បទ ពាក្យ៧ ប៉ាកកាខ្មៅ
យក្សធំយក្សតូចខូចដូចគ្នា អាងកម្លាំងមារមានអាវុធ
កងទ័ពពូកែហ៊ានប្រយុទ្ធ មិនព្រមស្មុតទ្រុឌមុខសត្រូវ។
ក្អេងក្អាងអុងអាត់ចាត់ចែងចង បំពេញបំណងដើរខុសផ្លូវ
ខ្វះខ្វែងគំនិតមិនចែចូវ មើលគេក្នុងផ្លូវសត្រូវជាប់។
គិតតែក្រុមឯងឥតក្រែងក្រាញ បណ្តាក់បណ្តាញទីតាំងទ័ព
មីស៊ីលឆ្លងទ្វីបនាំក្បាលគ្រាប់ កំញើញគ្នាជាប់មិនព្រមចាញ់។
ធំថាអ្នកខ្លាំងមានតែយើង ព្រោះមានកាំភ្លើងអាចផ្លោងបាញ់
យានបំបាំងកាយងាយប្រមាញ់ គ្មានពាក្យថាចាញ់សត្រូវឡើយ។
តូចតាំងតថាកុំមកប៉ះ គ្រោះក្រែលក្រៃក្រាស់ច្បាស់គ្មានស្បើយ
តូចខ្លាំងខ្លួនខ្លឹមគឺយើងហើយ អាយក្សធំអើយកុំចង់ល្បង។
បើល្បងល្បិចល្បាតអួតឲ្យល្បី ក្រញិកក្រញីឈាមត្រូវសង
យើងមិនធ្លាប់ញ៉មនរណាម្តង ប៉ះដៃភ្នែកសងដៃភ្នែកវិញ។
សង្គ្រាមយក្សដាលក្រាលឈាមជាក់ យក្សអើយឆាប់ភ្ញាក់ឈប់ម្នោម្នេញ
រួមស្រាយជម្លោះកុំជម្រេញ ចរចាគ្នាវិញលោកសុខស្ងប់៕