អន្តរជាតិ
ប្រធានាធិបតី ដូណាល់ ត្រាំ ថ្លែងជាសាធារណៈនៅសេតវិមានពីបញ្ហាអ៊ីរ៉ង់។ រូបភាព AFP
×![]()
ដោយ: តន ចាន់រិទ្ធារ៉ា
ប្រធានាធិបតីអាមេរិក ដូណាល់ ត្រាំ នៅថ្ងៃទី៨ ខែមករា បានទាញអាមេរិកចេញពីសង្គ្រាមជាមួយអ៊ីរ៉ង់ ដោយបានប្រកាសមិនវាយប្រហារសងសឹកអ៊ីរ៉ង់ឡើយ ទោះជាអ៊ីរ៉ង់បាញ់មីស៊ីលដាក់បន្ទាយទ័ពអាមេរិកឈេជើងនៅអ៊ីរ៉ាក់ក្ដី។ ប៉ុន្តែអាមេរិក នឹងដាក់ទណ្ឌកម្មថែមទៀតលើអ៊ីរ៉ង់។ មិនមានយោធាអាមេរិក រងគ្រោះក្នុងការបាញ់មីស៊ីលនេះឡើយ ដោយមន្ទីរបញ្ចកោណអះអាងថា ទទួលបានព័ត៌មានជាមុន ទើបអាចរៀបចំការការពារខ្លួនបានបែបនេះ។
ក្នុងការថ្លែងតាមកញ្ចក់ទូរទស្សន៍នៅថ្ងៃទី៨ ខែមករា ប្រធានាធិបតី ដូណាល់ ត្រាំ អះអាងជាថ្មីថា យោធាអាមេរិក មិនមានរបួស ឬបាត់បង់ជីវិតក្នុងការវាយប្រហារដោយមីស៊ីលរបស់អ៊ីរ៉ង់ដាក់មូលដ្ឋានទ័ពអ៊ីរ៉ាក់ដែលយោធាអាមេរិកឈរជើងឡើយ។ លោក ត្រាំ ទទួលស្គាល់ថា ការផ្លោងមីស៊ីលរបស់អ៊ីរ៉ង់ដែលមានគោលដៅសងសឹកឲ្យឧត្តមសេនីយ៍ Qassem Soleimani នោះ ពិតជាបានបង្កការខូចខាតខ្លះមែនក្នុងបន្ទាយទាំងពីរដែលរងគ្រាប់មីស៊ីល។
ពីសេតវិមាន លោក ត្រាំ ដែលឈរអមដោយអនុប្រធានាធិបតី ម៉ៃ ផេន ប្រមុខការទូត រដ្ឋមន្ត្រីការពារជាតិ និងប្រមុខកងទ័ពអាមេរិកផងនោះ អះអាងថា អ៊ីរ៉ង់ ហាក់ដកថយពីការឈានទៅរកជម្លោះពេញបន្ទុក ខណៈមីស៊ីលទាំងជាង១០គ្រាប់នោះ មិនបានបង្កគ្រោះអ្វីឡើយ។ ទំនងដោយសារការយល់ឃើញបែបនេះ លោក ត្រាំ មិនបានចេញបញ្ជាឲ្យវាយបកវិញឡើយ តែប្រកាសពីការដាក់ទណ្ឌកម្មថ្មីលើរបបដឹកនាំទីក្រុងតេហេរ៉ង់។
«ការពិតដែលយើងមានយោធា និងយុទ្ធោបករណ៍អស្ចារ្យ មិនមែនមានន័យថា ត្រូវតែប្រើឡើយ។ យើងមិនចង់ប្រើវាយឡើយ។ ភាពខ្លាំងរបស់អាមេរិក ទាំងយោធា និងសេដ្ឋកិច្ច ជាការបំភ័យមួយដ៏ល្អបំផុត។» នេះជាការបញ្ជាក់របស់លោក ត្រាំ ដែលចាត់ទុកអ្វីដែលលោកហៅថា ការដកថយរបស់អ៊ីរ៉ង់ ជារឿងល្អសម្រាប់ភាគីទាំងអស់ និងសម្រាប់ពិភពលោកផងដែរ។
សម្រាប់មន្ទីបញ្ចកោណវិញ ប្រព័ន្ធព្រមានទុកមុន មានស្នាដៃធំក្នុងការបញ្ចៀសគ្រោះថ្នាក់លើកនេះ។ បើតាមទីភ្នាក់ងារព័ត៌មាន AFP ប្រព័ន្ធព្រមានទុកមុននេះ បានចាប់សញ្ញាមីស៊ីល ហើយក៏ជូនដំណឹងឲ្យយោធាទាំងអស់ជ្រកនៅកន្លែងសុវត្ថិភាព។ លើសពីនោះ អ៊ីរ៉ាក់ ក៏ទំនងជាផ្ដល់ព័ត៌មានទាក់ទងការបាញ់នេះឲ្យយោធាអាមេរិកផងដែរ ព្រោះអ៊ីរ៉ង់ក៏បានប្រាប់អ៊ីរ៉ាក់ជាមុនពីគម្រោងរបស់ខ្លួនផងដែរ ទើបអាមេរិកអាចចាត់វិធានការបង្ការបាន។
មេដឹកនាំអាមេរិក ក៏ឆ្លៀតនិយាយដល់នុយក្លេអ៊ែរផងដែរ។ លោក ត្រាំ បានប្រកាសជាថ្មីថា នឹងមិនអនុញ្ញាតឲ្យអ៊ីរ៉ង់មាននុយក្លេអ៊ែរឡើយ។ លោក បានទាមទារឲ្យមហាអំណាចឯទៀតដែលជាហត្ថលេខីនៃកិច្ចព្រមព្រៀងឆ្នាំ២០១៥ ឲ្យដើរចេញដូចអាមេរិក ហើយបង្កើតកិច្ចព្រមព្រៀងថ្មីមួយវិញ។ ការដើរចេញនេះហើយ ដែលជាផ្នែកមួយនៃភាពតានតឹងដូចសព្វថ្ងៃ បើទោះជារដ្ឋហត្ថលេខីផ្សេងទៀតយល់ថា អ៊ីរ៉ង់បានអនុវត្តតាមកិច្ចព្រមព្រៀងឆ្នាំ២០១៥ ក្ដី។ ទីក្រុងតេហេរ៉ង់ បដិសេធការចរចាណាមួយ៕
Tag:
អាមេរិក
អ៊ីរ៉ង់
ដូណាល់ ត្រាំ
© រក្សាសិទ្ធិដោយ thmeythmey.com
