ជាតិ
បទយកការណ៍ / បទសម្ភាសន៍
អ្នកជំនាញទស្សនវិជ្ជា៖យុវជនគួររៀនជំនាញត្រិះរិះបែបស៊ីជម្រៅ ដើម្បីបង្ការខ្លួនពីជំងឺបាក់ទឹកចិត្ត លោកបណ្ឌិត ប៉ា ចាន់រឿន ដែលជាអ្នកសិក្សាស្រាវជ្រាវផ្នែកទស្សនវិជ្ជា និងការអភិវឌ្ឍសង្គម
× ភ្នំពេញ៖ យុវជននៅពេលបច្ចុប្បន្ន ហាក់ទទួលរងជំងឺធ្លាក់ទឹកចិត្ត ឬបាក់ទឹកចិត្តច្រើន ដែលបង្ហាញឱ្យឃើញពីកម្សោយផ្នែកស្មារតី និងសតិអារម្មណ៍របស់បុគ្គលនោះ។ ដើម្បីបង្ការខ្លួនពីជំងឺបាក់ទឹកចិត្ត លោកបណ្ឌិត ប៉ា ចាន់រឿន ដែលជាអ្នកសិក្សាស្រាវជ្រាវផ្នែកទស្សនវិជ្ជា និងការអភិវឌ្ឍសង្គម បានណែនាំយុវជនគួររៀនជំនាញការគិតវិភាគបែបស៊ីជម្រៅ។ ទោះជាយ៉ាងណាលោក ប៉ា ចាន់រឿន ថាបើដល់ដំណាក់កាលធ្លាក់ទឹកចិត្ត ឬបាក់ទឹកចិត្តហើយ យុវជនគួរប្រញាប់ស្វែងរកជំនួយ ដូចជារកអ្នកប្រឹក្សាយោបល់ ឬរកគ្រូពេទ្យជំនាញផ្នែកវិកលវិទ្យា ដើម្បីព្យាបាលភ្លាមៗ។
លោកបណ្ឌិត ប៉ា ចាន់រឿន អ្នកសិក្សាស្រាវជ្រាវផ្នែកទស្សនវិជ្ជា និងការអភិវឌ្ឍសង្គម បានព្រមានដល់យុវជន ដែលរស់ក្នុងសង្គមមានការវិវឌ្ឍសេដ្ឋកិច្ចនេះថា បើពួកគេមិនមានជំនាញការគិតពិចារណាបែបស៊ីជម្រៅទេ នោះពួកគេអាចនឹងធ្លាក់ក្នុងវិបត្តិជាក់ជាមិនខាន។
អ្នកស្រាវជ្រាវផ្នែកទស្សនវិជ្ជារូបនេះបញ្ជាក់បន្ថែម៖«កំណើនសេដ្ឋកិច្ច និងការឱ្យតម្លៃលើសម្ភារនិយម អាចទាញឱ្យយុវជនដែលមិនមានលទ្ធភាព ចង់បានរបស់លើសពីសមត្ថភាពរបស់ខ្លួន ហើយនៅពេលដែលមិនបានដូចបំណង ពួកគេក៏បាក់ទឹកចិត្ត»។
បើតាមលោក ប៉ា ចាន់រឿន មានបញ្ហា៥ចំណុចសំខាន់ៗ ដែលអាចនាំឱ្យយុវជនមានជំងឺបាក់ទឹកចិត្ត។ បញ្ហាចម្បងទី១ គឺម្ដាយឪពុកឬអាណាព្យាបាល មិនបានបណ្ដុះចិត្តកូនឱ្យរឹងមាំតាំងពីក្មេង។ បញ្ហាទី២ អាចបណ្ដាលមកពីបរិយាកាសក្នុងសង្គមខ្មែរ (ការឱ្យតម្លៃទៅលើសម្ភារជាធំ)។ បញ្ហាទី៣ អាចបណ្ដាលមកពី ភាពរីកចម្រើនផ្នែកសេដ្ឋកិច្ច ប៉ុន្តែស្មារតី ឬសុខុមាលភាពសង្គមនៅមានកម្រិត។ បញ្ហាទី៤ បរិយាកាសនៃការរស់នៅ មិនមានផាសុខភាព និងទី៥ គឺអាចមកពី បណ្ដាញព័ត៌មានសង្គម។
យុវជនអាចរំដោះខ្លួនចេញពីវិបត្តិផ្លូវចិត្តបាន លុះត្រាណាពួកគេទទួលស្គាល់ការពិត ហើយដើម្បីគិតយល់បែបនេះ ទាមទារឱ្យយុវជនមានជំនាញគិតបែបស៊ីជម្រៅ ព្រោះជំនាញនេះបានចង្អុលប្រាប់មនុស្សឱ្យមើលឃើញប្រភពនៃបញ្ហា ដំណោះស្រាយ និងលទ្ធភាពដែលអាចទៅរួច។ នេះជាការបញ្ជាក់របស់អ្នកសិក្សាស្រាវជ្រាវផ្នែកទស្សនវិជ្ជា និងការអភិវឌ្ឍសង្គម៕
Tag:
ប៉ា ចាន់រឿន
បាក់ទឹកចិត្ត
យុវជន
© រក្សាសិទ្ធិដោយ thmeythmey.com