អន្តរជាតិ
ហ្វីលីពីនកំពុងព្រួយបារម្ភករណីភ្នំភ្លើង Taal ដែលអាចផ្ទុះ និងបង្កឲ្យមានរលកស៊ូណាមិ
ផ្សែងភ្នំភ្លើងTaal លាយឡំជាមួយផ្លេកបន្ទោរ។Twitter, Michael Sagaran
×![]()
ដោយ: ធៀន ភារិន្ទ
នាថ្ងៃទី១២ ខែមករាផ្សែងដ៏សន្ធោសន្ធៅបានហោះទៅលើអាកាស ពេលខ្លះលាយឡំជាមួយផ្លេកបន្ទោរគួរឲ្យខ្លាច បានកើតចេញពីកូនភ្នំភ្លើងមួយ នៅភាគខាងត្បូងរដ្ឋធានីម៉ានីល។ គ្រោះមហន្តរាយនេះ ត្រូវបានអាជ្ញាធរហ្វីលីពីនប្រកាសអាសន្នថា អាចមានករណីផ្ទុះភ្នំភ្លើង និងរលកស៊ូណាមិ ខណៈពេលប្រជាជនជាច្រើនពាន់នាក់ត្រូវជម្លៀស ជើងហោះហើរត្រូវផ្អាកបណ្តោះអាសន្ន និងការិយាល័យមន្ត្រីរាជការត្រូវឈប់សម្រាកផងដែរ។ 
កូនភ្នំភ្លើង Taal ដែលស្ថិតនៅភាគខាងត្បូង រដ្ឋធានីម៉ានីលចម្ងាយ ៧០គីឡូម៉ែត្រ កំពុងស្ថិតក្នុងភាពប្រកាសអាសន្ន ថានឹងអាចផ្ទុះ និងបង្កទៅជារលកស៊ូណាមិក្នុងពេលឆាប់ៗខាងមុខ។ ផ្សែងយ៉ាងសន្ធោសន្ធៅ បានហោះឡើងទៅលើអាកាសកម្ពស់ ១៥គីឡូម៉ែត្រ និងពេលខ្លះមានលាយឡំជាមួយផ្លេកបន្ទោរ។ ហេតុការណ៍នេះ ត្រូវបានប្រធានវិទ្យាស្ថានសិក្សាភ្នំភ្លើង និងរញ្ជួយដី លោក Renato Solidum ប្រកាសអាសន្នថា លទ្ធភាព ដែលអាចផ្ទុះភ្នំភ្លើងមានរហូតទៅដល់៤លើ៥ឯណោះ។
ដោយបារម្ភពីលទ្ធភាពភ្នំភ្លើងផ្ទុះ អាជ្ញាធរហ្វីលីពីន បានធ្វើការយ៉ាងសស្រាក់សស្រាំ ដើម្បីជម្លៀសប្រជាជន ៨ពាន់នាក់ ដែលរស់នៅក្នុងតំបន់នោះ។ មកទល់ពេលនេះ មនុស្ស ៦ពាន់នាក់ បានស្ថិតនៅក្នុងតំបន់សុវត្ថិភាពហើយ។ ក្រៅពីជម្លៀសប្រជាជន ក្រុមហ៊ុនអាកាសចរហ្វីលីពីន បានលុបចោលជើងហោះហើរចំនួន ១៧២ នាថ្ងៃទី១២ ខែមករា ដោយសារតែផ្សែង ដែលកើតចេញពីកូនភ្នំភ្លើង Taal មានកម្រិតក្រាស់ពេក។
ចំណែករដ្ឋាភិបាលហ្វីលីពីនវិញ បានចេញបទបញ្ជាឲ្យ មន្ត្រីរាជការផ្អាកការធ្វើការបណ្តោះអាសន្ន សាលារៀនត្រូវបិទ និងកន្លែងផ្សេងទៀតត្រូវផ្អាកការងារដូចគ្នា ដើម្បីសុវត្ថិភាពសុខភាពរបស់ប្រជាជនពីផ្សែង ដែលកើតចេញពីភ្នំភ្លើង។
សូមបញ្ជាក់ថា ហ្វីលីពីន គឺជាប្រទេស ដែលស្ថិតនៅលើតំបន់មួយ ដែលត្រូវបានគេឲ្យឈ្មោះថា «Ring of Fire»។ «Ring of Fire» នេះ គឺជាតំបន់ ដែលអាចមានលទ្ធភាពផ្ទុះភ្នំភ្លើងយ៉ាងញឹកញាប់នៅតាមសមុទ្រប៉ាស៊ីហ្វិក។ ក្នុងរយៈពេល ៥សតវត្សរ៍កន្លងមកនេះ ភ្នំភ្លើងTaal គឺមានបន្ទុះភ្នំភ្លើងរហូតដល់ ៣០លើក ហើយការផ្ទុះចុងក្រោយគឺនៅឆ្នាំ ១៩៧៧ ៕
Tag:
ហ្វីលីពីន
© រក្សាសិទ្ធិដោយ thmeythmey.com
