ជាតិ
ថវិកាជិត៤ម៉ឺនដុល្លារជួយមន្ទីរពេទ្យកុមារអង្គរ ពីសប្បុរសជនដែលបានរៃអង្គាសនៅរាត្រីឆ្លងឆ្នាំសកល
×![]()
ដោយ: ថ្មីៗ
សៀមរាប៖ នៅរាត្រីឆ្លងឆ្នាំសកល ឆ្នាំថ្មី ២០២០ វិស័យឯកជនបានសហការគ្នារៀបចំកម្មវិធីរាត្រីសមោសរ រៃអង្គាសថវិកាបានជិត៤ម៉ឺនដុល្លារដើម្បីជួយមន្ទីរពេទ្យកុមារអង្គរ។ ថវិកាទាំងនេះ គឺដើម្បីបង្គ្រប់ការចំណាយប្រចាំឆ្នាំនៅមន្ទីរពេទ្យនេះ។
ថវិកាដែលបានពីការចូលរួមទិញសំបុត្រឆ្លងឆ្នាំនៅសណ្ឋាគារម៉េម័រ ផាឡេស និងការទិញគ្រឿងអលង្ការពីហាងជាង ប៉ាក់ វណ្ណហុង សរុបចំនួនជិត៤ម៉ឺនដុល្លារ ត្រូវបានប្រគល់ជូនមន្ទីរពេទ្យកុមារអង្គរ ដែលធ្វើឡើងនៅរាត្រីថ្ងៃទី៣១ ធ្នូ។ នេះជាសកម្មភាពសប្បុរសធម៌ចុងក្រោយគេបង្អស់ដែលមន្ទីរពេទ្យកុមារអង្គរទទួលបាន និងជាទឹកប្រាក់សប្បុរសធម៌ចុងក្រោយសម្រាប់ឆ្នាំ២០១៩។
ប្រធានផ្នែកទំនាក់ទំនងកិច្ចការសាធារណនៃមន្ទីរពេទ្យកុមារអង្គរ លោកស្រី ស៊ិនកេត អារុណ មានប្រសាសន៍ថា នារយៈពេលចុងក្រោយនេះ វិស័យឯកជនកាន់តែច្រើនបានរួមចំណែកធ្វើកិច្ចការដើម្បីជួយមន្ទីរពេទ្យកុមារអង្គរ ដែលព្យាបាលកុមារក្រីក្រកម្ពុជាដោយឥតគិតថ្លៃ។ លោកស្រីបន្តថា ជារៀងរាល់ថ្ងៃមានកុមារប្រមាណ៥០០ទៅ៦០០នាក់ បានមកទទួលសេវាព្យាបាលជំងឺដោយឥតគិតថ្លៃពីមន្ទីរពេទ្យកុមារអង្គរ។ លោកស្រី អារុណ ចង់ឱ្យវិស័យឯកជនបន្តចូលរួម និងបង្កើតព្រឹត្តិការណ៍នានាក្នុងបុព្វហេតុរួមចំណែករៃអង្គាសថវិកាជួយកុមារកម្ពុជាជាបន្តទៀត។
លោកស្រី អ៊ឹមផាន វណ្ណឌី នាយិកាក្រុមហ៊ុន ហាងជាង ប៉ាក់វណ្ណហុង ដែលជាអ្នកឧបត្ថម្ភធំនៅក្នុងកម្មវិធីនេះ បានឱ្យដឹងដែរថា ថវិកាសប្បុរសជិត ៤ម៉ឺនដុល្លារនេះ គឺបានមកពីការដកតម្លៃឈ្នួល ដែលអតិជនបានជាវគ្រឿងអលង្ការពីក្រុមហ៊ុនក្នុងរយៈពេល២សប្តាហ៍ មុនរាត្រីឆ្លងឆ្នាំនេះចូលមកដល់ និងមួយចំណែកទៀត បានមកពីការដកភាគរយនៃការជាវសំបុត្រចូលរួមកម្មវិធីរាត្រីសមោសរ សប្បុរសធម៌ឆ្លងឆ្នាំ ដែលរៀបចំឡើងដោយម៉េម័រ ។
លោក ហ្វីលីប កៅ ស្ថាបនិកសណ្ឋាគារ ម៉េម័រ ផាឡេស បានប្រាប់អ្នកសារព័ត៌មាននៅរាត្រីនោះថា នេះជាឆ្នាំទី២ហើយដែលសណ្ឋាគាររបស់លោករៀបចំកម្មវិធីបែបនេះជួយមន្ទីរពេទ្យកុមារអង្គរ។ ឆ្នាំទី១ កម្មវិធីដូចគ្នានេះ បានរៃអង្គាសថវិកាជាង៣ម៉ឺនដុល្លារ៕
Tag:
មន្ទីរពេទ្យកុមារអង្គរ
© រក្សាសិទ្ធិដោយ thmeythmey.com
