ជាតិ
បន្ទាយស្រីនឹងមានសហគមន៍ទេសចរណ៍ជិះទូកកម្សាន្តតាមស្ទឹង
× សៀមរាប៖ គោលដៅទេសចរណ៍ថ្មីមួយបន្ថែមទៀត នឹងលេចចេញជារូបរាងនៅភូមិសាស្ដ្រស្រុកបន្ទាយស្រី ។ នោះគឺជាការកម្សាន្ដដោយការជិះទូកតាមដងស្ទឹងបន្ទាយស្រី។ រដ្ឋបាលស្រុកនឹងជំរុញឱ្យសហគមន៍រៀបចំតំបន់ទេសចរណ៍នេះ ដើម្បីនិរន្តរភាពក៏ដូចជាបង្កើតចំណូលជូនសហគមន៍។
អភិបាលស្រុកស្រុកបន្ទាយស្រី លោក ឃឹម ហ្វីណង់ បាននិយាយថា រដ្ឋបាលស្រុកនឹងជួយជំរុញឱ្យសហគមន៍រៀបចំកន្លែងអេកូទេសចរណ៍ធម្មជាតិបន្ថែម ដើម្បីបង្កើតគោលដៅទេសចរណ៍ថ្មីៗក្នុងស្រុកបន្ទាយស្រី។ តាមផែនការស្រុកគឺគ្រោងរៀបចំការកម្សាន្តដោយការជិះទូតតាមបណ្ដោយស្ទឹងបន្ទាយស្រី ដែលកន្លងមកត្រូវបានទុកចោលនិងមិនមានការកែច្នៃ។
ទីតាំងសម្រាប់ការកម្សាន្តនេះ គឺនៅម្ដុំស្ពានផ្លូវជិតប្រាសាទបន្ទាយស្រីតែម្ដង។ តាមការពន្យល់របស់លោក ឃឹម ហ្វីណង់ ទីតាំងនេះមានភាពអំណោយផលតែរដូវប្រាំងប៉ុណ្ណោះ ដ្បិតថារដូវវស្សាទឹកឡើងខ្ពស់។ លោក ឃឹម ហ្វីណង់ រំពឹងថា សេវាកម្មនេះនឹងក្លាយជាគោលដៅទេសចរណ៍ថ្មីបន្ថែមទៀតសម្រាប់ស្រុករបស់លោក។
បន្ថែមពីនេះលោកអភិបាលស្រុកប្រាប់ថា គម្រោងនេះស្រុកមិនចង់ឱ្យមានការវិនិយោគពីវិយឯកជនទេ គឺចង់ឱ្យសហគមន៍អ្នករៀបរាប់ផ្ទាល់ ព្រោះថាមិនអាចយកធនធានសាធារណប្រគល់ឱ្យឯកជនរកស៊ីទេ ប៉ុន្តែសហគមន៍អាចចាប់ដៃគូជាមួយឯកជនដើម្បីវិនិយោគ និងចែកផលប្រយោជន៍មួយផ្នែកធំដល់សហគមន៍។ សម្រាប់ការរៀបចំដំបូងនេះ រដ្ឋបាលស្រុកគ្រោងឱ្យសហគមន៍បឹងឈូកជាអ្នករៀបចំ ដ្បិតសហគមន៍នេះមានធនធាន ការគ្រប់គ្រង និងមិនមានភាពស្មុគស្មាញក្នុងការរៀបចំ។
«យើងចង់ឱ្យជាកន្លែងទេសចរណ៍បែបធម្មជាតិ ហើយបែបផ្សងព្រេងបន្ដិច»។ នេះជាការលើកឡើងរបស់លោក ឃឹម ហ្វីណង់ មុននឹងបន្តថា ទីតាំងខាងលើមានភាពបន់បែនច្រើន ដោយត្រូវចំណាយពេលច្រើនម៉ោងក្នុងការជិះទូកកម្សាន្ត តែយ៉ាងណាលោកថា ក្រោយពេលរៀបចំរួច ភ្ញៀវទេសចរអាចជ្រើសរើសកញ្ចប់ទស្សនានិងពេលវេលាបានតាមតម្រូវការ។ ជាគោលដៅធំសម្រាប់អភិបាលស្រុកថ្មី លោក ឃឹម ហ្វីណង់ ដែលទើបឡើងកាន់តំណែងក្នុងអំឡុងខែ តុលា ឆ្នាំ២០១៩ គឺលោកមានមហិច្ឆតាចង់ឱ្យឃុំទាំង៦ក្នុងស្រុកនេះ មានគោលដៅទេសចរណ៍ធំរបស់ខ្លួន និងចង់ឱ្យភូមិទាំង៣៦របស់ស្រុកនេះ មានកន្លែងទេសចរណ៍មួយសម្រាប់ភូមិ។
ក្រៅពីនេះ លោក ឃឹម ហ្វីណង់ ក៏បង្ហើបពីគោលដៅមួយទៀតដែលស្ថិតនៅឃុំរំចេកផងដែរ។ ទីតាំងនេះ គឺនឹងរៀបចំឱ្យមានជិះទូកកម្សាន្តនារដូវវស្សា ដែលមានភាពអំណោយផលមួយបែបពីទីតាំងខាងលើ ព្រោះទីនេះអាចជិះទូកកម្សាន្តរហូតដល់ភ្នំបូក អមដោយទេសភាពស្រស់ស្អាតនារដូវវស្សា។ ទាក់ទងនឹងវិស័យទេសចរណ៍នេះដែរ លោកអភិបាលបញ្ជាក់ថា រដ្ឋបាលស្រុកកំពុងសិក្សារៀបចំ និងគ្រោងប្រកាសឱ្យសាធារណជនដឹងពីសេវាកម្មទេសចរណ៍នានាដែលមានក្នុងស្រុកបន្ទាយស្រី៕
Tag:
បន្ទាយស្រី
សហគមន៍ទេសចរណ៍
ជិះទូក
ស្ទឹងបន្ទាយស្រី
ឃឹម ហ្វីណង់
© រក្សាសិទ្ធិដោយ thmeythmey.com