មិនបាច់ចំណាកស្រុក លោក ឡេក គឹមហួ រកចំណូលមួយខែជាង១ពាន់ដុល្លារ ពីរបរចិញ្ចឹមគោ

ជាតិ

បទយកការណ៍ / បទសម្ភាសន៍

មិនបាច់ចំណាកស្រុក លោក ឡេក គឹមហួ រកចំណូលមួយខែជាង១ពាន់ដុល្លារ ពីរបរចិញ្ចឹមគោ

30, Dec 2019 , 9:19 am

រូបភាព

ដោយ:

ភ្នំពេញ៖ លោក ឡេក គឹមហួ អាចរកចំណូលបានប្រមាណ១,៥០០ដុល្លារ ពីរបរចិញ្ចឹមគោយកសាច់ស្ថិតនៅភូមិតាម៉ី ឃុំសូយោង ស្រុកតាំងគោក ខេត្តកំពង់ធំ។ ផ្តើមចេញពីការចិញ្ចឹមគោពីរក្បាល នៅក្នុងឆ្នាំ២០១៦ តែបច្ចុប្បន្នកសិដ្ឋានរបស់ លោក ឡេក គឹមហួ មានគោក្នុងក្រោលជាង៧០ក្បាល ហើយលក់ចេញស្ទើររាល់ខែ។ លោកអះអាងថា របរនេះ ដ្បិតមានភាពនឿយ តែវាទទួលបានចំណូលច្រើនគួរសម ដោយមិនចាំបាច់ចំណាកស្រុកទៅឆ្ងាយនោះទេ។

ជាបន្តសូមអញ្ជើញស្តាប់បទយកការណ៍ ដែលរៀបចំដោយ លោក រ៉ឹម ភារី ដូចតទៅ៖

មានដីមួយហិកតាកន្លះ លោក ឡេក គឹមហួ បានប្រែក្លាយដីនេះ ឲ្យក្លាយជាកសិដ្ឋានចិញ្ចឹមគោ ដែលអាចរកចំណូលបានក្រាស់ក្រែលដែរ នៅក្នុងមួយខែៗ។ ចាប់ផ្តើមពីការចិញ្ចឹមគោ២ក្បាលជាលើកដំបូងក្នុងឆ្នាំ២០១៦ កសិករវ័យ៤៧ឆ្នាំរូបនេះ បានបង្កើនចំនួនគោក្នុងកសិដ្ឋានរបស់រហូតដល់ជាង៧០ក្បាលមកទល់បច្ចុប្បន្ន និងបានលក់ចេញជាបន្តបន្ទាប់។ ក្នុងមួយខែ លោកលក់គោប្រមាណពី១០ ទៅ១៥ក្បាល ដោយទទួលបានចំណូលជាធម្យម ប្រមាណ១,៥០០ដុល្លារសហរដ្ឋអាមេរិក។ បើតាមកសិករ ឡេក គឹមហួ សត្វគោទាំងនេះ ត្រូវបានលក់ឲ្យកន្លែងសត្តឃាត នៅក្នុងខេត្តកំពង់ធំ ភ្នំពេញ និងនាំចេញទៅប្រទេសវៀតណាម។

មានសម្បុរស្រគាំ និងសក់ស្កូវតិចៗ លោក ឡេក គឹមហួ បានពន្យល់ពីដំណើរដើមទងមុននឹងលោកទទួលជោគជ័យមកដល់បច្ចុប្បន្ន យ៉ាងដូច្នេះថា៖ «កាលមុន ចិញ្ចឹមជ្រូកទេ។ ក្រោយមក ខ្ញុំទទួលបានការណែពីការិយាល័យស្រុក ហើយក៏ចេះដាំស្មៅ។ បន្ទាប់មក ក៏ទិញគោមកសាក២ក្បាល។ ដំបូងគោមេកូន មិនមែនគោសាច់ទេ។ ទាល់តែឆ្នាំ២០១៧ ទើបចិញ្ចឹមគោបំប៉ន ព្រោះគោមេ កូនអត់សូវចំណេញទេ តែគោបំប៉ន ចំណេញជាង»។

ការទិញគោមកបំប៉ន និងលក់ចេញវិញ គឺត្រូវការថែទាំតែ៣ខែ នឹងបានលក់ចេញស្រួល ប៉ុន្តែ បើចិញ្ចឹមតាំងពីក្នុងពោះមក វាត្រូវពេលយូរ។ យ៉ាងណាកសិដ្ឋានរបស់លោក មានទាំងទិញគោមកបំប៉ន និងបង្កាត់ពូជគោផងដែរ។

តាមពិតទៅ លោក ឡេក គឹមហួ បានទទួលបច្ចេកទេសចិញ្ចឹមគោ ពូជស្មៅ ពូជគោ ពីការិយាល័យកសិកម្មស្រុកតាំងគោក។ បើតាមកសិកររូបនេះ សត្វគោមានភាពងាយស្រួលចិញ្ចឹម ជាងសត្វផ្សេងទៀត ព្រោះវាមិនសូវឈឺដូចជា ជ្រូក ឬមាន់។

កំពុងត្រៀមឲ្យចំណីគោ លោក ឡេក គឹមហួ បានឆ្លៀតប្រាប់សារព័ត៌មានថ្មីៗពីបច្ចេកទេសចិញ្ចឹមគោយ៉ាងដូច្នេះថា៖ «ដើម្បីចិញ្ចឹមគោបានល្អ ពេលទិញមកត្រូវទុកវាក្នុងរោងផ្ស៊ាំ១៥ថ្ងៃ។ បន្ទាប់មកចាក់ថ្នាំវា ដូចជា វីតាមីបេខំប្លិច។ បានមួយអាទិត្យទៀត ចាក់អាយវ៉ាមិច និងចាក់ថ្នាំវាក់ស៊ាំងផ្សេងៗ។ ចំណែកស្មៅវិញ គឺខ្ញុំដាំស្មៅប្រភេទ King Grass ព្រោះវាជាស្មៅងាយស្រួលលូតលាស់ និងស្រួលកាត់។ ក្រៅពីស្មៅ និងចំបើងផ្អាប់ យើងត្រូវផ្សំចំណី ដែលមាន កាកដំឡូង កន្ទក់ និងកាកស្រា»។

អ្នកស្រី គា សុខភា ដែលជាភរិយាលោក ឡេក គឹមហួ បានបន្ថែមថាការចិញ្ចឹមគោ មិនពិបាកនោះទេ គ្រាន់តែចេះដាំស្មៅ និងលាយចំណីឲ្យវាស៊ីជាការស្រេច។ ចំណែកការដាំស្មៅទៀតសោត ក៏មិនលំបាកដែរ គឺគ្រាន់រកដីទួល និងត្រូវជីកអណ្តូងទឹកស្រោចវាជាប្រចាំប៉ុណ្ណោះ។ ស្ត្រីសម្បុរសណ្តែកបាយវ័យ៤៦ឆ្នាំ រូបនេះ បន្តរៀបរាប់ដូច្នេះ៖«ស្មៅដាំតែម្តង យើងកាត់បានរហូត។ ហើយយើងដាំស្មៅបានច្រើន យើងមិនសូវប្រើចំណីទេ។ ខ្ញុំជីកអណ្តូង ហើយខ្ញុំមានឡជីវឧស្ម័ន ដើម្បីដាក់អាមន៍គោ ហើយយើងបូមជីពីឡធ្វើជាជីស្រោចស្មៅវិញ»។

បើតាមអ្នកស្រី គា សុខភា របរចិញ្ចឹមគោ ដ្បិតជារបរប្រើកម្លាំងបាយ តែវាបានផ្តល់ចំណូលច្រើន និងបានកែប្រែជីវភាពគ្រួសាររបស់អ្នកស្រីឲ្យធូរធារជាងមុន។

លោក នៅ ភាវូ ប្រធានផ្នែកផលិតកម្ម និងបសុព្យាបាលស្រុកតាំងគោក បានអះអាងថា នៅស្រុកតាំងគោក មានតែកសិដ្ឋានរបស់លោក ឡេក គឹមហួ ដែលទទួលបានជោគជ័យ បន្ទាប់ពីការិយាល័យស្រុកបានផ្តល់នូវពូជស្មៅ និងបច្ចេកទេសដល់គាត់។

លោកបញ្ជាក់យ៉ាងដូច្នេះថា៖ «ស្មៅដែលផ្តល់ឲ្យគាត់ មានពូជ King Grass ពូជរុស្សី ពូជម៉ូលឡាតូ ពូជទីមួង...ពូជទាំងនេះ ភាគច្រើនយើងយកមកពីអូស្ត្រាលី។ ហើយគោពូជ យើងបង្កាត់បែបសប្បនិម្មិត។ យើងយកពូជល្អៗពីខាងថៃមក មានពូជស្រាម៉ាន់ស ស្រាម៉ាន់ក្រហម និងពូជឥណ្ឌូប្រេស៊ីល។ ពូជហ្នឹង វាសុទ្ធល្អ វាធំធាត់លឿន មានរាងស្អាត និងផ្តល់សាច់ច្រើន»។

បើតាមអ្នកជំនាញរូបនេះ ការចិញ្ចឹមគោ ពិតជាសក្តានុពលណាស់ សម្រាប់ជួយលើកស្ទួយជីវភាពពលរដ្ឋ ដោយពលរដ្ឋ គ្រាន់តែតាមដានលើការសិក្សាបច្ចេកទេស ពីក្រសួងកសិកម្ម រុក្ខាប្រមាញ់ និងនេសាទ ព្រោះបច្ចុប្បន្ន ក្រសួងបានផលិតវីដេអូបង្រៀនបច្ចេកទេសចិញ្ចឹមសត្វ ដើម្បីងាយស្រួលដល់ពលរដ្ឋ ក្នុងសិក្សារៀនសូត្រ។ ដោយឡែក លោក ឡេក គឹមហួ វិញ ក៏ស្ម័គ្រចិត្តបង្រៀនពលរដ្ឋដោយមិនគិតថ្លៃដែរ ដើម្បីរួមចំណែកពង្រីកវិស័យចិញ្ចឹមគោនេះ ក្នុងន័យលើកកម្ពស់ជីវភាពពលរដ្ឋកម្ពុជា ឲ្យបានកាន់តែប្រសើរឡើង៕