កីឡាអន្តរជាតិ
អន្តរជាតិ
ជប៉ុនសង់ពហុកីឡដ្ឋានតូក្យូសម្រាប់កីឡាអូឡាំពិក ដោយគិតគូរពីបរិស្ថាន និងកម្តៅ
× ពហុកីឡដ្ឋានជាតិតូក្យូបានសម្ពោធជាផ្លូវការ ជាមួយការសារទរចំពោះការបញ្ចប់គម្រោងសាងសង់ទាន់ពេលវេលាសម្រាប់ប្រើក្នុងព្រឹត្តិការណ៍អូឡាំពិកឆ្នាំ ២០២០។ ស្ថាបត្យករលោក Kengo Kuma ដែលជាអ្នកឌីហ្សាញរូបរាងកីឡដ្ឋានដ៏អស្ចារ្យនេះឡើង ក៏ទទួលបានការសរសើរផងដែរ ខណៈលោកបានភ្ជាប់ធម្មជាតិច្រើនក្នុងការសាងសង់នេះ។
នាយករដ្ឋមន្ត្រីជប៉ុន ស៊ីនហ្សូ អាបេ ចូលរួមសម្ពោធពហុកីឡដ្ឋានជាតិតូក្យូជាផ្លូវការ ដោយលោកបានសារទរចំពោះការបញ្ចប់គម្រោងសាសង់សម្រាប់ព្រឹត្តិការណ៍អូឡាំពិកឆ្នាំ ២០២០ ទាន់ពេលវេលា។ អាបេ ក៏បានសរសើរដល់ស្ថាបត្យករ លោក Kengo Kuma ដែលបានគិតគូពីបរិស្ថាន និងធម្មជាតិសម្រាប់កីឡដ្ឋានមួយនេះ។
ពហុកីឡដ្ឋានអូឡាំពិកតូក្យូ ដែលនឹងប្រើប្រាស់សម្រាប់បើក និងបិទព្រឹត្តិការណ៍កីឡាអូឡាំពិកក្រុងតូក្យូ ឆ្នាំ២០២០ ខាងមុខ បានចំណាយថវិការសាងសង់អស់ ១៥៦,៩ពាន់លានយ៉េន (១,៤៤ពាន់លានដុល្លារអាមេរិក)។ កីឡដ្ឋាន ដែលអាចផ្ទុកទស្សនិកជនបានរហូតដល់ទៅចំនួន៦៨០០០នាក់នេះ ក៏នឹងត្រូវរៀបចំសម្រាប់ការប្រកួតវគ្គផ្តាច់ព្រ័ត្រវិញ្ញាកីឡាបាល់ទាត់ផងដែរ។
ពហុកីឡដ្ឋានអូឡាំពិកតូក្យូ ទទួលបានការចាប់អារម្មណ៍ខ្លាំង ដ្បិតអ្នកឌីហ្សាញបានគិតគូទៅលើបម្រែបម្រួលអាកាសធាតុសម្រាប់ការសាងសង់នេះ។ លោកស្ថាបត្យករ Kengo Kuma ដែលប្រើប្រាស់វត្ថុធាតុដើមធម្មជាតិភាគច្រើនលើសំណង់មួយនេះ និយាយថាលោកបានងាកទៅរកស្ថាបត្យកម្មបែបប្រពៃណីជប៉ុន និងបរិស្ថានសម្រាប់ការបំផុសគំនិតឲ្យក្មេងជំនាន់ក្រោយដែលតែងតែប្រើដែក និងថ្ម។
ការរចនាកីឡដ្ឋានរូបរាងពងក្រពើរបស់លោក Kuma គឺមានកៅអីអង្គុយចំនួន៣ជាន់ នៅក្រោមដំបូលគ្របធ្វើពីដែកថែប និងឈើផង។ លោកបានប្រើឈើជាង៧០០០០គូប ដែលយកមកពីតំបន់នីមួយៗ ក្នុងប្រទេសជប៉ុន។ ស្ថាបត្យករជនជាតិជប៉ុន វ័យ៦៥ឆ្នាំ រូបនេះអះអាងថាការរចនាពហុកីឡាដ្ឋានរបស់លោកគឺភាគច្រើនយកគំរូតាមប្រាសាទ Edo-period របស់តូក្យូ។
នៅក្នុងបទសម្ភាសជាមួយទូរទស្សន៍ CNN លោក Kuma ប្រាប់ថា៖« កីឡាអូឡាំពិក គឺជាព្រឹត្តិការណ៍និមិត្តរូបនៅយុគសម័យនេះ ដូច្នេះអូឡាំពិកឆ្នាំ ២០២០ យើងចង់បង្កើតអ្វីមួយដែលទាក់ទាញគំនិតជាចំបងជុំវិញបញ្ហាបរិស្ថានលើផែនដីនៅពេលនេះ។ ដូច្នេះយើងគិតថាគ្រឿងសម្ភារល្អបំផុតសម្រាប់យុគសម័យនេះគឺឈើ»។ ក្រៅពីឈើ លោក Kuma បានធ្វើកន្លែងដាំផ្កា និងដើមឈើរជាច្រើនដើម្បីទប់កម្តៅផងដែរ។
លោកបន្ថែមថា នៅទូទាំងពិភពលោកស្ថាបត្យកម្មនៅសតវត្សរ៍ទី២០ គេនិយមប្រើប្រាស់ការចាក់បេតុង និងដែកដែលពួកគេមានអារម្មណ៍ត្រជាក់និងមានភាពរឹង។ ប៉ុន្តែលោក Kuma គិតថានោះជាប្រភេទស្ថាបត្យកម្មដែលមនុស្សត្រូវការ នាយុគសម័យដ៏ធុញធ្រាន់បំផុត។ នៅសតវត្សរ៍ទី២១ មនុស្សត្រូវការអ្វីដែលជាធម្មជាតិច្រើន។
ព្រឹត្តិការណ៍កីឡាអូឡាំពិករដូវក្តៅ ក្នុងក្រុងតូក្យូ នឹងចាប់ផ្តើមពីថ្ងៃទី២៤ ខែកក្កដា ដល់ថ្ងៃទី៩ ខែសីហា ឆ្នាំ២០២០។ នេះជាលើកទី២ហើយដែលជប៉ុនទទួលបានសិទ្ធិធ្វើម្ចាស់ផ្ទះកីឡាពិភពលោកនេះ បន្ទាប់ពីពួកគេដឹកនាំលើកដំបូងនៅឆ្នាំ១៩៦៤៕
© រក្សាសិទ្ធិដោយ thmeythmey.com