ជាតិ
សង្គមជាតិ
សណ្ឋាគារអប្សរាអង្គរមួយទៀតហើយ ដែលសម្រេចបិទទ្វារ
× សៀមរាប៖ វិស័យទេសចរណ៍នៅខេត្តសៀមរាប ហាក់មិនមានភាពល្អប្រសើរសោះមកដល់ថ្ងៃនេះ បន្ទាប់ពីជួបវិបត្តិធ្លាក់ភ្ញៀវទេសចរ អស់ជាងមួយឆ្នាំកន្លងមក។ ស្ថានភាពនេះ បានបង្ខំឱ្យម្ចាស់សណ្ឋាគារ និងភោជនីយដ្ឋានធំៗក្នុងក្រុងសៀមរាប បានប្រកាសបិទទ្វារ និងខ្លះទៀតដាក់ជួលក៏មាន។ នៅថ្ងៃទី១ មករា សណ្ឋាគារអប្សរាអង្គរ ដែលមានភាពល្បីល្បាញ ក៏បានប្រកាសពីការបិទអាជីវកម្មរបស់ខ្លួនដែរ។ ទាក់ទងនឹងបញ្ហានេះ ប្រតិបត្តិករទេសចរណ៍ខេត្តសៀម មានការសោកស្ដាយ និងបង្ហាញក្តីបារម្ភថា «សណ្ឋាគារផ្សេងទៀត ក៏អាចប្រឈមមុខដូចគ្នានេះ ប្រសិនបើស្ថានភាពបែបនេះ មិនមានការវិវត្តថ្មី»។
អ្នកគ្រប់គ្រងសណ្ឋាគារអប្សរាអង្គរ បានប្រកាសជាសាធារណៈក្នុងបណ្ដាញសង្គម ពីព័ត៌មាននៃការបិទអាជីវកម្មសណ្ឋាគារនេះ បន្ទាប់ពីមានវត្តមាននៅលើទឹកដីអង្គរជិត១៨ឆ្នាំមក។ ព័ត៌មាននេះ បានបង្កឱ្យមានការភ្ញាក់ផ្អើលមួយទៀត បន្ទាប់ពីអតីតសណ្ឋាគារ Inter-continental (The Great Duke) នៅរាជធានីភ្នំពេញ បានប្រកាសបិទទ្វារ នៅថ្ងៃទី៣១ ធ្នូ។ សារព័ត៌មានថ្មីៗ មិនអាចសុំការបញ្ជាក់ ពីអ្នកគ្រប់គ្រងសណ្ឋាគារអប្សរាអង្គរបានទេ ជុំវិញមូលហេតុដែលនាំឱ្យមានការបិទអាជីវកម្មនេះ។
ម្ចាស់សណ្ឋាគារមួយនៅខេត្តសៀបរាប ដែលសុំមិនបញ្ចេញឈ្មោះ បានប្រាប់សារព័ត៌មានថ្មីៗនៅរសៀលថ្ងៃទី២ មករានេះថា ជាទូទៅ ការរកស៊ីពេលណានៅបន្តបាននោះ គេនឹងបន្ត ព្រោះថាសណ្ឋាគារអប្សរាអង្គរនេះ បានរកស៊ីច្រើនឆ្នាំមកហើយ ប៉ុន្តែដល់កម្រិតដែលខាត មិនចំណេញ ឬទប់លែងបាន នោះអ្នករកស៊ី មិនខ្លាចនឹងការបិទទ្វារឡើយ។ លោក មិនបានដឹងព័ត៌មានច្បាស់លាស់ ពីចំនួនសណ្ឋាគារក្នុងក្រុងសៀមរាម ដែលបានបិទអាជីវកម្មនោះទេ តែលោកប្រាប់ថា លោក សង្កេតឃើញមាន «សណ្ឋាគារច្រើនកន្លែង បានដាក់ស្លាកលក់ឬជួល ជាបន្តបន្ទាប់នារយៈពេលចុងក្រោយនេះ»។
បន្ថែមពីនេះ លោក ពន្យល់ថា ស្ថានភាពបែបនេះ អាចនឹងធ្វើឱ្យសណ្ឋាគារផ្សេងទៀត ប្រឈមមុខនឹងការបិទអាជីវកម្មដូចគ្នា ប្រសិនបើគ្មានដំណោះស្រាយ ឬបរិយាកាសវិស័យនេះមិនមានការវិវត្តថ្មី។ ម្ចាស់សណ្ឋាគាររូបនេះ បញ្ជាក់ដូច្នេះថា៖«គ្មានអ្នកណាចង់បិទអាជីវកម្មខ្លួនទេ តែបើខាតមិនចំណេញ ទប់លែងកើត គ្មានអ្នកណានៅបន្តធ្វើទេ»។
ចំណែក អ្នកគ្រប់គ្រងជាស្រ្តីនៅសណ្ឋាគារមួយទៀត ដែលសុំមិនបញ្ចេញឈ្មោះដែរនោះ ក៏បានបង្ហាញការសោកស្ដាយដែរ ចំពោះព័ត៌មាននៃការបិទសណ្ឋាគារអប្សរាអង្គរ។ យ៉ាងណា អ្នកស្រី យល់ថា បញ្ហានេះ មិនមែនកើតឡើងតែនៅកម្ពុជាទេ។
ប្រទេសនៅអាស៊ីមួយចំនួន មានថៃ និងវៀតណាម ជាដើម បានពើបប្រទះការធ្លាក់ចុះចំនួនទេសចរដូចគ្នា តែដោយសារប្រទេសទាំងនោះមានទេសចរច្រើន ទើបការធ្លាក់នេះមិនសូវចោទខ្លាំង សម្រាប់ប្រទេសទាំងនោះ។ យ៉ាងណា ការប្រកាសបិទសណ្ឋាគារអប្សរាអង្គរនេះ អាចទាក់ទងនឹងផ្នែកទីផ្សាររបស់សណ្ឋាគារនេះខ្លួនឯង។ គេដឹងថា កន្លងមកសណ្ឋាគារ ដែលមានជាង១០០បន្ទប់នេះ ផ្តោតគោលដៅធំ លើការរៀបចំកិច្ចប្រជុំស្ថាប័នរាជរដ្ឋាភិបាល តែក្រោយមកមានសណ្ឋាគារថ្មីចូលខ្លួនមកជំនួស ទើបបណ្ដាលឱ្យអាជីវកម្មសណ្ឋាគារនេះគ្មានទីផ្សារ៕
Tag:
សណ្ឋាគារអប្សរាអង្គរ
© រក្សាសិទ្ធិដោយ thmeythmey.com