ជាតិ
មន្ត្រីអន្តោប្រវេសន៍៖ ការចាកចេញរបស់ជនជាតិចិនជាង៤០ម៉ឺននាក់ មិនមែនមកពីបិទល្បែងអនឡាញឡើយ
× ភ្នំពេញ៖ ជនជាតិចិន បានចាកចេញពីកម្ពុជា ជាង៤០ម៉ឺននាក់ នៅឆ្នាំ២០១៩ ដោយសារតែវដ្តនៃរដូវកាលទេសចរណ៍ ហើយមិនមែនមកពីករណីបិទល្បែងអនឡាញឡើយ។ នេះបើតាមមន្ត្រីជាន់ខ្ពស់នៃអគ្គនាយកដ្ឋានអន្តោប្រវេសន៍របស់ក្រសួងមហាផ្ទៃ។
លោក កែវ វណ្ណថន អគ្គនាយករងនៃអគ្គនាយកដ្ឋានអន្តោប្រវេសន៍ បានប្រាប់សារព័ត៌មានថ្មីៗថា គិតត្រឹមរយៈពេល៥ខែ គឺចាប់ពីខែសីហា ដល់ធ្នូ ឆ្នាំ២០១៩ នោះ មានជនជាតិចិនជាង៤០ម៉ឺននាក់ ដែលប្រើប្រាស់ប្រភេទ Visa E ចាកចេញកម្ពុជា ។បើតាមលោក វណ្ណថន ដ្បិតជនជាតិចិនទាំងនោះចាកចេញក្តី ប៉ុន្តែក៏មានជនជាតិចិនចូលមកកម្ពុជាវិញជាង៣២ម៉ឺននាក់ដែរ។ «ចំនួនតួលេខទាំងពីរនេះ គឺចេញច្រើនជាងចូលប្រមាណ៧ម៉ឺននាក់។ ចំនួនចេញច្រើនជាងចំនួនចូលនេះ ដោយសារជារដូវការទេសចរណ៍មានឡើងមានចុះ»។ នេះជាការបញ្ជាក់របស់អគ្គនាយករងនៃអគ្គនាយកដ្ឋានអន្តោប្រវេសន៍។
ដ្បិតមន្ត្រីជាន់ខ្ពស់អន្តោប្រវេសន៍ អះអាងថា ការចាកចេញរបស់ភ្ញៀវចិនច្រើននេះ ដោយសារបញ្ហារដូវកាលទេសចរណ៍ក្តី វាគ្រាន់តែជាករណីមួយប៉ុណ្ណោះ។ ប៉ុន្តែគេសង្កេតឃើញថា ការចាកចេញរបស់ភ្ញៀវចិនទាំងនោះ កើតឡើងក្រោយពីរដ្ឋាភិបាលប្រកាសទប់ស្កាត់ និងបង្ក្រាបល្បែងអនឡាញនៅកម្ពុជា។
កន្លងមកសម្ដេច ហ៊ុន សែន បាននិយាយថា ការបើកឱ្យមានល្បែងអនឡាញនេះ វាធ្វើកម្ពុជាជួបបញ្ហាប្រឈមពីរ គឺ បញ្ហាលាងលុយកខ្វក់ និងបញ្ហាអសន្តិសុខ ដែលបង្កឡើងដោយក្រុមម៉ាហ្វីយ៉ា (ក្រុមជនពាល)។ សម្រាប់នាយករដ្ឋមន្ត្រី ហ៊ុន សែន បញ្ហាទាំងនេះ វានឹងធ្វើឱ្យប៉ះពាល់ដល់ការវិនិយោគ និងសេដ្ឋកិច្ចកម្ពុជា ដូច្នេះមានតែការលុបបំបាត់ចោលល្បែងអនឡាញទេ ទើបកម្ពុជាអាចរក្សាស្ថិរភាពសេដ្ឋកិច្ចបាន។
បច្ចុប្បន្នកម្ពុជាមានកាស៊ីណូ២១៨កន្លែងដែលបានចុះបញ្ជី ខណៈកាស៊ីណូត្រឹមតែ១៤០កន្លែងប៉ុណ្ណោះ បានដំណើរការ។ បើតាមការប៉ាន់ប្រមាណរបស់លោក រស់ ភីរុណ អគ្គនាយករងក្រសួងសេដ្ឋកិច្ច និងហិរញ្ញវត្ថុថា នៅឆ្នាំ២០២០នេះ ចំនួនកាស៊ីណូនឹងធ្លាក់ចុះ សល់ត្រឹម៩០កន្លែងប៉ុណ្ណោះ ដោយសារការបញ្ឈប់អាជីវកម្មល្បែងអនឡាញ។
បើតាមលោក រស់ ភីរុណ បច្ចុប្បន្នខេត្តព្រះសីហនុមានកាស៊ីណូ១០៨កន្លែង ខេត្តបន្ទាយមានជ័យមាន២៥កាស៊ីណូ ខេត្តស្វាយរៀងមានកាស៊ីណូចំនួន១៨ និងនៅភ្នំពេញមាន១កន្លែង។
សូមបញ្ជាក់ថា ជនជាតិចិនដែលត្រូវបណ្តេញចេញពីកម្ពុជាក្នុងឆ្នាំ ២០១៩ មានជាង៩២៦នាក់ បើធៀបនឹងឆ្នាំ២០១៨ ថយចុះ២៤នាក់ ស្មើនឹង២.៥៣ភាគរយ។ ជនជាតិចិន ដែលត្រូវបណ្ដេញទាំងនោះ ភាគច្រើនប្រព្រឹត្តបទល្មើស ឆបោកតាមប្រព័ន្ធទូរគមនាគមន៍(Telecom Fraud) បើកល្បែងអនឡាញខុសច្បាប់ និងបទល្មើសសេដ្ឋកិច្ចជាដើម។ នេះបើតាមរបាយការណ៍ដែលទទួលបានពី លោក កែវ វណ្ណថន៕
Tag:
កាស៊ីណូ
ជនជាតិចិន
© រក្សាសិទ្ធិដោយ thmeythmey.com