អន្តរជាតិ
UN៖ ការមិនអើពើ មិនអាចជួយទប់ស្កាត់ការកើនឡើងកម្រិតទឹកសមុទ្របានទេ តែអាចនាំឲ្យមានមហន្តរាយ
រូបភាពពីមជ្ឈមណ្ឌលព័ត៌មានអង្គការសហប្រជាជាតិ
×![]()
ប្រធានមហាសន្និតបាតអង្គការសហប្រជាជាតិ លោក Tijani Muhammad-Bande បានសម្តែងអារម្មណ៍ខកចិត្តចំពោះការមិនត្រូវរូវគ្នារបស់មេដឹកនាំពិភពលោក ក្នុងការស្វែងរកដំណោះស្រាយលើបញ្ហាបម្រែបម្រួលអាកាសធាតុ ជាពិសេសការបន្តកើនឡើងនៃកម្ពស់ទឹកសមុទ្រតែម្តង។ លោក Tijani មើលឃើញថាការអសកម្មបែបនេះ មិនអាចដោះស្រាយបញ្ហាបានឡើយ។ 
នៅចំពោះមុខប្រតិភូ និងមន្ត្រីជាន់ខ្ពស់របស់ពិភពលោកប្រមាណជាងមួយពាន់នាក់ លោក Tijani Muhammad-Bande នៅថ្ងៃទី១០ ខែមករា បានព្រមានថា ការមិនអើពើនឹងរុញច្រានឲ្យគ្រប់ជីវិតទាំងអស់ប្រឈមនឹងហានិភ័យ ហើយជាលទ្ធផល វា នឹងបង្កឲ្យមានមហន្តរាយធ្ងន់ធ្ងរ រាប់បញ្ចូលការការសឹករិចរិលផែនដី ការបាត់បង់ជីវៈចម្រុះ ការបំពុលអាស៊ីត កង្វះស្បៀង គ្រោះរាំងស្ងួត និងទឹកជំនន់ជាដើម។
តាមការចុះផ្សាយរបស់មជ្ឈមណ្ឌលព័ត៌មានអង្គការសហប្រជាជាតិ លោក Tijani Muhammad-Bande គូសបញ្ជាក់ថា ទោះបីជាយើងជួបរឿងខកចិត្តចំពោះភាពអសកម្មរបស់់សហគមន៍អន្តរជាតិក្នុងការឈានដល់ការព្រមព្រៀងឯកច្ឆន្ទលើបញ្ហាបម្រែបម្រួលក៏ដោយ យើង នៅតែបន្តទៅមុខ។
សេចក្តីថ្លែងការណ៍របស់ប្រមុខមហាសន្និបាតអង្គការសហប្រជាជាតិរូបនេះ ធ្វើឡើងក្នុងកិច្ចប្រជុំកម្រិតជាន់ខ្ពស់មួយស្តីពីអង្គការអន្តរជាតិដើម្បីថាមពលកើតឡើងវិញ។ កិច្ចប្រជុំនេះ មានគោលដៅរកដំណោះស្រាយលើការគំរាមកំហែងដែលប្រឈមដោយប្រទេសកោះកំពុងអភិវឌ្ឍន៍ ដែលកំពុងរងការគំរាមកំហែងពីការលិចលង់ទៅក្រោមផ្ទៃសមុទ្រ។
តាមរយៈវេទិកាដដែលនោះ លោក បានសង្កត់ធ្ងន់ថា បម្រែបម្រួលអាកាស គឺជាការគំរាមកំហែងសន្តិសុខ និងការអភិវឌ្ឍដ៏ធ្ងន់ធ្ងរសម្រាប់ប្រទេសកោះកំពុងអភិវឌ្ឍន៍។ លោក កត់សម្គាល់ថា ការកើនឡើងនៃកម្រិតទឹកសមុទ្រ កំពុងគំរាមកំហែងយ៉ាងខ្លាំងលើប្រទេសទំនាប និងហេដ្ឋារចនាសម្ព័ន្ធទាំងមូលរបស់ប្រទេសទាំងនោះ ហើយមិនយូរឬឆាប់នោះទេ ប្រទេសទាំងនោះ ក៏អាចត្រូវលិចលង់ក្រោមផ្ទៃសមុទ្រតែម្តង៕
Tag:
បម្រែបម្រួលអាកាសអាកាសធាតុ
UN
© រក្សាសិទ្ធិដោយ thmeythmey.com
