កីឡាជាតិ
ជាតិ
ក្លិបសៀមរាបរៀបចំពានអន្តរជាតិ Super Asia Cup ដើម្បីតេស្តកីឡដ្ឋានត្រៀមរដូវកាល ២០២០
×![]()
ក្លិបបាល់ទាត់ពាក់កណ្តាលអាជីពសៀមរាបយូណាយធីត នឹងរៀបចំពានរង្វាន់អន្តរជាតិ Siem Reap Super Cup ចាប់ពីថ្ងៃទី២៣-២៦ ខែមករា ឆ្នាំ២០២០ នៅកីឡដ្ឋាន SRU ក្នុងខេត្តសៀមរាប ដែលមានក្រុមខ្លាំងៗចំនួន៤ចូលរួម។ គណៈកម្មការរៀបចំរំពឹងថា នឹងមានអ្នកគាំទ្រយ៉ាងច្រើនកុះករមកទស្សនាការប្រកួត ដែលសង្ឃឹមថា មានភាពស្វិតស្វាញនិងទាក់ទាញមួយនេះ។ 
លោក ប៊ួយ ដារី អ្នកចាត់ការទូទៅក្លិបបាល់ទាត់ពាក់កណ្តាលអាជីពសៀមរាបយូណាយធីតបានលើកឡើងពីគោលបំណងនៃការរៀបចំពានរង្វាន់ Siem Reap Super Asian Cup នេះថា គឺដើម្បីតេស្តគុណភាពកីឡដ្ឋាន SRU ដែលទើបសម្ពោធដាក់ឲ្យប្រើប្រាស់កាលពីចុងឆ្នាំ២០១៩។ ការធ្វើតេស្តនេះ ធ្វើឡើងក្រោយក្លិបអង្គរថាយហ្គឺរ និងសូលទីឡូអង្គរ ប្រើប្រាស់កីឡដ្ឋាននេះធ្វើជាទឹកដី ពេលពួកគេធ្វើម្ចាស់ផ្ទះក្នុងការប្រកួតពានរង្វាន់ក្របខណ្ឌមិត្តហ្វូនខេមបូឌានលីគរដូវកាលឆ្នាំ២០២០។
«យើងរៀចំព្រឹត្តិការណ៍នេះឡើង គឺដោយសារតែកីឡដ្ឋានយើងទើបតែចាប់ផ្ដើមធ្វើ ដែលនេះជាឱកាសមួយ ហើយក៏ដោយសារតែកីឡដ្ឋានរបស់យើងនឹងទទួលក្រុមពីរនៅលីគកំពូលកម្ពុជា គឺអង្គរថាយហ្គឺរ និងសូលទីឡូអង្គរ។ ដូច្នេះយើងចង់តេស្ដទីលាន និងការរៀបចំរបស់យើង។ យើងពិតជាមានមោទកភាពមែនទែន ដែលអាចរៀបចំព្រឹត្តិការណ៍អន្តរជាតិនេះឡើង»។ នេះជាការលើកឡើងរបស់លោក ប៊ួយ ដារី ដែលប្តេជ្ញាថា លោកនឹងខិតខំរៀបចំព្រឹត្តិការណ៍នេះឲ្យបានល្អ ដោយរំពឹងមានអ្នកគាំទ្រយ៉ាងច្រើនកុះករមកចូលរួមទស្សនាការប្រកួតអន្តរជាតិលើកដំបូងនេះ។
ក្រុមទាំង៤ដែលត្រូវចូលរួមប្រកួតប្រជែងក្នុងពានរង្វាន់នេះរួមមាមក្រុមអង្គរថាយហ្គឺរ, វិសាខា, Bhayangkara FC របស់ឥណ្ឌូណេស៊ី និងក្រុម Petaling Jaya City FC របស់ម៉ាឡេស៊ី។ ការប្រកួតនឹងប្រព្រឹត្តទៅចាប់ពីថ្ងៃទី២៣-២៦ ខែមករា ឆ្នាំ២០២០ នៅកីឡដ្ឋាន SRU ក្នុងខេត្តសៀមរាប។
បើតាមលទ្ធផលចាប់ឆ្នោតកាលពីថ្ងៃទី១០ ខែមករា ឆ្នាំ២០២០ ក្រុមអង្គរថាយហ្គឺរត្រូវប្រជែងជាមួយក្រុម Petaling Jaya City នៅថ្ងៃទី២៣ ខែមករា ខណៈវិសាខាប៉ះក្រុម Bhayangkara FC នៅថ្ងៃទី២៤ ខែមករា។ ការប្រកួតធ្វើឡើងតែមួយជើងប៉ុណ្ណោះ ពោលគឺក្រុមឈ្នះក្នុងការប្រកួតទាំងពីរនឹងឡើងទៅវគ្គផ្តាច់ព្រ័ត្រដណ្តើមជើងឯកនៅថ្ងៃទី២៦ ខែមករា ក្រោយក្រុមចាញ់ដណ្តើមចំណាត់ថ្នាក់លេខ៣នៅថ្ងៃទី២៥ ខែមករា ឆ្នាំ២០២០។ ក្នុងករណីបញ្ចប់លទ្ធផលស្មើក្នុងការប្រកួត៩០នាទី ក្រុមទាំងអស់ត្រូវទាត់បាល់កាត់សេចក្តី១១ម៉ែត្រតែម្តង គឺពុំមានការបន្ថែម១៥នាទីពីរដងនោះទេ។
សំបុត្រចូលរួមទស្សនាការប្រកួតពានរង្វាន់អន្តរជាតិនេះមានពីរប្រភេទ គឺតម្លៃ៤ពាន់រៀល(កន្លែងគ្មានដំបូង)និង១ម៉ឺនរៀល(មានដំបូង)។ តែទស្សនិកជនចំណាយតែ១,២០០០រៀលប៉ុណ្ណោះសម្រាប់សំបុត្រតម្លៃ៤ពាន់រៀល បើទិញសរុបទាំង៤ប្រកួត និងចំណាយ៣ម៉ឺនរៀលសម្រាប់សំបុត្រតម្លៃ១ម៉ឺនរៀល៕
Tag:
បាល់ទាត់
Siem Reap Super Cup
© រក្សាសិទ្ធិដោយ thmeythmey.com
