កីឡាអន្តរជាតិ
អន្តរជាតិ
ដើម្បីគ្រួសារ De Rossi សម្រេចចូលនិវត្តន៍ពីអាជីពកីឡាករបាល់ទាត់ នៅអាយុ៣៦ឆ្នាំ
× Daniele De Rossi វីរបុរសក្រុម AS Roma បានចាកចេញពីក្រុម Boca Juniors នៃលីគកីឡាបាល់ទាត់កំពូលអាហ្សង់ទីន និងប្រកាសចូលនិវត្តន៍ពីកីឡាករបាល់ទាត់អាជីពតែម្តង។ ហេតុផលចម្បងនៃការចូលនិវត្តន៍នេះ ព្រោះ Rossi ចង់នៅជិតប្រពន្ធកូនឲ្យបានច្រើន។
Boca បាននាំយក De Rossi ដោយគ្មានតម្លៃផ្ទេរកាលពីខែកក្កដា ឆ្នាំ២០១៩ បន្ទាប់ពីបុរសជនជាតិអ៊ីតាលីរូបនេះផុតកិច្ចសន្យាជាមួយ Roma ជាក្រុមដំបូងដែលរូបគេប្រកបអាជីពអស់រយៈពេល ១៨ រដូវកាល។
អតីតខ្សែបម្រើក្រុមជម្រើសជាតិអ៊ីតាលី វ័យ៣៦ឆ្នាំរូបនេះ បានបង្ហាញខ្លួនសម្រាប់ក្រុមយក្សក្នុងក្រុង Buenos Aires តែចំនួន៦ប្រកួតប៉ុណ្ណោះ ពោលគឺរូបគេបានលុបចោលកិច្ចសន្យារបស់ខ្លួនជាមួយ Boca ហើយវិលត្រឡប់ទៅកាន់ប្រទេសអ៊ីតាលីវិញដើម្បីជួបជុំគ្រួសារ។
Rossi បានពន្យល់ពីការសម្រេចចិត្តរបស់ខ្លួនក្នុងសន្និសីទសារព័ត៌មាននៅថ្ងៃទី៦ ខែមករាថា៖«គ្មាននរណាម្នាក់នៅក្នុងគ្រួសាររបស់ខ្ញុំមានបញ្ហាសុខភាពទេ។ ខ្ញុំគ្រាន់តែត្រូវការនៅជាមួយកូនស្រី និងក្រុមគ្រួសាររបស់ខ្ញុំ។ នេះជាមូលហេតុ និងជាហេតុផលត្រឹមត្រូវសម្រាប់ខ្ញុំនៅត្រឹមអាយុនេះ។ ខ្ញុំមានវ័យ ៣៦ ឆ្នាំហើយ វាមិនដូចកាលនៅ២៥ ឆ្នាំទៀតនោះទេ»។
De Rossi ដែលបង្ហាញខ្លួនចំនួន ៦១៦ប្រកួតសម្រាប់ Roma បន្ថែមថានៅពេលរូបគេជូនដំណឹងដល់ថ្នាក់លើក្លិប Boca ពួកគេបានស្នើឲ្យ Rossi ចំណាយពេលពីរបីថ្ងៃដើម្បីគិតពីការចូលនិវត្តន៍នេះឡើងវិញ។ ប៉ុន្តែយ៉ាងណាក៏ដោយ អ្វីៗគឺមិនអាចផ្លាស់ប្តូរឡើយ។
«ខ្ញុំបានលេងឲ្យក្រុមចំនួនពីរដែលខ្ញុំស្រឡាញ់ក្នុងអាជីព។ អ្វីៗទាំងអស់នឹងស្ថិតក្នុងការចងចាំ និងក្នុងបេះដូងរបស់ខ្ញុំ។ ជីវិតជាកីឡាករបាល់ទាត់បានបញ្ចប់ហើយ»៕
Tag:
Daniele De Rossi
Boca Juniors
ចូលនិវត្តន៍
© រក្សាសិទ្ធិដោយ thmeythmey.com