អន្តរជាតិ
វ័យ៣៣ឆ្នាំ អធិការបតីអូទ្រីស សេបាស្ទៀន ឃើស ក្លាយជាមេដឹកនាំក្មេងជាងគេលើលោក អធិការបតីអូទ្រីស សេបាស្ទៀន ឃើស ក្លាយជាមេដឹកនាំពិភពលោកក្មេងជាងគេម្ដងទៀត។ រូបភាព AFP
× លោក សេបាស្ទៀន ឃើស (Sebastian Kurz) នៅថ្ងៃទី៧ ខែមករា បានក្លាយជាមេដឹកនាំក្មេងជាងគេបំផុតលើពិភពលោកជាថ្មីម្ដងទៀត ខណៈស្បថចូលកាន់តំណែងជាអធិបការបតីអូទ្រីស។ ក្នុងវ័យ៣៣ឆ្នាំ លោក ឃើស ប្រធានបក្សប្រជាជនអូទ្រីស អង្គុយកៅអីអធិការបតីនេះជាលើកទីពីរក្នុងរដ្ឋាភិបាលចម្រុះជាមួយបក្សបៃតង។ លោក ឃើស ក៏ឈរនាំមុខនាយករដ្ឋមន្ត្រីហ្វាំងឡង់ អ្នកស្រី សាន់ណា ម៉ារីន (Sanna Marin) ជាប្រមុខរដ្ឋាភិបាលក្មេងជាងគេលើលោក។
បក្សប្រជាជនរបស់លោក សេបាស្ទៀន ឃើស និងបក្សបៃតង បានឈានដល់ការបង្កើតរដ្ឋាភិបាលចម្រុះមួយ ក្រោយការចរចាជាច្រើនសប្ដាហ៍បន្ទាប់ពីការបោះឆ្នោតមុនអាណត្តិក្នុងខែកញ្ញាកន្លងទៅ។ ទាំងបក្សប្រជាជន ទាំងបក្សបៃតង សុទ្ធតែបានសំឡេងគាំទ្រច្រើនដូចគ្នា តែមិនគ្រប់គ្រាន់ដើម្បីបង្កើតរដ្ឋាភិបាលខ្លួនឯងឡើយ។
រដ្ឋាភិបាលចម្រុះថ្មី ដែលត្រូវបានសារព័ត៌មានអូទ្រីសហៅថា សម្ព័ន្ធភាពកម្រ និងមិនអាចកើតឡើង នឹងស្បថចូលកាន់តំណែងនៅថ្ងៃទី៧ ខែមករានេះ។ លោក ឃើស នឹងធ្វើជាអធិបការបតីជាលើកទីពីរផងដែរ។ ការណ៍នេះ នឹងធ្វើឲ្យលោក ឃើស វ័យ៣៣ឆ្នាំ ក្លាយជាមេដឹកនាំជាប់ឆ្នោតក្មេងជាងគេបំផុតលើពិភពលោក។ លោកជាប់ឆ្នោតជាអធិការបតីអូទ្រីសលើកដំបូងពីឆ្នាំ២០១៧ ដល់ឆ្នាំ២០១៩ ដែលកាលនោះ ក៏ជាប់ឈ្មោះជាមេដឹកនាំវ័យក្មេងមួយដែរ។
ក្នុងជួររដ្ឋាភិបាលថ្មី បក្សលោក ឃើស នឹងមានរដ្ឋមន្ត្រី១០នាក់ ឯបក្សបៃតងមាន៤ ក្នុងប្រធានបក្សលោក Werner Kogler នឹងទទួលបានតំណែងអធិការបតីរងផងដែរ។ ក្នុងចំណោមសមាជិកគណៈរដ្ឋមន្ត្រីទាំងអស់ សមាសភាពច្រើនជាងពាក់កណ្ដាល គឺជាស្ត្រីរាប់ទាំងរដ្ឋមន្ត្រីការពារជាតិផងដែរ ហើយមានអាយុចន្លោះ៣០ឆ្នាំទៅ៤០ឆ្នាំ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
គោលនយោបាយរបស់រដ្ឋាភិបាលចម្រុះថ្មី បានច្របាច់បញ្ចូលរវាងការជំរុញឲ្យអូទ្រីសក្លាយជាប្រទេសគ្មាកាបូននៅឆ្នាំ២០៤០ ដែលនេះជាគោលការណ៍របស់បក្សបៃតង និងការររឹតបន្តឹងវិធានការប្រឆាំងជនអន្តោប្រវេសន៍ដែលជាចំណុចស្នូលរបស់បក្សប្រជាជនអូទ្រីស។ ការចាប់ដៃរបស់បក្សនយោបាយពីរដែលមាននិន្នាការស្ទើរតែផ្ទុយគ្នាស្រឡះបែបនេះ ក៏ត្រូវបានមើលឃើញថា ជាគម្រូសម្រាប់ប្រទេសអឺរ៉ុបឯទៀតផងដែរ។
សម្រាប់រយៈពេលអាណត្តិ៥ឆ្នាំទៅមុខ លោក ឃើស សន្យាចំពោះប្រជាជនអូទ្រីសថា នឹងដឹកនាំរដ្ឋាភិបាលមួយដែលមានការរួបរួម៕
Tag:
អូទ្រីស
Sebastian Kurz
អឺរ៉ុប
© រក្សាសិទ្ធិដោយ thmeythmey.com