ជប៉ុនផ្តល់ថវិកាជាង៣៦ម៉ឺនដុល្លារដល់កម្ពុជា សម្រាប់គម្រោងផ្លូវថ្នល់ មន្ទីរពេទ្យ និងទឹកស្អាត

ជាតិ

សង្គមជាតិ

ជប៉ុនផ្តល់ថវិកាជាង៣៦ម៉ឺនដុល្លារដល់កម្ពុជា សម្រាប់គម្រោងផ្លូវថ្នល់ មន្ទីរពេទ្យ និងទឹកស្អាត

09, Jan 2020 , 8:59 am

រូបភាព

លោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំប្រទេសកម្ពុជា និងតំណាងការិយាល័យសុខាភិបាលស្រុកប្រតិបត្តិល្វាឯម ខេត្តកណ្តាល ដែលមានវត្តមាននៅក្នុងការផ្តល់ថវិកា នាថ្ងៃទី៨ ខែមករា ឆ្នាំ២០២០

ដោយ:

ភ្នំពេញ៖ រដ្ឋាភិបាលជប៉ុន បានផ្ដល់ថវិកាជាង៣៦ម៉ឺនដុល្លារអាមេរិក សម្រាបជួយដល់គម្រោងទឹកស្អាត មន្ទីរពេទ្យ និងផ្លូវថ្នល់កម្ពុជា។ លោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំប្រទេសកម្ពុជា និងតំណាងអង្គភាពទទួលជំនួយទាំងបី បានចុះហត្ថលេខារួមគ្នា នាថ្ងៃទី ៨ ខែមករា។

ក្នុងចំណោមថវិកាជាង៣៦ម៉ឺនដុល្លារនេះ ជប៉ុននឹងផ្តល់ជូនឲ្យមន្ទីរសាធារណការ និងដឹកជញ្ជូនខេត្តប៉ៃលិន ប្រមាណជាង១៨ម៉ឺនដុល្លារអាមេរិក សម្រាប់គម្រោងកែលម្អផ្លូវថ្នល់ប្រវែង៦,៣០០ម៉ែត្រ ក្នុងសង្កាត់អូរតាវ៉ៅ ខេត្តប៉ៃលិន។ ថវិកាប្រមាណ៩ម៉ឺនដុល្លារទៀត ជប៉ុនផ្តល់ឲ្យការិយាល័យសុខាភិបាលស្រុកប្រតិបត្តិល្វាឯម ខេត្តកណ្តាល សម្រាប់សាងសង់អគារសម្រាកពេទ្យនៅមណ្ឌលសុខភាពទឹកឃ្លាំង ខេត្តកណ្តាល និងថវិកាចំនួនប្រមាណ៩ម៉ឺនដុល្លារ សម្រាប់សាងសង់ស្ថានីយផលិតទឹកស្អាតខ្នាតតូចនៅក្នុងឃុំចំនួន៧ ក្នុងខេត្ត២ នាទិសពាយ័ព្យ ដែលផ្តល់ឲ្យនាយកប្រតិបត្តិនៃទឹកស្អាត១០០១។

លោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំប្រទេសកម្ពុជា បានលើកឡើងនៅក្នុងការផ្តល់ជំនួយដល់កម្ពុជាថា ប្រទេសកម្ពុជាក្នុងរយៈពេលប៉ុន្មានឆ្នាំចុងក្រោយនេះ មានការអភិវឌ្ឍយ៉ាងឆាប់រហ័ស។ ដ្បិតមានការអភិវឌ្ឍយ៉ាងលឿនពិតមែន ប៉ុន្តែជប៉ុន នៅតែមើលឃើញថា កម្ពុជាក៏នៅមានបញ្ហាប្រឈមមួយចំនួនដែលត្រូវដោះស្រាយ ដើម្បីលើកកម្ពស់គុណភាពជីវភាពរស់នៅរបស់ប្រជាជនខ្មែរ។

លោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំប្រទេសកម្ពុជា និងលោក ហ្វេ្រដឺរិក ឌុយប័រ នាយកប្រតិបត្តិនៃទឹកស្អាត១០០១ ក្នុងកិច្ចចុះហត្ថលេខាផ្តល់ថវិកាជាង៩ម៉ឺនដុល្លារ

តំណាងអង្គភាពទទួលជំនួយសម្រាប់អនុវត្តគម្រោងទាំងបីនេះ សុទ្ធតែអះអាងថា ថវិកាគម្រោងនេះ នឹងផ្ដល់ផលប្រយោជន៍ ដល់ប្រជាជនកម្ពុជានៅតាមមូលដ្ឋាន។ លោក អ៊ាត សារ៉ាត់ ប្រធានមន្ទីរសាធារណការ និងដឹកជញ្ជូន ខេត្តប៉ៃលិន បានបញ្ជាក់ថា ជំនួយរបស់ជប៉ុននេះ នឹងជួយសម្រួលដល់ការធ្វើដំណើររបស់ពលរដ្ឋ សិស្សានុសិស្ស និងការដឹកជញ្ជូនកសិផលទៅកាន់ទីផ្សារ តាមរយៈការស្ថាបនាផ្លូវ ។ ជាពិសេសឆ្លុះបញ្ចាំងពីសកម្មភាពការអភិវឌ្ឍនៅក្នុងខេត្តប៉ៃលិន។

ដោយឡែកគម្រោងសាងសង់អគារសម្រាកនៅមន្ទីរពេទ្យ ដែលមាននៅក្នុងមណ្ឌលសុខភាពទឹកឃ្លាំង ក្នុងខេត្តកណ្តាលនេះ នឹងជាសមិទ្ធផលមួយដែលផ្តល់សេវាសុខាភិបាលដែលប្រកបដោយគុណភាព និងមានប្រសិទ្ធិភាព ដែលអាចកាត់បន្ថយការចំណាយ និងអត្រាការស្លាប់របស់ប្រជាជន។ នេះជាការបញ្ជាក់របស់លោក អ៊ូ ច័ន្ទតារាមុនី ប្រធានការិយាល័យសុខាភិបាលស្រុកប្រតិបត្តិល្វាឯម ដែលទទួលបានថវិកាពីជប៉ុននេះ។

មិនខុសពីតំណាងអង្គភាពទាំងពីរខាងលើនេះទេ លោក ហ្វ្រេដឺរិក ឌុយប័រ នាយកប្រតិបត្តិនៃទឹកស្អាត១០០១ បានអះអាងថា ស្ថានីយទឹកស្អាតនេះអាចនឹងផ្គត់ផ្គង់ទឹកដល់ពលរដ្ឋប្រមាណ២ម៉ឺននាក់ និងសិស្សានុសិស្សចំនួន៧ពាន់នាក់ផងដែរ។

បើតាមលោកឯកអគ្គរាជទូតជប៉ុនប្រចាំប្រទេសកម្ពុជា រាជរដ្ឋាភិបាលជប៉ុននឹងបន្តផ្តល់ជំនួយ និងរួមចំណែកក្នុងដោះស្រាយបញ្ហាប្រឈមតាមរយៈគ្រោងការណ៍សហប្រតិបត្តិការសេដ្ឋកិច្ច និងអភិវឌ្ឍន៍ផ្សេងៗ។

សូមបញ្ជាក់ថា កម្ពុជាទទួលបានជំនួយពីជប៉ុនតាំងពីឆ្នាំ១៩៩១ ដែលគិតជាទឹកប្រាក់ប្រមាណ៦០លានដុល្លារអាមេរិក។ ទឹកប្រាក់ដែលជប៉ុនបានផ្តល់ឲ្យកម្ពុជានោះ គឺសម្រាប់អភិវឌ្ឍ និងស្ថាបនាប្រទេសកម្ពុជាឡើងវិញលើគម្រោងទាំង៦១៨៕

លោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំប្រទេសកម្ពុជា និងលោក អ៊ាត សារ៉ាត់ ប្រធានមន្ទីរសាធារណការ និងដឹកជញ្ជូនខេត្តប៉ៃលិន ក្នុងកិច្ចចុះហត្ថលេខាផ្តល់ថវិកាជិត១៩ម៉ឺនដុល្លារ

លោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំប្រទេសកម្ពុជា និងលោក អ៊ូ ច័ន្ទតារាមុនី ប្រធានការិយាល័យសុខាភិបាលស្រុកប្រតិបត្តិល្វាឯម ក្នុងកិច្ចចុះហត្ថលេខាផ្តល់ថវិកាជាង៩ម៉ឺនដុល្លារ