គិតគូរបរិស្ថាន! សូមទម្លាប់ប្រើប្រាស់កំប្លោក, ត្រឡោក, កែវ និងទុយោឫស្សី ជំនួសប្លាស្ទិក!

ជាតិ

វីដេអូ

គិតគូរបរិស្ថាន! សូមទម្លាប់ប្រើប្រាស់កំប្លោក, ត្រឡោក, កែវ និងទុយោឫស្សី ជំនួសប្លាស្ទិក!

29, Dec 2019 , 10:29 am

រូបភាព

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ ដៃយួរសម្រាប់ដាក់កំប៉ុងកាហ្វេធ្វើពីកំប្លោក, ត្រឡោក, កែវទឹកបំពង់ឫស្សី និងទុយោឫស្សី ត្រូវបានបង្កើតឡើង ដើម្បីជំនួសការប្រើប្រាស់ប្លាស្ទិក។ សម្ភារទាំងនេះ ជាផលិតផលក្នុងស្រុក ដែលបានចែកចាយដោយអ្នកស្រី អ៊ុំ សូរិយា ម្ចាស់អាជីវកម្ម Suria Green។ គោលបំណងចម្បងដែលអ្នកស្រី អ៊ុំ សូរិយា ចាប់ផ្ដើមអាជីវកម្មនេះ គឺចង់ចូលរួមថែរក្សាបរិស្ថាន កាត់បន្ថយប្លាស្ទិក និងចង់ជួយសហគមន៍ តាមរយៈផលិតផលទាំងនេះ។

ដើម្បីជ្រាបច្បាស់ សូមអញ្ជើញទស្សនាបទសម្ភាសរវាងកញ្ញា ញឹក ស្រីល័ក្ខ អ្នកសារព័ត៌មាន ThmeyThmey.com ជាមួយអ្នកស្រី អ៊ុំ សូរិយា ម្ចាស់អាជីវកម្ម Suria Green ដូចតទៅ៖

សំរាមនៅកម្ពុជា បានកើនឡើងប្រមាណ ១០ភាគរយ ក្នុងមួយឆ្នាំ ហើយនៅក្នុងឆ្នាំ២០១៩នេះ សំរាមនៅកម្ពុជាមានទំហំ៤លានតោន ដែល២០ភាគរយ គឺជាសំណល់ប្លាស្ទិក។ ដោយមើលឃើញពីចំនួនសំណល់ប្លាស្ទិកនៅកម្ពុជាបែបនេះ ដែលជាកត្តាធ្វើឲ្យខូចបរិស្ថាន អ្នកស្រី អ៊ុំ សូរិយា បានសម្រេចចិត្តបង្កើតអាជីវកម្មជួយដល់បរិស្ថាន។ ផលិតផលដែលអ្នកស្រី សូរិយា ចែកចាយរួមមាន ត្រឡោក, ទុយោឫស្សី, កែវបំពង់ឫស្សី, ដៃយួរធ្វើពីកំប្លោក និងសម្ភារផ្សេងទៀត សុទ្ធសឹងជាសម្ភារកាត់បន្ថយប្លាស្ទិក។

ស្ត្រីវ័យ៣៤ឆ្នាំរូបនេះ ប្រាប់ពីបំណងដែលបង្កើតអាជីវកម្មជួយដល់បរិស្ថានយ៉ាងដូច្នេះ៖ «គោលបំណងដំបូងរបស់ខ្ញុំមាន២ គឺទី១ ខ្ញុំចង់ចូលរួមជាផ្នែកមួយនៃការថែរក្សាបរិស្ថាន និងកាត់បន្ថយប្លាស្ទិក។ ទី២ ខ្ញុំចង់ធ្វើការជាមួយសហគមន៍ ព្រោះចង់ឲ្យផលិតផលដែលសហគមន៍ធ្វើ មានទីផ្សារ»។

អ្នកស្រី អ៊ុំ សូរិយា បានបង្កើតអាជីវកម្មនេះ នៅខែកក្កដា ឆ្នាំ២០១៩។ អតិថិជនគោលដៅរបស់អ្នកស្រី សូរិយា គឺបណ្ដាសណ្ឋាគារ និងភោជនីយដ្ឋាន ដែលប្រើប្រាស់នូវទុយោឫស្សី, ទុយោស្មៅ ឬទុយោម្សៅអង្ករ ក្នុងទិសដៅកាត់បន្ថយប្លាស្ទិក។ ដើម្បីបានផលិតផលរបស់សហគមន៍មកដល់ អ្នកស្រី សូរិយា ត្រូវចុះទៅស្វែងរកផលិតផលខ្មែរ នៅតាមតំបន់នានា ដូចជាខេត្តសៀមរាប, ស្ទឹងត្រែង, តាកែវ និងខេត្តមួយចំនួនទៀត។

អាជីវកម្មជួយដល់បរិស្ថាននេះ មិនបាននាំប្រាក់ចំណេញច្រើនដល់អ្នកស្រី សូរិយា ឡើយ តែដោយសារការស្រឡាញ់នូវបរិស្ថាន ជួយសហគមន៍ និងចង់ឲ្យប្រជាពលរដ្ឋប្រើប្រាស់ច្រើន ទើបធ្វើឲ្យអ្នកស្រីបន្តអាជីវកម្មនេះបន្តទៀត។ «ពេលចាប់ផ្ដើម មិនសូវមានអ្នកគាំទ្រទេ។ ពេលខ្លះទៀត មានអារម្មណ៍ចង់ឈប់ម្ដងៗ ដោយសារផលិតផលបរិស្ថាននេះ ថ្លៃជាងប្លាស្ទិក។ ប៉ុន្តែក្រោយមក មានការគាំទ្រច្រើន កាន់តែសប្បាយចិត្ត និងបន្តធ្វើការជាមួយផលិតផលទាំងអស់នេះ»។ នេះជាការឡើងរបស់អ្នកស្រី អ៊ុំ សូរិយា។

សម្ភារទាំងនេះ អាចប្រើប្រាស់បានយូរ និងមានតម្លៃសមរម្យ។ បើតាមអ្នកស្រី អ៊ុំ សូរិយា សម្ភារទាំងនេះ មិនត្រឹមតែជួយដល់បរិស្ថានទេ ប៉ុន្តែក៏បានចូលរួមលើកស្ទួយជីវភាពប្រជាសហគមន៍ផងដែរ។ ម្ចាស់អាជីវកម្មរូបនេះ ចង់ឲ្យប្រជាពលរដ្ឋងាកមកប្រើប្រាស់សម្ភារកាត់បន្ថយប្លាស្ទិកទាំងនេះ៕