ជាតិ
RUPP ជ្រើសរើសគ្រូកម្រិតមូលដ្ឋាន៥៦៨នាក់ដើម្បីបណ្តុះបណ្តាលថ្នាក់បរិញ្ញាបត្រ
×![]()
ដោយ: ផាត ដាណេ
ភ្នំពេញ៖ ក្រសួងអប់រំ យុវជន និងកីឡា ក៏ដូចជាសាកលវិទ្យាល័យភូមិន្ទភ្នំពេញ (RUPP) ប្រកាសពីការជ្រើសរើសគ្រូដែលកំពុងបង្រៀននៅតាមវិទ្យាល័យគោលដៅរបស់គម្រោងកែលម្អការអប់រំនៅមធ្យមសិក្សា (SEIP) លើមុខវិជ្ជាមួយចំនួន៦ដូចជា គណិតវិទ្យា ប្រវត្តិវិទ្យា រូបវិទ្យា គីមីវិទ្យា អក្សរសាស្ត្រខ្មែរ និងជីវវិទ្យា។
សម្រាប់លក្ខខណ្ឌក្នុងការជ្រើសរើសនេះដែរគឺ គ្រូបង្រៀនទាំង២ភេទត្រូវមានអាយុយ៉ាងច្រើន ៥២ឆ្នាំ ហើយមានការតាំងស៊ប់ក្នុងក្របខណ្ឌ។ គ្រូបង្រៀនទាំង២ភេទ ត្រូវមានសញ្ញាបត្រកម្រិតមូលដ្ឋាន ហើយត្រូវមានបទពិសោធន៍បង្រៀនច្រើន និងត្រូវតែជាគ្រូដែលកំពុងបង្រៀននៅតាមវិទ្យាល័យគោលដៅកែលម្អការអប់រំ (SEIP)។
សម្រាប់ករណីខ្វះបេក្ខជន (គ្រូ)លើមុខវិជ្ជាទាំង៥ នឹងត្រូវជ្រើសរើសគ្រូក្នុងកម្រិតដូចគ្នានៅតាមវិទ្យាល័យជិតៗសាលាគោលដៅរបស់គម្រោងកែលម្អការអប់រំនៅមធ្យមសិក្សា (SEIP)។
ក្នុងការដាក់ពាក្យបេក្ខជន ទាំង២ភេទ (គ្រូ) ត្រូវភ្ជាប់មកជាមួយនូវលិខិតមួយចំនួនដូចជា ពាក្យសុំចុះឈ្មោះ(២ច្បាប់), សញ្ញាបត្រគ្រូបង្រៀនកម្រិតមូលដ្ឋាន(១ច្បាប់), ជីវប្រវត្តិសង្ខេប(២ច្បាប់), កិច្ចសន្យា(២ច្បាប់), វិញ្ញាបនបត្ររដ្ឋបាលបញ្ជាក់ដោយមន្ទីរអប់រំ(២ច្បាប់) និងរូបថតថ្មី ៣គុណ៤(២សន្លឹក)។ សូមបញ្ជាក់ផងដែរថាបេក្ខជនទាំង២ភេទ(គ្រូ) ត្រូវមានលិខិតបញ្ជាក់ពីសាលារៀនថាខ្លួនពិតជាបង្រៀនឯកទេសទី២ក្នុងពេលបច្ចុប្បន្ន និងបញ្ជាក់ពីសាលារបស់ខ្លួនថាពីជាមានបទពិសោធន៍ក្នុងការបង្រៀនឯកទេសទី២រយៈពេល ៣ឆ្នាំយ៉ាងតិច៕
Tag:
គ្រូបង្រៀន
© រក្សាសិទ្ធិដោយ thmeythmey.com
