាក់ មានជាស្ត្រីម្នាក់ ហើយកំពុងសិក្សា ៣ប្រទេសដូចជាប្រទេសជប៉ុន សឹង្ហបុរី ថៃផងដែរ។
បើតាមរបាយការណ៍ដដែល ចំនួននិស្សិតបរទេសមានចំនួនសរុប ១៥៥នាក់ មានជាស្ត្រីចំនួន៧១នាក់ ដែលសិក្សានៅក្នុងប្រទេសកម្ពុជាផងដែរ ក្នុងនោះនិស្សិតបរទេសដែលជាជនជាតិចិនមានចំនួន ៨៤នាក់ មានជាស្ត្រីចំនួន ២៧នាក់ ហើយកំពុងសិក្សាថ្នាក់បណ្ដុះបណ្ដាល, ថ្នាក់បរិញ្ញាបត្រ, បរិញ្ញាបត្រជាន់ខ្ពស់ និងថ្នាក់បណ្ឌិតនៅសកលវិទ្យាល័យរាជបណ្ឌិតសភា និងភូមិន្ទភ្នំពេញ។
និស្សិតដែលមកពីប្រទេសឡាវមានចំនួន ៥៤នាក់ មានស្រី ២៩នាក់ កំពុងសិក្សាថ្នាក់បរិញ្ញាបត្រ នៅសកលវិទ្យាល័យភូមិន្ទភ្នំពេញ, ភូមិន្ទនីតីសាស្ត្រ និងវិទ្យាសាស្ត្រ និងភូមិន្ទវិចិត្រសិល្បៈ។ ចំពោះនិស្សិតដែលមកពីប្រទេសចិនមានចំនួនសរុបគឺ ១៥នាក់ ជាទាំងអស់ កំពុងសិក្សាថ្នាក់បរិញ្ញាបត្រ នៅសាកលវិទ្យាល័យ ភូមិន្ទភ្នំពេញផងដែរ។
បន្ថែមទៀតនោះ ក៏មាននិស្សិតអាហារូបករណ៍ជាស្ត្រីស្នាក់នៅមជ្ឈមណ្ឌលអន្តេវាសិកមានសសរុបចំនួន ៦៤២នាក់ ក្នុងនោះនិស្សិតទាំងអស់ត្រូវបានបែងចែកជា ៥អាគារសម្រាប់និស្សិតស្នាក់នៅ ដែលអាគារ A, B, C, F សម្រាប់និស្សិតជាស្ត្រី និងអាគារ E សម្រាប់និស្សិតជាបុរសផងដែរ៕
Tag:
អប់រំ
អាហារូបករណ៍
© រក្សាសិទ្ធិដោយ thmeythmey.com
