ជាតិ
រថយន្ត
នយោបាយជាតិ
២០១៩ ឧត្តមក្រុមប្រឹក្សាពិគ្រោះយោបល់ ចាយជាង៨៦ម៉ឺនដុល្លារ, លុយសល់ទុកទិញឡាន Pickup លោក ឈឹម ផលវរុណ ប្រធានលេខាធិការដ្ឋាននៃឧត្តមក្រុមប្រឹក្សាពិគ្រោះនិងផ្តល់យោបល់ (រូបពី CPP)
×
កញ្ចប់ថវិកាសម្រាប់ចាយនៅឆ្នាំ២០១៩ ដែលរដ្ឋាភិបាល ផ្តល់ឲ្យឧត្តមក្រុមប្រឹក្សាពិគ្រោះនិងផ្តល់យោបល់ មានជាង១,៣លានដុល្លារ។ តែរបាយការណ៍ ដែលធ្វើឡើងនៅបំណាច់ឆ្នាំ២០១៩នេះ បង្ហាញថា ឧត្តមក្រុមប្រឹក្សាពិគ្រោះនិងផ្តល់យោបល់ ចាយមិនអស់ឡើយ ដោយនៅសល់ជាង៤៥ម៉ឺនដុល្លារ។
លោក ឈឹម ផលវរុណ ប្រធានលេខាធិការដ្ឋាននៃឧត្តមក្រុមប្រឹក្សាពិគ្រោះនិងផ្តល់យោបល់ យល់ថា ក្នុង១ឆ្នាំ ឧត្តមក្រុមប្រឹក្សាពិគ្រោះនិងផ្តល់យោបល់ ប្រើប្រាស់ថវិកាអស់ជាង៨៦ម៉ឺនដុល្លារ គឺមិនច្រើននោះទេ បើធៀបនឹងថវិកា ដែលរដ្ឋសភាចំណាយសម្រាប់អតីតគណបក្សប្រឆាំង។ ក្នុងកិច្ចសម្ភាសជាមួយសារព័ត៌មានថ្មីៗ តាមទូរស័ព្ទនៅថ្ងៃទី៣០ ខែធ្នូ ឆ្នាំ២០១៩ លោក ឈឹម ផលវរុណ បញ្ជាក់បែបនេះថា៖«កាលពីដើមនីតិកាលទី៥ គ្រាន់តែចំណាយសម្រាប់អតីតគណបក្សប្រឆាំងទាំង៥៥អាសនៈ ក្នុង១ឆ្នាំហ្នឹង គឺអស់រាប់លានដុល្លារ ហើយនេះ យើងអស់មិនដល់១លានដុល្លារផងហ្នឹង»។
ម្យ៉ាងទៀត លោក ឈឹម ផលវរុណ លើកឡើងថា ស្ថាប័នឧត្តមក្រុមប្រឹក្សាពិគ្រោះនិងយោបល់ មានចំនួនមនុស្សច្រើនជាងតំណាងរាស្ត្រនៃអតីតគណបក្សប្រឆាំងទៅទៀត។ គណបក្សទាំង១៦ មានប្រតិភូរបស់ខ្លួន២នាក់ ធ្វើជាសមាជិកនៃឧត្តមក្រុមប្រឹក្សាពិគ្រោះនិងផ្តល់យោបល់ ហើយគណបក្សទាំងនោះ ក៏មានមនុស្សរបស់ខ្លួនម្នាក់ថែមទៀត ធ្វើជាមន្ត្រីលេខា ដូច្នេះមនុស្សសរុបពីគណបក្សទាំង១៦ មាន៤៨នាក់។ ចំណែក មន្ត្រីនៅលេខាធិការដ្ឋាននៃឧត្តមក្រុមប្រឹក្សាពិគ្រោះនិងផ្តល់យោបល់ មាន១៦នាក់ទៀត ដូច្នេះបូករួមទាំងអស់ ស្ថាប័នឧត្តមក្រុមប្រឹក្សាពិគ្រោះនិងផ្តល់យោបល់ មានមនុស្សដល់ទៅ៦៤នាក់។
បើតាមលោក ឈឹម ផលវរុណ ប្រាក់ខែរបស់សមាជិកឧត្តមក្រុមប្រឹក្សាពិគ្រោះនិងផ្តល់យោបល់ គឺប្រមាណ៦រយដុល្លារប៉ុណ្ណោះ ខណៈតំណាងរាស្ត្រទទួលបានប្រមាណពី២ទៅ៣ពាន់ដុល្លារ។ ប្រធានលេខាធិការរូបនេះ សង្កត់ធ្ងន់ដូច្នេះថា៖«...បេសកកម្មយើងចុះមមាញឹក គ្មានសៅរ៍ គ្មានអាទិត្យ គ្មានថ្ងៃបុណ្យទាន យើងសរុបការងារទាំងអស់ ទាំងប្រាក់ខែទាំងអី យើងអស់ជាង៨សែនដុល្លារហ្នឹង។...យើងចាយប៉ុណ្ណឹង ធៀបទៅនឹងតំណាងរាស្ត្រទាំង៥៥នាក់របស់អតីតគណបក្សប្រឆាំង អត់បាន១ភាគ៥ផងហ្នឹង»។
ចំណែកថវិកាដែលនៅសល់ជាង៤៥ម៉ឺនដុល្លារ ឧត្តមក្រុមប្រឹក្សាពិគ្រោះនិងផ្តល់យោបល់ គ្រោងដាក់សំណើទៅសម្តេចនាយករដ្ឋមន្ត្រី នៅក្នុងខែមករា ឆ្នាំ២០២០ ដើម្បីសុំយកទៅទិញរថយន្ត។ នេះបើតាមលោក ឈឹម ផលវរុណដដែល។
លោក ឈឹម ផលវរុណ មិនអាចនិយាយឲ្យច្បាស់ឡើយថា ថវិកាជាង៤៥ម៉ឺនដុល្លារនោះ នឹងត្រូវយកទៅទិញរថយន្តទាំងអស់ឬក៏ទុកខ្លះ។ លោក ក៏មិនទាន់ដឹងដែរថា នឹងត្រូវទិញប៉ុន្មានគ្រឿង។ លោក ថា បញ្ហានេះ ត្រូវរង់ចាំមើលការសម្រេចរបស់សម្តេចនាយករដ្ឋមន្ត្រីសិន។
យ៉ាងណា លោក អាចបង្ហើបបានថា រថយន្តដែលឧត្តមក្រុមប្រឹក្សាពិគ្រោះនិងផ្តល់យោបល់គ្រោងនឹងទិញ គឺរថយន្តប្រភេទ Pickup តែលោក មិនទាន់ដឹងថា ត្រូវទិញម៉ាកឬស៊េរីឆ្នាំណាឡើយ ហើយលោក ក៏មិនហ៊ានសន្និដ្ឋានដែរថា ១គ្រឿង មានតម្លៃប៉ុន្មាន។ លោក ថ្លែងបែបនេះថា៖«យើងទិញយើងមើលតម្លៃ បើវា ខុសគ្នាតិចតួច យើងទិញស៊េរីចេញក្រោយ។ យើងទិញ យើងផ្អែកលើគុណភាព។ គុណភាព វា រាប់ទាំងឆ្នាំនៃការចេញ ទាំងថ្មី មិនអាចយកចាស់ទេ បើនិយាយពីគុណភាពនោះ»។
លោក ឈឹម ផលវរុណ បញ្ជាក់ជាថ្មីថា រថយន្តនោះ គឺជាទ្រព្យសម្បត្តិរដ្ឋ ដែលត្រូវគ្រប់គ្រងដោយលេខាធិការដ្ឋាននៃឧត្តមប្រឹក្សាពិគ្រោះនិងផ្តល់យោបល់ ហើយទុកប្រើរួមគ្នា មិនមែនទិញយកទៅចែកឲ្យសមាជិកនៃឧត្តមក្រុមប្រឹក្សាពិគ្រោះនិងផ្តល់យោបល់ណាម្នាក់ឡើយ។
ក្នុងពិធីបិទសន្និបាតបូកសរុបការងាររយៈពេល១៦ខែ របស់ឧត្តមក្រុមប្រឹក្សាពិគ្រោះនិងផ្តល់យោបល់ កាលពីរសៀលថ្ងៃទី២៧ ខែធ្នូ ឆ្នាំ២០១៩ សម្តេចនាយករដ្ឋមន្ត្រី ហ៊ុន សែន បានប្រកាសគាំទ្រនិងវាយតម្លៃខ្ពស់ចំពោះការងាររបស់ឧត្តមក្រុមប្រឹក្សាពិគ្រោះនិងផ្តល់យោបល់កន្លងមក។ សម្តេចនាយករដ្ឋមន្ត្រី បង្ហាញបំណងថា នៅអាណត្តិក្រោយ (ឆ្នាំ២០២៣) រដ្ឋាភិបាល អាចនឹងបន្តឲ្យមានស្ថាប័នឧត្តមក្រុមប្រឹក្សាពិគ្រោះនិងផ្តល់យោបល់បន្តទៀត៕
Tag:
ឧត្តមក្រុមប្រឹក្សាពិគ្រោះយោបល់
ថវិកា២០១៩
ទិញរថយន្ត
© រក្សាសិទ្ធិដោយ thmeythmey.com