សត្វជិត ៥០០លានក្បាល ត្រូវគេជឿជាក់ថា បាត់បង់ជីវិតក្នុងភ្លើងឆេះព្រៃដែលបន្តរាលដាលជុំវិញប្រទេសអូស្ត្រាលី។ តួលេខនេះ គឺគិតចាប់ពីភ្លើងឆេះព្រៃនេះ ចាប់ផ្តើមកាលពីខែ កញ្ញា ឆ្នាំ២០១៩។ រដ្ឋមន្ត្រីបរិស្ថានអូស្ត្រាលី អះអាងថា សត្វខ្លាឃ្មុំអូស្ត្រាលី (Koalas) បាត់បង់៣០ភាគរយក្នុងហេតុការណ៍នេះ។
ក្រុមអ្នកអេកូឡូស៊ី បរិស្ថានប្រចាំសាកលវិទ្យាល័យ Sydney បានប្រាប់សារព័ត៌មានក្នុងស្រុកអូស្ត្រាលី News.com.au ដូច្នេះថា តាមការប៉ាន់ស្មានថនិកសត្វ បក្សី និងសត្វល្មូនប្រមាណ ៤៨០ លានក្បាលបានងាប់នៅក្នុងភ្លើងឆេះព្រៃ ដែលកំពុងបន្តឆាប់ឆេះយ៉ាងសន្ធោសន្ធៅជុំវិញអូស្ត្រាលី ចាប់តាំងពីកញ្ញា ឆ្នាំ២០១៩ មក។ យោងតាមការចុះផ្សាយសារព័ត៌មាន Independent សត្វ ៨ ពាន់ក្បាល ដែលជឿថាបានងាប់ក្នុងចំណោមនោះគឺ សត្វខ្លាឃ្មុំអូស្ត្រាលី (Koalas) ។
គិតមកត្រឹមថ្ងៃព្រហស្បតិ៍ ទី២ ខែមករា ឆ្នាំ២០២០ ភ្លើងជាង ១៣០ ចំណុច កំពុងឆាបឆេះក្នុងរដ្ឋ New South Wales និង Victoria ។ ភ្លើងដ៏សាហាវនេះ បានបំផ្លិចបំផ្លាញដីប្រមាណ ៩,៩ លានហិកតា នៅជុំវិញរដ្ឋចំនួន៥របស់អូស្ត្រាលី។ យ៉ាងតិចណាស់ មនុស្ស ១៨ នាក់បានស្លាប់ ក្នុងគ្រោះភ្លើងឆេះព្រៃនេះ ហើយផ្ទះសំបែងប្រមាណ ១៤០០ បានឆេះខ្ទេចខ្ទី។ តាមប្រភពព័ត៌មានក្នុងស្រុកដដែល សត្វដែលរស់នៅក្នុងតំបន់ទាំងនោះ គឺរួមមាន សត្វខ្លាឃ្មុំអូស្ត្រាលី (Koalas), សត្វកង់ហ្គូរូ , សត្វ Possum, សត្វ Wombat និងសត្វ Echidnas ។
ប្រាប់សារព័ត៌មានអូស្ត្រាលី ABC នៅថ្ងៃសុក្រ ទី៣ ខែមករា រដ្ឋមន្ត្រីបរិស្ថានអូស្ត្រាលី អ្នកស្រី Sussan Ley បានបញ្ជាក់ថា សត្វខ្លាឃ្មុំអូស្ត្រាលី (Koalas) ដល់ ៣០ ភាគរយ ក្នុងរដ្ឋ New South Wale ត្រូវបានសម្លាប់ព្រោះភ្លើងឆេះព្រៃនេះ។
កន្លងទៅ អ្នកជំនាញអេកូឡូស៊ី លោក Mark Graham នៃក្រុមប្រឹក្សាអភិរក្សធម្មជាតិអូស្ត្រាលី បានប្រាប់សភា ក្នុងខែធ្នូ ឆ្នាំ២០១៩ ថា សត្វខ្លាឃ្មុំ Koalas មិនមានលទ្ធភាពរត់លឿនគ្រប់គ្រានដើម្បីគេចផុតពីភ្លើងឆេះព្រៃឡើយ ។ ម្យ៉ាងទៀត សត្វប្រភេទនេះ ស៊ីស្លឹកឈើជាអាហារ ប៉ុន្តែដោយសារភ្លើងឆេះព្រៃ ពួកវាលែងមានអ្វីស៊ីបន្តទៀត។
សូមបញ្ជាក់ថា រដ្ឋាភិបាលអូស្ត្រាលី កាលពីថ្ងៃពុធសប្តាហ៍នេះ បានដាក់ពង្រាយនាវា និងយន្តហោះយោធា ដើម្បីប្រមូលផ្តុំមនុស្សឲ្យនៅជុំគ្នា, នាំយកទឹក អាហារ និងប្រេងឥន្ធនៈទៅកាន់ក្រុងដែលខ្វះការផ្គត់ផ្គង់ហើយផ្លូវត្រូវបានកាត់ផ្ដាច់ព្រោះភ្លើងជាដើម។
រដូវកាលភ្លើងឆេះព្រៃក្នុងប្រទេសអូស្ត្រាលី អាចបំបែកកំណត់ត្រាអាក្រក់ខ្លាំងបំផុតថ្មី ជាមួយកម្រិតរលកកម្ដៅ និងផ្សែងពុលខ្លាំង ដែលក្រុមគ្រូពេទ្យព្រមានថាជា«ភាពអាសន្នសុខភាពសាធារណៈ»។ ប្រជាជនអូស្ត្រាលីជាច្រើន កំពុងធ្វើបាតុកម្មប្រឆាំងនាយករដ្ឋមន្ត្រីអភិរក្សនិយម Scott Morrison ដែលខ្វះចំណាត់ការដែលមានប្រសិទ្ធភាពប្រឆាំងនឹងការប្រែប្រួលអាកាសធាតុ ។ កាលពីខែមុន លោក បានបដិសេធកាត់បន្ថយចំនួនឧស្សាហកម្មធ្យូងថ្មរបស់ប្រទេស ព្រោះវារកចំណូលបានច្រើន៕