សៀមរាប៖ រដ្ឋាករទឹកស្វ័យតសៀមរាប បានប្រកាសពីគម្រោងស្ថាបនារោងចក្រផលិតទឹកស្អាតដ៏ធំមួយកន្លែងនៅសង្កាត់ជ្រាវ ដែលទាញប្រភពទឹកពីបឹងទន្លេសាប និងមានសមត្ថភាពផលិតទឹកស្អាតបានចំនួន៦០,០០០ម3/ថ្ងៃ។ ជាមួយនឹងវត្តមានរោងចក្រផលិតទឹកស្អាតដ៏ធំដែលជាគម្រោងឥណទានពីរាជរដ្ឋាភិបាលជប៉ុនតាមរយៈអង្គការ JICA នេះ រដ្ឋាករទឹកស្វ័យតរំពឹងថា នឹងអាចឱ្យក្រុងសៀមរាបមានទឹកប្រើប្រាស់គ្រប់គ្រាន់នៅឆ្នាំ២០២៣។
ព័ត៌មានលម្អិត សូមស្ដាប់បទយកការណ៍ដែលរៀបរៀងដោយអ្នកនាង អ៊ីសា រ៉ហានី ពីខេត្តសៀមរាបដូចតទៅ
ទឹក គឺមានសារសំខាន់សម្រាប់ការរស់នៅ។ ការប្រើប្រាស់ទឹកស្អាត គឺកាន់តែមានសារសំខាន់ ដើម្បីទ្រទ្រង់រាងកាយរបស់មនុស្ស និងសត្វ។ ខេត្តសៀមរាប ដែលជាទីក្រុងដែលមានកំណើនសេដ្ឋកិច្ចលឿន ក៏កំពុងមានតម្រូវការទឹកស្អាតនេះកាន់តែខ្លាំងដែរ។ តាមស្ថិតិ បច្ចុប្បន្នក្រុងសៀមរាបមានប្រជាជនរស់នៅប្រមាណ ៤៣ពាន់គ្រួសារ ស្មើនឹងជាង ២៣ម៉ឺននាក់។ ចំនួននេះ ធ្វើឱ្យមានតម្រូវការទឹកស្អាតប្រើប្រាស់ប្រចាំថ្ងៃប្រមាណ ៦ម៉ឺន ម៣/ថ្ងៃ ប៉ុន្តែការផ្គត់ផ្គង់ទឹកស្អាតសព្វថ្ងៃនេះមានមិនដល់៥០ភាគរយឡើយ។
អគ្គនាយករដ្ឋាករទឹកស្វ័យតសៀមរាប លោក ឃុត វុទ្យារិទ្ធ បានលើកឡើងថា ការផ្គត់ផ្គង់ទឹកស្អាតក្នុងក្រុងសៀមរាបសព្វថ្ងៃមានប្រមាណ៣៥ភាគរយប៉ុណ្ណោះ។ នៅក្នុងខែធ្នូ ឆ្នាំ២០១៩ ស្ថាប័ននេះទើបសម្ពោធដាក់ឱ្យប្រើប្រាស់នូវរោងចក្រថ្មីក្រោមឥណទានពីទីភ្នាក់ងារបារាំងសម្រាប់ការអភិវឌ្ឍ (AFD) ដែលមានសមត្ថភាពផលិតទឹកស្អាត ១៥,០០០ម៣/ថ្ងៃ ដែលទាញទឹកពីបារាយណ៍ខាងលិច បន្ថែមពីរោងចក្រចាស់ដែលមានសមត្ថភាពដូចគ្នា តែទាញប្រភពទឹកក្រោមដី។ រោងចក្រទាំងពីរនេះមានទីតាំងស្ថិតនៅសង្កាត់ទឹកវិល ឬនៅប៉ែកខាងលិចក្រុងសៀមរាប។
ផ្អែកលើស្ថានភាពសព្វថ្ងៃនេះ រដ្ឋាករទឹកស្វ័យតសៀមរាបមិនអាចផ្គត់ផ្គង់ទឹកស្អាតដល់ប្រជាពលរដ្ឋក្នុងក្រុងសៀមរាបបានគ្រប់គ្រាន់ទេ ប៉ុន្តែតាមការបញ្ជាក់ពីអគ្គនាយក នៅពេលឆាប់ខាងមុខនេះ ក្នុងគម្រោងឥណទានពីជប៉ុនតាមរយៈអង្គការ JICA គ្រោងនឹងសង់រោងចក្រខ្នាតធំមួយនៅសង្កាត់ជ្រាវ ដែលមានសមត្ថភាពផលិតទឹកស្អាតបាន ៦ម៉ឺនម៣/ថ្ងៃ។ ការណ៍នេះ នឹងអាចឱ្យរដ្ឋាករទឹកស្វ័យតខេត្តពន្លឿនការសម្រេចគោលដៅផ្គត់ផ្គត់ទឹកស្អាតបាន១០០ភាគរយនៅឆ្នាំ២០២៣ ដែលក្រសួងឧស្សាហកម្ម និងសិប្បកម្ម កំណត់ឱ្យរដ្ឋាករស្វ័យតទឹកទាំងអស់ ត្រូវផ្គត់ផ្គង់១០០ភាគរយត្រឹមឆ្នាំ២០២៥។ រោងចក្រដែលមានសមត្ថភាពខ្ពស់នេះ ទាញប្រភពទឹកពីបឹងទន្លេសាប។
ដ្បិតថា រោងចក្រថ្មីនេះមានសមត្ថភាពផលិតទឹកស្អាតខ្ពស់ក៏ពិតមែន តែការចំនាយមានចំនួនច្រើនទៅតាមនោះដែរ។ ដោយសាររយៈចម្ងាយបញ្ជូនឆ្ងាយ និងការសម្អាតមានច្រើនដំណាក់កាល បញ្ជូនតាមបំពងបង្ហូរចំនួន២ខ្សែប្រវែង ១៨គីឡូម៉ែត្រ និងកញ្ចប់បណ្ដាញចែកចាយទាំងមូលសរុប ១៦៦គីឡូម៉ែត្រ។ល។
ទាក់ទងនឹងបញ្ហាទឹកស្អាតនេះ ប្រជាពលរដ្ឋមួយចំនួនធំមានការងឿងឆ្ងល់ពីភាពយឺតយ៉ាងពង្រីករោងចក្រផលិតទឹកស្អាតឱ្យសមស្របទៅនឹងកំណើនប្រជាជនរស់នៅក្នុងក្រុងទេសចរណ៍មួយនេះ ខណៈដែលសៀមរាបមានទាំងបឹងទន្លេសាប និងស្ទឹង។ ករណីនេះ លោក ឃុត វុទ្យារិទ្ធ ពន្យល់ថា ការយកប្រភពទឹកមិនមែនចេះតែយកទេ គឺមានការសិក្សាត្រឹមត្រូវ ពិសេសគឺប្រភពទឹកយូរអង្វែង។ ចំណែកបឹងទន្លេសាបគឺមានចម្ងាយឆ្ងាយពេក ដែលធ្វើឱ្យការផលិតត្រូវចំនាយច្រើន ទាំងតម្លៃអគ្គិសនីផង មុននឹងរុញបញ្ជូនតាមបណ្ដាញផ្ទះប្រជាជន។ ចំណែកស្ទឹងសៀមរាប នារដូវប្រាំងអាចផ្គត់ផ្គង់ទឹកបានតិចតួច។
«ការសិក្សាពីការធ្វើប្រព័ន្ធប្រព្រឹត្តិកម្មទឹកស្អាត គឺត្រូវគិតប្រភពជាចម្បង ហើយប្រភពនោះគឺស្រង់យកទិន្នន័យពី៣០ទៅ៥០ឆ្នាំមុន តើប្រភពអាចរីកស្ងួត យើងមិនអាចប្រថុយប្រថានយកប្រភពទឹកណាមួយ ហើយនៅពេលណាមួយរីងស្ងួតប្រភពអស់ បានទឹកឯណាផ្គត់ផ្គង់ឱ្យប្រជាពលរដ្ឋ? នៅសៀមរាបយើងមានប្រភពទឹកច្រើនមែន ដូចជាស្ទឹង ទឹកក្រោមដី បារាយណ៍ ទន្លេសាប តែយើងបានសិក្សាទៅឃើញថា ស្ទឹងសៀមរាបនៅខែប្រាំងផ្តល់នូវបរិមាណទឹកតិចតួច ដែលមិនអាចយកមកផ្គត់ផ្គង់ឱ្យរោងចក្រផលិតទឹកស្អាតទេ, ប្រភពក្រោមដីមានកំណត់ អាជ្ញាធរជាតិអប្សរាអនុញ្ញាតឱ្យយើងតែ ១៥,០០០ម២/ថ្ងៃ មិនឱ្យយកថែមទេ បឹងទន្លេសាបច្រើនមែន តែរដូវប្រាំង គុណភាពមិនសូវល្អ ទាមទារការសម្អាត ហើយការសម្អាតត្រូវការថវិកាច្រើន»។ នេះជាការបញ្ជាក់ពីលោក ឃុត វុទ្យារិទ្ធ។
ទឹកក្រោមដី គឺជាប្រភពដែលមាននិរន្តរភាព និងមានគុណភាពល្អ។ បច្ចុប្បន្ន រដ្ឋាករទឹកស្វ័យតសៀមរាបមានអណ្ដូងទឹកក្រោមដីដែលស្ថិតនៅសង្កាត់ទឹកវិលចំនួន ១៥អណ្ដូង។ ការស្នើសុំជីកអណ្ដូងក្រោមដីបន្ថែម ត្រូវបានអាជ្ញាធរជាតិអប្សរាបដិសេធ ដ្បិតថាវាមានហានិភ័យដល់សំណង់ប្រាសាទក្នុងរមណីយដ្ឋានអង្គរ។ ហេតុដូច្នេះហើយ ទើបប្រភពទឹកក្រោយៗដែលទាញយកមកផលិតទឹកស្អាត គឺយកពីបារាយណ៍ខាងលិច និងបឹងទន្លេសាប។ ចំណុចនេះ លោកអគ្គនាយករដ្ឋាករទឹកប្រាប់ថា អាជ្ញាធរជាតិអប្សរានិងរដ្ឋាករទឹកស្វ័យតសៀមរាបមានអណ្ដូងចំនួន១០ក្នុងតំបន់ប្រាសាទ សម្រាប់ទុកតាមដានស្ថានភាពទឹក និងដឹងពីហានិភ័យនានា។
ជាមួយនឹងការពង្រីកសមត្ថភាពសង់រោងចក្របន្ថែមហើយនោះ រដ្ឋាករទឹកស្វយ័តសៀមរាបក៏បង្ហាញពីគោលការណ៍ពង្រីកបណ្ដាញភ្ជាប់ទៅប្រជាជនផងដែរ។ លោក ឃុត វុទ្យារិទ្ធ ប្រាប់ថា ស្ថាប័នរបស់លោកកំពុងប្រឹងប្រែងភ្ជាប់បណ្ដាញទឹកស្អាតដល់ផ្ទះប្រជាពលរដ្ឋយ៉ាងយកចិត្តទុកដាក់ ដើម្បីឱ្យពលរដ្ឋបានប្រើប្រាស់ទឹកស្អាត និងមានគុណភាពល្អ។ លោកបន្តថា ពលរដ្ឋជាបន្តបន្ទាប់បានដាក់ពាក្យភ្ជាប់បណ្ដាញទឹកស្អាត ក្រោយពីមានការផ្សព្វផ្សាយ និងយល់ពីសារសំខាន់ក្នុងការប្រើប្រាស់សម្រាប់សុខភាពក្នុងគ្រួសារ។ រដ្ឋាករទឹកមិនបានកំណត់ទីតាំងតបណ្ដាញទេ គឺផ្តោតជាសំខាន់ទៅតំបន់ដែលមានប្រជាជនរស់នៅច្រើន និងមានបំពងមេបញ្ជូនទៅដល់។
ក្រោយពីបង្ហាញមហ្ឆិតា និងការសម្រេចតបណ្ដាញទឹកស្អាតប្រើប្រាស់ត្រឹមឆ្នាំ២០២៣ហើយនោះ អគ្គនាយករដ្ឋាករទឹកស្វ័យតសៀមរាប ក៏បានសរសើរពីគុណភាពទឹកស្អាតក្នុងខេត្តនេះដែរ។ យោងតាមការសិក្សារបស់ទីភ្នាក់ងារបារាំងសម្រាប់ការអភិវឌ្ឍន៍ AFD ទឹកស្អាតនៅសៀមរាបមានគុណភាពល្អជាងគេនៅទូទាំងប្រទេសកម្ពុជា។ លោក ឃុត វុទ្យារិទ្ធ ប្រាប់ថា លោកផ្ទាល់ក៏ពិសារទឹកនេះដែរ ដោយសារមានទំនុកចិត្តខ្ពស់។ ក្នុងនាមជាប្រតិបត្តិករមួយរូប លោកអគ្គនាយកក៏ស្នើដល់ប្រតិបត្តិករដទៃទៀត ត្រូវគិតគូរពីគុណភាពជាចម្បងដើម្បីសុខភាពអ្នកប្រើប្រាស់គ្រប់គ្នា៕