កីឡាករ ពេជ្រ ម្ទេសខ្មាំង ជាសមាសភាព១រូបក្នុងចំណោមខ្មែរទាំង៨រូប ដែលត្រូវប្រជែងជាមួយថៃ ដើម្បីដណ្តើមខ្សែក្រវាត់ប្រាក់ មាស និងថវិកា១ម៉ឺនដុល្លារក្នុងកម្មវិធីប្រដាល់អធិរាជគុនខ្មែរ ISI Palm រជ្ជកាលទី២របស់ស្ថានីយទូរទស្សន៍ភិអិនអិន។ ទោះបីបាត់មុខមួយរយៈធំពីសង្វៀនប្រដាល់គុនខ្មែរ តែម្ចាស់មេដាយសំរឹទ្ធកីឡាស៊ីហ្គេមឆ្នាំ២០១៧រូបនេះ ហាក់មានក្តីរំពឹង និងតាំងចិត្តខ្ពស់ក្នុងការប្រជែងដណ្តើមជើងឯកប្រចាំព្រឹត្តិការណ៍មួយនេះ។ ម្ទេសខ្មាំង និយាយយ៉ាងម៉ឺងម៉ាត់ថា រូបគេមិនខ្លាចញញើតចំពោះសមត្ថភាពដៃគូឡើយ ពោលគឺប៉ះអ្នកណាក៏បាន។
ក្រោយបាត់មុខពីសង្វៀនប្រដាល់គុនខ្មែរអស់រយៈពេលជាច្រើនខែ ពេជ្រ ម្ទេសខ្មាំង នឹងបង្ហាញវត្តមានលើសង្វៀនប្រដាល់សេរីសាជាថ្មី បន្ទាប់ពីស្ថានីយទូរទស្សន៍ភីអិនអិនជ្រើសរើសរូបគេឲ្យប្រកួតប្រជែងដណ្តើតខ្សែក្រវាត់អមជាមួយថវិកា១ម៉ឺនដុល្លារក្នុងកម្មវិធីប្រដាល់អធិរាជគុនខ្មែរ ISI Palm រជ្ជកាលទី២។ កីឡាករជោគជាំដោយបទពិសោធប្រដាល់សកលរូបនេះ ហាក់មានទំនុកចិត្ត និងជឿជាក់ខ្លាំងលើសមត្ថភាពខ្លួន សម្រាប់ការប្រជែងដណ្តើមជើងឯកក្នុងព្រឹត្តិការណ៍នេះ។
ការខិតខំប្រឹងប្រែងហ្វឹកហាត់និងបទពិសោធប្រកួតប្រដាល់សកលលើឆាកអន្តរជាតិ គឺជាកត្តាដែលជំរុញឲ្យកីឡាកររូបនេះមានក្តីរំពឺង និងជឿជាក់ខ្លាំងបែបនេះ។ ម្ទេសខ្មាំង ដែលកំពុងហ្វឹកហាត់ពង្រឹងលើការប្រើប្រាស់ជើងអះអាងថា ការផ្លាស់ប្តូរពីប្រដាល់សកលមកប្រដាល់សេរីមិនចោទជាបញ្ហាឡើយ។ ផ្ទុយទៅវិញប្រដាល់សកលជួយឲ្យ រូបគេ មានចលនាបំលាស់ទីលឿន និងប្រើប្រាស់កណ្តាប់ដៃបានល្អ និងរហ័សរហួន។ ប៉ុន្តែអ្វីដែលជាបញ្ហាចោទសម្រាប់រូបគេ គឺការប្រើប្រាស់ជើង ខណៈបច្ចុប្បន្នកីឡាកររូបនេះកំពុងហ្វឹកហាត់ពង្រឹងចំណុចខ្វះខាតមួយនេះ។
ជាមួយការប្តេជ្ញាប្រឹងប្រែងប្រកួតឲ្យអស់ពីសមត្ថភាពក្នុងការស្វែងរកជ័យជម្នះ ម្ចាស់មេដាយសំរឹទ្ធកីឡាស៊ីហ្គេមឆ្នាំ២០១៧នៅម៉ាឡេស៊ីរូបនេះបានបង្ហាញភាពក្លាហានយ៉ាងដូច្នេះថា៖«សម្រាប់ខ្ញុំតាំងពីដើមដល់ឥឡូវមិនដែលខ្លាចកីឡាករណាឡើយសំខាន់ឲ្យតែគេដាក់មកប្រកួតហើយថ្លឺងគីឡូត្រូវ គឺខ្ញុំវ៉ៃទាំងអស់ អត់ខ្វល់ចាញ់ ឬឈ្នះ អត់ដែលញញើត អត់ដែលខ្លាច!»។
នេះជាលើកទី២ហើយ ដែលកីឡាករ ពេជ្រ ម្ទេសខ្មាំង ចូលរួមប្រកួតដណ្តើមខ្សែក្រវាត់លក្ខណៈអន្តរជាតិ ខណៈកាលលើកទី១រូបគេគឺជាម្ចាស់ខ្សែក្រវាត់ទម្ងន់៥៧គីឡូក្រាមប្រចាំកម្មវិធី ដែលរៀបចំដោយស្ថានីយទូរទស្សន៍ភីអិនអិន។ នេះក៏ជាកត្តាមួយផងដែរក្នុងការផ្តល់កម្លាំងចិត្តដល់កីឡាកររូបនេះ សម្រាប់ការចូលរួមប្រកួតលើកទី២នេះ។ តែយ៉ាងណាមកទល់ពេលនេះ ម្ទេសខ្មាំង មិនបានដឹងពីសមាសភាពដៃគូ ដែលត្រូវជួបនៅជុំដំបូងនៅឡើយទេ។
លោក ស្រ៊ឺ ស្រេង ហៅសំណព្វ ប្រធានផ្នែកព័ត៌មានកីឡារបស់ស្ថានីយទូរទស្សន៍ភីអិនអិនអះអាងថា ការប្រកួតរជ្ជកាលទី២នេះនឹងមានការទាក់ទាញ និងជក់ចិត្តជាងរជ្ជកាលទី១ ដ្បិតមានផ្លាស់ប្តូររូបមន្តប្រកួតមួយចំនួន។ ជាពិសេសទាំងកីឡាករកម្ពុជា និងថៃ សុទ្ធសឹងជាកីឡាករមានសមត្ថភាពខ្លាំង ដោយឆ្លងកាត់ការជ្រើសរើសយ៉ាងយកចិត្តទុកដាក់អស់រយៈពេលជាច្រើនខែ។
«កាលពីរដូវកាលមុនយើងមានខ្មែរ៨ថៃ៨ដូចគ្នា តែហាក់មានការផ្អៀងបន្តិចដោយសារមានកីឡាករ ឡៅ ចិត្រា និង ឃឹម ឌីម៉ា តែយ៉ាងណានេះគ្រាន់តែជាការចាប់ផ្តើមដំបូង។ ប៉ុន្តែរដូវកាលទី២នេះមានភាពល្អប្រសើរជាង ត្រង់ថាយើងមានពេលជ្រើសរើសក្នុងការជ្រើសរើសកីឡាករ ព្រោះយើងបានចុះកុងត្រារដូវកាលថ្មីតាំងពី៣ខែមុខ»។ នេះជាការបញ្ជាក់របស់លោក សំណព្វ។
លោកបានបន្ថែមថា សម្រាប់រូបមន្តប្រកួតកីឡាករចាញ់ក្នុងប្រកួតដំបូងគឺធ្លាក់ ពោលគឺគ្មានការប្រកួតវិលជុំ ដើម្បីស្វែងរកកីឡាករឡើងទៅប្រកួតដណ្តើមយកខ្សែក្រវាត់ប្រាក់ដូចរដូវកាលមុនឡើយ។ ការប្រកួតធ្វើឡើងមួយសប្តាហ៍មួយគូ ហើយអ្នកឈ្នះទាំង៨នឹងឡើងទៅប្រកួតដណ្តើមយកខ្សែក្រវាត់ប្រាក់ដោយឆ្លងកាត់ការចាប់ឆ្នោត ខណៈលើកមុនកីឡាករ៤រូប(ខ្មែរពីរថៃពីរ)ត្រូវប្រកួតសន្សំពិន្ទុ ដើម្បីស្វែងរកកីឡាករឡើងទៅប្រកួតដណ្តើមយកខ្សែក្រវាត់ប្រាក់។
បន្ទាប់មកអ្នកឈ្នះខ្សែក្រវាត់ប្រាក់ទាំង៤នឹងឡើងទៅប្រកួតនៅវគ្គពាក់កណ្តាលផ្តាច់ព្រ័ត្រ ហើយអ្នកឈ្នះនឹងទៅប្រកួតនៅវគ្គផ្តាច់ព្រ័ត្រដណ្តើមយកខ្សែក្រវាត់មាសជាមួយប្រាក់រង្វាន់១ម៉ឺនដុល្លារ។ ការផ្លាស់ប្តូររូបមន្តប្រកួតនេះ គឺដើម្បីផ្តល់ឱកាសឲ្យកីឡាករឆាប់បានទៅប្រកួតនៅតាមប៉ុស្តិ៍ផ្សេងៗ ព្រោះភីអិនអិនគ្មានគោលការណ៍ចងជើងកីឡាករឡើយ។ នេះជាការបញ្ជាក់របស់លោក ស្រ៊ឺ ស្រេង។
ជាមួយគ្នានេះលោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ ជំរុញឲ្យកីឡាករខិតខំប្រឹងប្រែងប្រកួតឲ្យអស់ពីសមត្ថភាព ហើយក្រើនរំលឹកឲ្យមន្ត្រីអាជ្ញាកណ្តាលចៅក្រមកាត់ក្តីឲ្យបានត្រឹមត្រូវដោយឈរលើគោលការណ៍ Fair Play។ ការជំរុញនេះ គឺដើម្បីផ្តល់ភាពយុត្តិធម៌ឲ្យកីឡាករ និងបង្កើនភាពទាក់ទាញក្នុងការប្រកួត។
កម្មវិធីប្រដាល់អធិរាជគុនខ្មែរ ISI Palm រជ្ជកាលទី២ប្រព្រឹត្តទៅចាប់ពីថ្ងៃទី៥ ខែមករា ដល់ថ្ងៃទី៣១ ខែឧសភា ឆ្នាំ២០១៩ ដោយមានកីឡាករ១៦រូបចូលរួម(ខ្មែរ៨ថៃ៨)។ កីឡាករកម្ពុជារួមមាន ពេជ្រ ម្ទេសខ្មាំង, វ៉ាន់ វឿន, ម៉ន សាម៉េត, អេលីត ចំរើន, ឃួន ឡាំកូស៊ីន, អេ ណារ័ត្ន, ប៊ុន សុធា និង លៀប រដ្ឋា ខណៈកីឡាករថៃរួមមាន Kamlaiyok, Kompayak, Petchchumphon, Jaophahin, Kompichit, Payakinsee, Nakornloung និង Paingen។
កីឡាករ ម៉ន សាម៉េត បានបាត់បង់ឱកាសឡើងទៅប្រកួតដណ្តើមយកខ្សែក្រវាត់ប្រាក់ ក្រោយប្រកួតចាញ់កីឡាករ Kompichit (ឃុមភីឈិត)ដោយពិន្ទុនៅថ្ងៃទី៥ ខែមករា ឆ្នាំ២០១៩នេះ៕