កីឡាជាតិ
ជាតិ
លោក ស សុខា ប្រគល់ថវិកាលើកទឹកចិត្តដល់ម្ចាស់ជ័យលាភិនិងគ្រូបង្វឹក, រូបភាពពីអគ្គនាយកដ្ឋានកីឡា
×![]()
រដ្ឋបានចំណាយថវិកាជាង៣៨៣លានរៀល ដើម្បីលើកទឺកចិត្តកីឡាករគុនដាវ និងការ៉ាតេ ដែលដណ្តើមបានមេដាយប្រាក់៥ និងសំរឹទ្ធ១២ពីការប្រកួតជើងឯកកម្រិតអាស៊ី និងអាស៊ានក្នុងព្រឹត្តិការណ៍៤ផ្សេងៗគ្នា។ ក្នុងនោះមេដាយប្រាក់កម្រិតអាស៊ីទទួលបាន១៣លានរៀល និងសំរឹទ្ធ១១លានរៀល ចំណែកមេដាយប្រាក់កម្រិតអាស៊ានទទួលបាន៨លានរៀល និងសំរឹទ្ធ៧លានរៀល។ គ្រូបង្វឹកទទួលបានថវិកាស្មើកីឡាករដែលដណ្តើមបានមេដាយខ្ពស់ជាងគេ ខណៈគ្រូជំនួយបាន៧០ភាគរយ។
ថវិកាចំនួន២០៨លានរៀល ត្រូវបានចំណាយលើម្ចាស់ជ័យលាភីក្នុងការប្រកួតកីឡាគុនដាវជ្រើសរើសជើងឯកសាកលវិទ្យាល័យអាស៊ីនៅសិង្ហបុរីកាលពីឆ្នាំ២០១៨ បន្ទាប់ពីពួកគេដណ្តើមបានមេដាយប្រាក់២ និងសំរឹទ្ធ៤។ ឯថវិកាចំនួន២២លានរៀលចំណាយលើម្ចាស់ជ័យលាភីមេដាយសំរឹទ្ធ៥ក្នុងការប្រកួតកីឡាការ៉ាតេជ្រើសរើសជើងឯកអាស៊ីនៅម៉ាឡេស៊ីកាលពីខែមេសាឆ្នាំ២០១៩។
ថ្នាកដឹកនាំ គ្រូបង្វឹក និងកីឡាករកីឡាការិនីថតរូបជុំគ្នាក្រោយប្រគល់ប្រាក់រង្វាន់លើកទឹកចិត្ត, រូបភាពពីអគ្គនាយកដ្ឋានកីឡា
ចំណែកថវិកាចំនួន៩៣លានរៀលបានចំណាយលើម្ចាស់ជ័យលាភីក្នុងការប្រកួតកីឡាគុនដាវជ្រើសរើសជើងឯកសាកលវិទ្យាល័យអាស៊ីអាគ្នេយ៍ឆ្នាំ២០១៩ នៅប្រទេសម៉ាឡេស៊ី ក្រោយដណ្តើមបានមេដាយប្រាក់៣ និងសំរឹទ្ធ២ ខណៈថវិកាចំនួន៦០,៩លានរៀលចំណាយលើម្ចាស់ជ័យលាភីមេដាយសំរឹទ្ធ៥ក្នុងការប្រកួតកីឡាការ៉ាតេជ្រើសរើសជើងឯកអាស៊ីអាគ្នេយ៍នៅប្រទេសថៃកាលពីខែមេសាឆ្នាំ២០១៩។
សរុបជារួមរដ្ឋចំណាយថវិកាអស់ចំនួន៣៨៣,៩០០,០០០រៀល។ ថវិកាលើកទឹកចិត្តទាំងនេះ ត្រូវបានលោក ស សុខា រដ្ឋលេខាធិការក្រសួងអប់រំ យុវជន និងកីឡា ប្រគល់ជួនម្ចាស់ជ័យលាភីនៅព្រឹកថ្ងៃទី១០ មករា ឆ្នាំ២០១៩ នាមជ្ឈមណ្ឌលជាតិហ្វឹកហ្វឺនកីឡា៕
Tag:
ស សុខា
ក្រសួងអប់រំយុវជនិងកីឡា
© រក្សាសិទ្ធិដោយ thmeythmey.com
