បារាំង ឱ្យ​កម្ចី​ជាង​១០០​លាន​ដុ​លា្ល​រ​ដល់​កម្ពុជា សម្រាប់​គម្រោង​ប្រព្រឹត្តិកម្ម​ទឹកស្អាត និង​អប់រំ​ជំនាញ​
ជាតិ
សេដ្ឋកិច្ច
បារាំង ឱ្យ​កម្ចី​ជាង​១០០​លាន​ដុ​លា្ល​រ​ដល់​កម្ពុជា សម្រាប់​គម្រោង​ប្រព្រឹត្តិកម្ម​ទឹកស្អាត និង​អប់រំ​ជំនាញ​
31, Dec 2019 , 8:19 pm        
រូបភាព
​លោក អូន ព័ន្ធមុនីរ័ត្ន រដ្ឋមន្ត្រីក្រសួង​សេដ្ឋកិច្ច និង​ហិ​រញ្ញា​វត្ថុ  ចាប់ដៃ​ជាមួយ​នាយក​ទីភ្នាក់ងារ​បារាំង​សម្រាប់​អភិវឌ្ឍន៍​(AFD) នៅ​ទីស្តីការក្រសួង កាលពី​ថ្ងៃទី​២៤​ធ្នូ ឆ្នាំ​២០១៩​។ រូបថត​៖ ក្រសួង​សេដ្ឋកិច្ច​៕
​លោក អូន ព័ន្ធមុនីរ័ត្ន រដ្ឋមន្ត្រីក្រសួង​សេដ្ឋកិច្ច និង​ហិ​រញ្ញា​វត្ថុ ចាប់ដៃ​ជាមួយ​នាយក​ទីភ្នាក់ងារ​បារាំង​សម្រាប់​អភិវឌ្ឍន៍​(AFD) នៅ​ទីស្តីការក្រសួង កាលពី​ថ្ងៃទី​២៤​ធ្នូ ឆ្នាំ​២០១៩​។ រូបថត​៖ ក្រសួង​សេដ្ឋកិច្ច​៕
​ភ្នំពេញ​៖ រដ្ឋាភិបាល​បារាំង បានផ្តល់​ឥណទាន​សម្បទា​ន​សរុប​១១៨​លាន​អឺរ៉ូ​(​ប្រមាណ​១២១​លាន​ដុល្លារ​) ដល់​កម្ពុជា សម្រាប់​អនុវត្ត​គម្រោង​ពីរ ទាក់ទង​នឹង​ទឹកស្អាត និង​ការអប់រំ​ជំនាញ​។  ទំហំ​ទឹកប្រាក់​នេះ ត្រូវបាន​ចុះហត្ថលេខា​លើ​កិច្ចព្រមព្រៀង​ដោយ​លោក អូន ព័ន្ធមុនីរ័ត្ន រដ្ឋមន្ត្រីក្រសួង​សេដ្ឋកិច្ច និង​ហិ​រញ្ញា​វត្ថុ ជាមួយ​អ្នកស្រី  Ophélie BOURHIS នាយក​ទីភ្នាក់ងារ​បារាំង​សម្រាប់​អភិវឌ្ឍន៍​(AFD)​។

 
​បើតាម​សេចក្តីជូនដំណឹង​របស់​ក្រសួង​សេដ្ឋកិច្ច កាលពី​ថ្ងៃទី​២៤​ធ្នូ ឆ្នាំ​២០១៩ គម្រោង​សង់រោង​ចក្រ​ប្រព្រឹត្តិកម្ម​ទឹកស្អាត​នៅ​បាក់​ខែង ដំណាក់កាល​ទី​ពីរ​នេះ នឹងត្រូវ​អនុវត្ត​បន្ត​ពី​គម្រោង​ជំហាន​ទីមួយ ក្នុងការ​សាងសង់​ស្ថានីយ៍​បូមទឹក ដែលមាន​សមត្ថភាព​ផលិត​ទឹកស្អាត​បាន​ជិត​២០​ម៉ឺន​គូប ក្នុង​មួយថ្ងៃ​។ លើសពីនេះ ក៏មាន​បំពាក់​បំពង់​មេ​នាំ​ទឹកស្អាត​, បំពង់​ចែកចាយ និង​សម្ភារ​ត​ភ្ជាប់​បំពង​ផងដែរ​។ ការងារ​សាងសង់​នេះ ត្រូវ​ត្រួតពិនិត្យ និង​គាំទ្រ​ដល់​ការពង្រឹង​សមត្ថភាព​ម​ន្ត្រី​របស់​រដ្ឋាករទឹក​ស្វយ័ត​ក្រុងភ្នំពេញ​លើ​ការងារ​លទ្ធកម្ម និង​បណ្តាញ​ចែកចាយ​ទឹកស្អាត​។ គម្រោង​សង់រោង​ចក្រ​ប្រព្រឹត្តិកម្ម​ទឹកស្អាត​នៅ​បាក់​ខែង ដំណាក់កាល​ទី​ពីរ មាន​ទឹកប្រាក់​១០១,៤​លាន​ដុល្លារ​។ នេះ​បើតាម​ក្រសួង​សេដ្ឋកិច្ច​។​
 
​ដោយឡែក ឥណទាន​ជិត​២០​លាន​ដុ​លា្ល​រ​ទៀត បារាំង​បានផ្តល់​ទៅលើ​គម្រោង​អភិវឌ្ឍន៍​ជំនាញ​សម្រាប់​ការប្រកួតប្រជែង​នៅ​កម្ពុជា​។ គម្រោង​នេះ គឺ​ផ្តោត​សំខាន់​ទៅលើ​ការកែលម្អ​និង​លើកកម្ពស់​គុណភាព​នៃ​ការអប់រំ​បណ្តុះ​បណ្តា​បច្ចេកទេស និង​វិជ្ជាជីវៈ​កម្រិត​ក្រោយ​មធ្យមសិក្សា​។ ក្រៅពីនេះ ថែមទាំង​លើកកម្ពស់​ដល់​ការសិក្សា​ផង ធ្វើការ​ងារ​ផង តាម​បណ្តា​ឧស្សាហកម្ម​នានា  ព្រមទាំង​ពង្រឹង​យន្តការ​គ្រប់គ្រង​ហិរញ្ញវត្ថុ​របស់​គ្រឹះស្ថាន​អប់រំ​បណ្តុះបណ្តាល​បច្ចេកទេស និង​វិជ្ជាជីវៈ​(TVET)​ឱ្យ​ប្រកបដោយ​នវានុវត្តន៍ ផងដែរ​។ 
 
​ចាប់ពី​ឆ្នាំ​១៩៩៣ ដល់ ឆ្នាំ​២០១៩ រដ្ឋាភិបាល​ប្រទេស​បារាំង តាមរយៈ​ទីភ្នាក់ងារ​បារាំង​សម្រាប់​អភិវឌ្ឍន៍ បានផ្តល់​កម្ចី​ដល់​កម្ពុជា ចំនួន​៨០២​លាន​អឺរ៉ូ​(​ជិត​៨៩៩​លាន​ដុល្លារ​)​។ ក្នុងនោះ​មាន កម្ចី​ឥត​សំណង​ចំនួន​២០១​លាន​អឺរ៉ូ​(​ប្រមាណ​២២៥​លាន​ដុ​លា្ល​រ​) ឥណទាន​សម្បទាន​(Sovereign Loan) ចំនួន​៤៣៤​លាន​អឺរ៉ូ (​ប្រមាណ​៤៨៦​លាន​ដុ​លា្ល​រ​) និង​កម្ចី​គ្មាន​ការប្រាក់​(Non Sovereign Loan )​ចំនួន​១៦៧​លាន​អឺរ៉ូ​(​ប្រមាណ​១៨០​លាន​ដុល្លារ​)​។ ហិ​រ​ញ្ញាប្ប​ទាន​ពី​បារាំង​ទាំងនេះ បាន​ផ្តោតទៅលើ​វិស័យ​សំខាន់ៗ ដូចជា ការអភិវឌ្ឍន៍​វិស័យ​កសិកម្ម និង​ហេដ្ឋារចនាសម្ព័ន្ធ​ជនបទ​, បណ្តុះបណ្តាល​ជំនាញ និង​គាំទ្រ​វិស័យ​ផលិតកម្ម ព្រមទាំង​ធនាគារ និង​គ្រឹះស្ថាន​ហិរញ្ញវត្ថុ​៕ 

Tag:
 ឥណទាន​សម្បទាន​
  ទឹកស្អាត​
  បាក់​ខែង​
  AFD
© រក្សាសិទ្ធិដោយ thmeythmey.com