និស្សិត​ចិន និង​វៀតណាម រៀន​ភាសា​ខ្មែរ​ច្រើនជាងគេ នៅ​សាកលវិទ្យាល័យ​ភូមិន្ទ​ភ្នំពេញ​
ជាតិ
វីដេអូ
និស្សិត​ចិន និង​វៀតណាម រៀន​ភាសា​ខ្មែរ​ច្រើនជាងគេ នៅ​សាកលវិទ្យាល័យ​ភូមិន្ទ​ភ្នំពេញ​
01, Jan 2020 , 7:59 am        
រូបភាព
​ភ្នំពេញ​៖ និស្សិត​បរទេស​ចំនួន ៣៥៦​នាក់ មកពី​៧​ប្រទេស បានមក​សិក្សា​ថ្នាក់​បរិញ្ញាបត្រ​អក្សរសាស្ត្រ​ខ្មែរ និង​កម្មវិធី​ផ្លាស់ប្ដូរ​ការសិក្សា នៅ​សាកលវិទ្យាល័យ​ភូមិន្ទ​ភ្នំពេញ នៅក្នុង​ឆ្នាំ​២០១៩​។ ក្នុងចំណោម​និស្សិត​ទាំង​៧​ប្រទេស​នេះ  និស្សិត​ដែល​សិក្សា​អក្សរសាស្ត្រ​ខ្មែរ​នៅ​កម្ពុជា​ច្រើនជាងគេ គឺ​និស្សិត​ចិន និង​វៀតណាម​។ នេះ​បើតាម​លោកស្រី​បណ្ឌិត អ៊ុំ រ៉ាវី សាកលវិទ្យាធិការរង​នៃ​សាកលវិទ្យាល័យ​ភូមិន្ទ​ភ្នំពេញ​។​


 
​សូម​អញ្ជើញ​ទស្សនា​បទ​សម្ភាស​រវាង​កញ្ញា ញឹក ស្រី​ល័​ក្ខ អ្នកសារព័ត៌មាន ThmeyThmey ជាមួយ​លោកស្រី​បណ្ឌិត អ៊ុំ រ៉ាវី សាកលវិទ្យាធិការរង​នៃ​សាកលវិទ្យាល័យ​ភូមិន្ទ​ភ្នំពេញ​ដូចតទៅ​៖

 
​និស្សិត​ទាំង ៣៥៦​នាក់ ដែល​កំពុង​សិក្សា​ថ្នាក់​បរិញ្ញាបត្រ​អក្សរសាស្ត្រ​ខ្មែរ និង​ផ្លាស់ប្ដូរ​ការសិក្សា រួមមាន ចិន ១៥៩​នាក់​, វៀតណាម ១២៩​នាក់​, ឡាវ ២៧​នាក់​, ជប៉ុន ១៣​នាក់​, កូរ៉េ ១២​នាក់​, ម៉ាឡេស៊ី ១១​នាក់ និង​ថៃ ៥​នាក់ ។ ក្នុង​បទ​សម្ភាស​ជាមួយ​សារព័ត៌មាន​ថ្មីៗ លោកស្រី​បណ្ឌិត អ៊ុំ រ៉ាវី សាកលវិទ្យាធិការរង​នៃ​សាកលវិទ្យាល័យ​ភូមិន្ទ​ភ្នំពេញ បានបញ្ជាក់​យ៉ាង​ដូច្នេះ​៖ «​ថ្នាក់​ភាសា​ខ្មែរ​សម្រាប់​និស្សិត​បរទេស​នេះ បាន​បង្កើត​នៅ​ឆ្នាំ​១៩៩០​។ ហើយ​ប៉ុន្មាន​ឆ្នាំ​ចុង​ក្រោយនេះ និស្សិត​បរទេស​មានកា​រ​កើនឡើង ដោយសារ​ប្រទេស​យើង ចូល​សមាហរកម្ម​អាស៊ាន និង​សេដ្ឋកិច្ច​ទីផ្សារ ធ្វើ​ឲ្យ​ជនបរទេស​ចាប់អារម្មណ៍​ស្វែងយល់​ពី​កម្ពុជា និង​មក​សិក្សា​នៅទីនេះ​ច្រើន​»​។ 
 
​និស្សិត​បរទេស​ដែល​មក​រៀន​នៅទីនេះ ត្រូវ​រៀន​ជាមួយ​និស្សិត​កម្ពុជា លើកលែងតែ​និស្សិត​ចិន​ប៉ុណ្ណោះ ដែល​រៀន​ជា​ក្រុម​របស់​ពួកគេ​។ បើតាម​លោកស្រី​បណ្ឌិត អ៊ុំ រ៉ាវី និស្សិត​បរទេស​ដែល​មក​សិក្សា​ភាសា​ខ្មែរ​នៅទីនេះ បាន​អនុវត្ត​ការនិយាយ​ជាមួយ​និស្សិត​ខ្មែរ និង​សាស្ត្រាចារ្យ ដែល​ធ្វើ​ឲ្យ​មាន​ភាពងាយស្រួល​។​
 
​លោកស្រី​បណ្ឌិត អ៊ុំ រ៉ាវី អះអាងថា​៖ «​សម្រាប់​និស្សិត​បរទេស​ដែល​បញ្ចប់​ការសិក្សា​នៅទីនេះ ខ្ញុំ​ឃើញ​មាន​ច្រើន​ទាំង​និស្សិត​ចិន​, និស្សិត​ជប៉ុន​, វៀតណាម និង​ឡាវ អ្នកខ្លះ មក​ធ្វើការ​នៅ​ស្ថានទូត​, អ្នកខ្លះ ជា​អ្នកបកប្រែ ខ្លះ​ជា​លេខា​ទូត និង​អ្នក​ខ្លះទៀត ជា​ប្រធាន​ដេ​ប៉ា​តឺ​ម៉​ង់​ផ្នែក​ភាសា​ខ្មែរ​ប្រចាំ​នៅ​សាកលវិទ្យាល័យ​គាត់​ផងដែរ​»​។ 
 
​ក្រៅពី​ជំនាញ​អក្សរសាស្ត្រ​ខ្មែរ និស្សិត​បរទេស​មួយចំនួន ក៏​បានមក​សិក្សា​ជំនាញ​សិក្សា​អន្តរជាតិ​, ពាណិជ្ជកម្ម​អន្តរជាតិ​នៅ​សាកលវិទ្យាល័យ​ភូមិន្ទ​ភ្នំពេញ​ផងដែរ​៕

Tag:
 និស្សិត​
  បរទេស​
  អប់រំ​
  សាកលវិទ្យាល័យ​ភូមិន្ទ​ភ្នំពេញ​
© រក្សាសិទ្ធិដោយ thmeythmey.com