ទំពាំងបារាំង៤ហិកតា ផ្តល់ចំណេញរាល់ថ្ងៃ ដល់លោក ស៊ូ ប៊ុន្នី

ជាតិ

ទំពាំងបារាំង៤ហិកតា ផ្តល់ចំណេញរាល់ថ្ងៃ ដល់លោក ស៊ូ ប៊ុន្នី

30, Dec 2019 , 8:59 am

រូបភាព

ប្រពន្ធលោក ស៊ូ ប៊ុន្នី នៅចម្ការទំពាំងបារាំង (រូបពីលោក ស៊ូ ប៊ុន្នី)

ដោយ: ឡាយ សុភាវតី

ភ្នំពេញ៖ រយៈពេល៨ឆ្នាំហើយ ដែលលោក ស៊ូ ប៊ុន្នី ទទួលបានជោគជ័យលើការដាំដំណាំទំពាំងបារាំង។កសិករខេត្តបាត់ដំបងរូបនេះ អាចរកប្រាក់ចំណេញជាង១០០ដុល្លាររៀងរាល់ថ្ងៃ ពីដំណាំទំពាំងបារាំងលើផ្ទៃដី៤ហិកតា ដោយមានទីផ្សារចាំទទួលយក នៅខេត្តបាត់ដំបង សៀមរាប និងរាជធានីភ្នំពេញ។

មុនពេលជោគជ័យលើការដំណាំទំពាំងបារាំងដូចសព្វថ្ងៃនេះ លោក ស៊ូ ប៊ុន្នី ធ្លាប់បរាជ័យម្ដងរួចហើយនៅអំឡុងឆ្នាំ២០០៣ ដោយសារគ្មានបច្ចេកទេសនិងខ្វះខាតថវិកា។ លុះដល់ឆ្នាំ២០១១ កសិករដែលធ្លាប់ដាំក្រូច ស្រកានាគ តាង៉ែន និងបរាជ័យលើដំណាំទំពាំងបារាំងរូបនេះ បានងាកមកដាំទំពាំបារាំងឡើងវិញលើផ្ទែដី១ហិកតា ហើយក៏ទទួលជោគជ័យ។

ស្ថិតនៅភូមិតាគ្រក់ ឃុំត្រែង ស្រុករតនមណ្ឌល ខេត្តបាត់ដំបង លោក ប៊ុន្នី ដែលបានពង្រីកការដាំដុះចំនួន៣ហិកតាបន្ថែមទៀតនៅដើមឆ្នាំ២០១៩នេះ ដោយបានប្រមូលផលជាង៥០ ទៅ១០០គីឡូក្រាមក្នុងមួយថ្ងៃ ក្នុងរយៈពេល២ខែមកនេះ ។ សម្រាប់ទីផ្សារក្នុងស្រុក លោក ប៊ុន្នី អាចលក់ទំពាំងបារាំងនេះបាន១៣០០០រៀលក្នុងមួយគីឡូ ។ ម្ចាស់ចម្ការទំពាំងបារាំងទាំង៤ហិកតានេះ បាននិយាយប្រាប់សារព័ត៌មានថ្មីៗ២៥ថា៖« (យកទៅលក់ហើយ)ទូទាត់ថ្លៃចំណាយផ្សេងៗហើយ នៅសល់ជាង១០០ដុល្លារក្នុងមួយថ្ងៃ»។

សកម្មភាពរៀបចំទំពាំងបារាំង (រូបពីលោក ស៊ូ ប៊ុន្នី)

ពាក់ព័ន្ធនឹងតម្រូវការទីផ្សារ កសិកររូបនេះ មានកិច្ចសន្យាជាមួយផ្សារបៃតងនៅរាជធានីភ្នំពេញ ដែលទទួលទិញបន្លែសិរីរាង្គ ហើយលោកក៏លក់ចែកចាយទៅទីរួមខេត្តបាត់ដំបង និងសៀមរាបផងដែរ។ ប៉ុន្តែកសិកររូបនេះ អះអាងថា ទីផ្សារនៅប្រទេសថៃខ្ពស់ជាងនៅកម្ពុជា។

«ខ្ញុំដឹកចេញទៅថៃបាន៤០០បាត (ប្រមាណជា៥ម៉ឺនរៀល) តែខ្ញុំដឹកទៅយូរម្ដងនោះទេ ដើម្បីចង់ដឹងពីកម្រិតគុណភាព បន្លែសិរីរាង្គរបស់ខ្ញុំ ត្រូវតាមស្ដង់ដានាំចេញទៅក្រៅប្រទេសឬអត់។ យ៉ាងណាក៏ដោយក៏ខ្ញុំនៅតែ ជ្រើសរើសទីផ្សារក្នុងស្រុក ព្រោះខ្ញុំចង់ឲ្យពលរដ្ឋបានស្គាល់និងបរិភោគបន្លែសិរីរាង្គ ហើយខ្ញុំអាចផ្ញើទៅគ្រប់កន្លែងមិនថាភ្នំពេញឬសៀបរាម»។ នេះការលើកឡើងរបស់លោក ស៊ូ ប៊ុន្នី ដែលបានបន្ថែមថា ទីផ្សារទំពាំងបារាំងនេះ នៅធំទូលាយ ដោយសារមិនសូវមានអ្នកដាំ ព្រោះពិបាកថែទាំនិងចំណាយទុនច្រើន។

«ដំណាំនេះ ត្រូវការមើលថែរាល់ថ្ងៃ មិនអាចដាំទុកចោលដូចដំណាំដទៃឡើយ តាំងពីដាំរហូតដល់ប្រមូលផល ហើយពេលប្រមូលផល យើងប្រមូលរាល់ថ្ងៃ ព្រោះទំពាំងដុះរាល់ថ្ងៃ»។ នេះជាការអះអាងរបស់លោក ប៊ុន្នី ។

លោក ប៊ូន្នី (រូបពីលោក ស៊ូ ប៊ុន្នី)

ការដាំណាំមួយប្រភេទនេះ ចំណាយទុនច្រើនតែលើដំបូងនោះទេ លុះដល់ប្រមូលផល គ្រាន់តែថែទាំដាក់ទឹក ដាក់ជីធម្មជាតិ ជ្រោយដីជាដើម។ ការដាំទំពាំងបារាំងលើផ្ទៃដី១ហិកតា ចំណាយទាំងពូជ រៀបចំថ្នាល ប្រព័ន្ធទឹកជិត១ម៉ឺនដុល្លារ ហើយរយៈពេល៨ខែ ទើបទទួលផល។ ទំពាំងបារាំងនេះ ត្រូវការថែទាំ ពិនិត្យរាល់ថ្ងៃ ព្រោះអាចប្រឈមនឹងជំងឺគ្រប់ពេល ជាពិសេសខែប្រាំងជួបបញ្ហារលួយ។ កសិកររូបនេះ ថារយៈពេលជាង៩ឆ្នាំនេះ លោកមិនដែលខាត ដោយសារតម្លៃធ្លាក់ចុះ ឬគ្មានទីផ្សាឡើយ ដ្បិតពេលខ្លះជួបបញ្ហាដង្កូវស៊ី និងក្ដៅរលូយដើមទំពាំងបារាំងក្តី។ ប៉ុន្តែវាមិនធ្ងន់ធ្ងរឡើយ៕