ពន្ធដារ ច្រានចោលការចុះផ្សាយរបស់សារព័ត៌មានភាសាចិនមួយ ពីរឿងទារប្រាក់«ប៉ាតង់» នៅខេត្តព្រះសីហនុ

ជាតិ

ពន្ធដារ ច្រានចោលការចុះផ្សាយរបស់សារព័ត៌មានភាសាចិនមួយ ពីរឿងទារប្រាក់«ប៉ាតង់» នៅខេត្តព្រះសីហនុ

01, Jan 2020 , 9:19 pm

រូបភាព

រូបពីហ្វេសប៊ុកអគ្គនាយកដ្ឋានពន្ធដារ

ដោយ: ធឿន បញ្ញាឬទិ្ធ

ភ្នំពេញ៖ អគ្គនាយកដ្ឋានពន្ធដារ បដិសេធការចុះផ្សាយរបស់សារព័ត៌មានភាសាចិនមួយ ដែលនិយាយពីរឿងចុះបញ្ជីប៉ាតង់អាជីវកម្ម នៅខេត្តព្រះសីហនុ ដោយតម្រូវឱ្យម្ចាស់អាជីវកម្មបង់ប្រាក់១៨០០ដុល្លារអាមេរិក។ អគ្គនាយកដ្ឋានពន្ធដារ បដិសេធថា គ្មានករណីមន្ត្រីពន្ធដារ ធ្វើបែបនេះឡើយ។ នេះបើតាមសេចក្តីបំភ្លឺរបស់អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី៣០ ធ្នូ។

សារព័ត៌មានភាសាចិនមួយ បានចុះផ្សាយថា មន្ត្រីពន្ធដារ បានចុះទៅប្រាប់ម្ចាស់អាជីវកម្មមួយកន្លែង ក្នុងខេត្តព្រះសីហនុ ដោយតម្រូវឱ្យចុះបញ្ជីប៉ាតង់ និងត្រូវបង់ប្រាក់១៨០០ដុល្លារអាមេរិក ហើយបើក្នុងករណីមិនបានចុះបញ្ជីប៉ាតង់ លើស១៥ថ្ងៃនោះ នឹងពិន័យ៥០០ដុល្លារ។ សារព័ត៌មានភាសាចិននោះ ក៏បានចុះផ្សាយដោយភ្ជាប់រូបភាពទីតាំងអាជីវកម្មនៅខេត្តព្រះសីហនុ ដែលមិនបានចុះបញ្ជីពន្ធដារនោះផងដែរ។

ឆ្លើយតបនឹងការចុះផ្សាយខាងលើនេះ អគ្គនាយកដ្ឋានពន្ធដារ ដែលបានចុះសួរនាំម្ចាស់អាជីកម្មនៅខេត្តព្រះសីហនុ កាលពីថ្ងៃទី២៧ ធ្នូនោះ បានបកស្រាយវិញថា កម្រៃចុះបញ្ជីប៉ាតង់ ១៨០០ដុល្លារ ដែលបានចុះផ្សាយនោះ គឺជាការទាមទាររបស់ភ្នាក់ងារឯកជនមួយ ក្នុងការធ្វើច្បាប់អាជីវកម្មឱ្យគាត់ ពោលគឺមិនមែនជាការទាមទាររបស់មន្ត្រីពន្ធដារ ដូចការចោទប្រកាន់ទេ។ បើតាមអគ្គនាយកដ្ឋានពន្ធដារ ក្រុមការងារជំនាញខ្លួន បានណែនាំនីតិវិធីចុះបញ្ជីពន្ធដារ និងផ្ដល់សេវាចុះបញ្ជីពន្ធដារជូនម្ចាស់អាជីវកម្មរួចរាល់ហើយ ក្រោយសួរនាំពីបញ្ហានៃការចុះបញ្ជីពន្ធដារនេះ។

សេចក្តីបំភ្លឺរបស់អគ្គនាយកដ្ឋានពន្ធដារ បានសរសេរដូច្នេះថា៖«សូមបដិសេធយ៉ាងដាច់អហង្ការ ចំពោះខ្លឹមសារនៃការចុះផ្សាតព័ត៌មានពាក់ព័ន្ធនឹងសមត្ថកិច្ចរបស់អគ្គនាយកដ្ឋានពន្ធដារ ដោយគ្មានមូលដ្ឋានច្បាស់លាស់ដែលថា ធ្វើប៉ាតង់ត្រូវបង់១៨០០ដុល្លារ លើសពី១៥ថ្ងៃ ពិន័យ៥០០ដុល្លារ ដែលអាចនាំឱ្យមានការភាន់ច្រឡំមកលើការបំពេញភារកិច្ចរបស់មន្ត្រីនៃអគ្គនាយកដ្ឋានពន្ធដារ»។

ជាមួយគ្នានេះអគ្គនាយកដ្ឋានពន្ធដារ បានអំពាវនាវដល់ម្ចាស់អាជីវកម្មទាំងអស់ សហការបំពេញកាតព្វកិច្ចចុះបញ្ជីពន្ធដារ ឱ្យបានទាន់ពេលវេលាតាមការណែនាំរបស់រដ្ឋបាលសារពើពន្ធ ដើម្បីចៀសវាងការទទួលរងពិន័យ និងទោសទណ្ឌផងដែរ។ «ប្រសិនបើមានភាពមិនប្រក្រតីណាមួយកើតឡើង ពាក់ព័ន្ធនឹងសមត្ថកិច្ចរបស់អគ្គនាយកដ្ឋានពន្ធដារ សូមទំនាក់ទំនបងផ្ដល់ព័ត៌មាន និងអត្តសញ្ញាណជនបង្ក(ទៅអគ្គនាយកដ្ឋានពន្ធដារ) មកកាន់លេខទូរសព្ទ១២៧៧ ឬGDT Live Chat ឬអ៊ីម៉ែល

.kh»។ នេះជាការបញ្ជាក់របស់អគ្គនាយកដ្ឋានពន្ធដារ៕