ជាតិ
ព្រះជីវប្រវត្តិសង្ខេបរបស់ សម្ដេចរាជបុត្រីព្រះរៀម នរោត្តម បុប្ផាទេវី រូបពីទំព័រហ្វេសប៊ុក ព្រះករុណា ព្រះបាទសម្ដេចព្រះបរមនាថ នរោត្តម សីហមុនី
× ភ្នំពេញ៖ សម្ដេចរាជបុត្រីព្រះរៀម នរោត្តម បុប្ផាទេវី គឺជានាដកាឯករបាំព្រះរាជទ្រព្យ (របាំបុរាណ)។ ពេញមួយព្រះជន្មរបស់ព្រះអង្គ ទ្រង់បានលះបង់ព្រះបញ្ញា និងព្រះកាយពល ក្នុងការថែរក្សា អភិរក្ស និងអភិវឌ្ឍន៍ សិល្បៈវប្បធម៌ជាតិ។
ខាងក្រោមនេះគឺជាព្រះជីវប្រវត្តិសង្ខេបរបស់ សម្ដេចរាជបុត្រីព្រះរៀម នរោត្តម បុប្ផាទេវី៖
សម្ដេចរាជបុត្រីព្រះរៀម នរោត្តម បុប្ផាទេវី បានប្រសូតនៅថ្ងៃទី៨ខែមករា ឆ្នាំ១៩៤៣ នៅក្រុងភ្នំពេញ។ ព្រះបិតាព្រះនាម នរោត្តម សីហនុ ជាអតីតព្រះមហាវីរក្សត្រកម្ពុជា ព្រះបរមរតនៈកោដ្ឋ។ ព្រះមាតាព្រះនាម ផាត កាញ៉ុល ជាសិល្បការិនី។ ព្រះអង្គមានបុត្រ៥អង្គ បុត្រី៣អង្គនិងបុត្រា២អង្គ។
សម្ដេចព្រះរៀម នរោត្តម បុប្ផាទេវី បានបញ្ចប់ការសិក្សាថ្នាក់អនុវិទ្យាល័យព្រះនរោត្តម ក្នុងឆ្នាំ១៩៥៨។ ព្រះអង្គបានសិក្សាចំណេះដឹងទូទៅ ភាសាខ្មែរ បារាំង និងអង់គ្លេង ហើយជំនាញដែលទ្រង់ចេះចាំស្ទាត់ជាងគេគឺ របាំបុរាណ(របាំព្រះរាជទ្រព្យ) ដោយទ្រង់អាចផលិតនិងដឹកនាំសម្ដែងបាន។
សម្ដេចព្រះរៀម បុប្ផាទេវី ធ្វើជាសាស្ត្រាចារ្យរបាំបុរាណនៅឆ្នាំ ១៩៦០ដល់១៩៧០។ ជាអនុរដ្ឋមន្ត្រីក្រសួងវប្បធម៌ និងវិចិត្រសិល្បៈឆ្នាំ ១៩៩១ដល់១៩៩៣។ ជាទីប្រឹក្សាជាន់ខ្ពស់រាជរដ្ឋាភិបាលទទួលបន្ទុកវប្បធម៌ឆ្នាំ១៩៩៣ដល់១៩៩៨។ ជារដ្ឋមន្ដ្រីក្រសួងវប្បធម៌និងវិចិត្រសិល្បៈឆ្នាំ ១៩៩៨ដល់២០០៤។ ជាប្រធានសមាគមមិត្តភាពកម្ពុជា-ចិន ឆ្នាំ២០០០។ ជាសមាជិកព្រឹទ្ធសភា ឆ្នាំ២០០៤។ និងជាសមាជិកកិត្តិយសនៃសិល្បៈរបាំអន្តរជាតិពិភពលោក(CID)។
ព្រះអង្គបានរៀបចំឯកសាររបាំបុរាណ ជូនអង្គការយូណេស្កូឆ្នាំ២០០២ ហើយបានប្រកាសជាប់ជាសម្បត្តិបេតិកភណ្ឌអរូបីនៃមនុស្សជាតិ នៅថ្ងៃទី០៧ខែវិច្ឆិកាឆ្នាំ២០០៣ ដោយលោក KOICHIRO MATSUURA អគ្គនាយកអង្គការយូណេស្កូ នៅទីក្រុងប៉ារីស។
សម្ដេចព្រះរៀម បានរៀបចំក្រុមសិល្បៈរបាំបុរាណ "របាំព្រះរាជ្យក្រឹត្យ" ទៅសម្ដែងផ្សព្វផ្សាយលើឆាកអន្តរជាតិដូចជា សមាគមអឺរ៉ុប តាំងពីឆ្នាំ១៩៩៤ រហូតដល់ឆ្នាំ២០១១។ សម្រាប់ការផ្ទេរចំណេះដឹង ព្រះអង្គបានបង្ហាត់បង្រៀនរបាំបុរាណ(របាំព្រះរាជទ្រព្យ) ដល់សិស្ស និស្សិត សិល្បករ នៃសកលវិទ្យាល័យភូមិន្ទវិចិត្រសិល្បៈ នៃក្រសួងវប្បធម៌ និងវិចិត្រសិល្បៈ។
សម្ដេចរាជបុត្រី បានទទួលគ្រឿងឥស្សរិយយស មេដាយសុវត្ថារា ថ្នាក់មហាសេរីវឌ្ឍន៍ឆ្នាំ២០០៨។ ហើយព្រះអង្គបានទទួលមេដាយសិល្បៈនិងអក្សរសាស្ត្រ បំពាក់នៅប្រទេសម៉ារុក ដោយឯកឧត្តម FREDERIC MITTERARAND រដ្ឋមន្ត្រីក្រសួងវប្បធម៌បារាំងនៅខែមិថុនាឆ្នាំ២០១០៕
Tag:
បុប្ផាទេវី
ប្រវត្តិ
ព្រះរៀម
ជីវប្រវត្តិ
© រក្សាសិទ្ធិដោយ thmeythmey.com