ពីនេះ ពីនោះ
ព័ត៍មានសុខភាព
×![]()
ដោយ: ថ្មីៗ
ការគេងបានគ្រប់គ្រាន់ គឺចាំបាច់ណាស់សម្រាប់រាយកាយដើម្បីស្ដារថាមពលឡើងវិញនិងរក្សាសុខភាពល្អប្រសើរ។ ជាធម្មតាមនុស្សពេញវ័យត្រូវគេងឱ្យស្កប់ពី ៧ ទៅ ៩ ម៉ោងក្នុងមួយយប់។ 
ខាងក្រោមនេះយើង នឹងបង្ហាញឱ្យដឹងពីអត្ថប្រយោជន៍នៃការគេងបានស្កប់រាល់យប់ ៖
១. គ្រប់គ្រងអ័រម៉ូន
មួយក្នុងចំណោមមូលហេតុដែលអ្នកត្រូវគេងឱ្យស្កប់គ្រប់គ្រាន់នោះ គឺវាជួយដល់ការផលិតអ័រម៉ូនក្នុងរាងកាយ។ នៅពេលគេងមិនបានគ្រប់គ្រាន់ ឬមិនគេងតែម្ដងនោះអ័រម៉ូនលូតលាស់ដែលរាងកាយផលិតនឹងថយចុះបង្កផលប៉ះពាល់ដល់ការលូតលាស់ទាំងមូលនៃរាងកាយ។ នេះហើយជាមូលហេតុចម្បងមួយដែលរាងកាយមិនងាយនឹងជាសះស្បើយ។
២. គ្រប់គ្រងទម្ងន់
នៅពេលអ្នកគេងគ្រប់គ្រាន់ នោះអ្នកមិនងាយនឹងឡើងទម្ងន់ឡើយ។ នោះក៏ព្រោះតែការគេងបានស្កប់គ្រប់គ្រាន់ជួយរក្សាតុល្យភាពនៃអ័រម៉ូន ghrelin និង leptin ដែលគ្រប់គ្រងការឃ្លាននិងឆ្អែត។
៣. កាត់បន្ថយហានិភ័យនៃជំងឺសរសៃឈាមបេះដូង និងដាច់សរសៃឈាមខួរក្បាល
នោះក៏ព្រោះតែការគេងបានគ្រប់គ្រាន់ជួយអោយចរន្តឈាមរត់បានត្រឹមត្រូវដែលទប់ស្កាត់បញ្ហាឈាមកកកើតមានឡើង។ គួរបញ្ចាក់ផងដែរថា ប្រសិនបើឈាមកកចរាចរនោះវានឹងរាំងស្ទះដល់លំហូរនៃឈាមដឹកនាំអុកស៊ីសែនទៅកាន់សាច់ដុំបេះដូងដែលជាអ្វីមួយអាចនាំឱ្យគាំងបេះដូង។ ប្រសិនបើអ្នកផ្ដាច់ការផ្គត់ផ្គង់ឈាមដឹកនាំអុកស៊ីសែនទៅកាន់ផ្នែកមួយនៃខួរក្បាលនោះហានិភ័យនៃជំងឺដាច់សរសៃឈាមខួរក្បាលនឹងឡើងខ្ពស់គួរឱ្យព្រួយបារម្ភជាក់ជាមិនខាន។
៤. បន្សាបជាតិពុល
ភាគច្រើននៃពួកយើងប្រហែលជាមិនធ្លាប់ដឹងទេថាខួរក្បាលនិងថ្លើមត្រូវការការគេងគ្រប់គ្រាន់ដើម្បីបន្សាបជាតិពុល។ សារធាតុប្រឆាំងអុកស៊ីតកម្ម glutathione ត្រូវបានផលិតក្នុងថ្លើមដែលជួយការពាររាងកាយពីជំងឺរ៉ាំរ៉ៃផ្សេងៗ។ ហើយនៅពេលគេងមិនគ្រប់នោះរាងកាយនឹងមិនអាចផលិតសារធាតុ glutathione គ្រប់គ្រាន់ឡើយ។
៥. ជំរុញការចងចាំ
មូលហេតុផ្សេងទៀតដែលអ្នកគួរគេងឱ្យបានគ្រប់គ្រាន់នោះ គឺវាជួយជំរុញការចងចាំ។ ការគេងមិនគ្រប់រួមផ្សំជាមួយបញ្ហាស្ត្រេសនឹងជះឥទ្ធិពលកាន់តែគួរឱ្យព្រួយបារម្ភដល់សមត្ថភាពនៃការចងចាំ។ នោះក៏ព្រោះតែកម្រិតនៃអ័រម៉ូនស្ត្រេស cortisol កើនឡើងខ្ពស់។
៦. ពង្រឹងប្រព័ន្ធភាពស៊ាំរាងកាយ
ប្រសិនបើអ្នកគេងមិនបានគ្រប់គ្រាន់ជាប្រចាំនោះអ្នកប្រាកដជាសម្គាល់ឃើញថាខ្លួនឯងងាយនឹងកើតជំងឺផ្ដាសាយ។ នេះក៏ព្រោះតែប្រព័ន្ធភាពស៊ាំរាងកាយចាប់ផ្ដើមចុះខ្សោយ។ ដូច្នេះដើម្បីជាការប្រសើរចៀសផុតបញ្ហាសុខភាពគួរឱ្យព្រួយបារម្ភ ចូរព្យាយាមគេងឱ្យបានស្កប់គ្រប់គ្រាន់៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com
