វិធីសាស្ត្រដាំប៉េងប៉ោះ ទទួលបានទិន្នផលច្រើន

ពីនេះ ពីនោះ

វិធីសាស្ត្រដាំប៉េងប៉ោះ ទទួលបានទិន្នផលច្រើន

15, Jan 2020 , 8:19 pm

រូបភាព

រូបថតពីហ្វេសប៊ុកលោក ពិសី

ដោយ: ផាត ដាណេ

ភ្នំពេញ៖ ប៉េងប៉ោះ គឺជាដំណាំដែលមានប្រយោជន៍ និងជាដំណាំដែលទទួលបានទិន្នផលច្រើនផងដែរ។ ដើម្បីឲ្យការដាំទទួលបានទិន្នផលល្អ កសិករត្រូវរៀបចំថ្នាល ការព្រួសគ្រាប់ ការរៀបចំដី ការដាំ និងការថែទាំ។

ក្នុងការដាំប៉េងប៉ោះ កសិករត្រូវ រៀបចំថ្នាលដើម្បីព្រួសគ្រាប់ដែលមានទទឹងទំហំ ៧តឹក និងបណ្ដោយ ២២ម៉ែត្រ បន្ទាប់មកកសិករត្រូវប្រមូលដីជាមួយកម្ទេចស្មៅ មកដាក់ក្នុងថ្នាលដែលបានរៀបចំទុកក្នុងបរិមាណ ៧អម្រែក ហើយជ្រុំឲ្យម៉ដ្ឋ និងហាលរយៈពេល ៧ថ្ងៃ។ ក្រោយពីហាលដីរួច កសិករត្រូវយកគ្រាប់ពូជប្រមាណ២ក្រាម មកព្រួសលើថ្នាល និងយកដីដែលលាយជាមួយស្មៅមករោយពីលើឲ្យពេញគ្រាប់ពូជរួចដាក់កម្ទេចចំបើងគ្របពីលើ។

បន្ទាប់ពីដាក់ចំបើងរួចមក កសិករក៏ត្រូវគ្របប្លាស្ទិកពីលើបន្ថែម ប៉ុន្តែត្រូវស្រោចទឹកឲ្យសើមដំណាំជាមុនសិន (គ្របក្នុងរយៈពេល ២ថ្ងៃដំបូងប៉ុណ្ណោះ)។ បន្ទាប់ពីយកប្លាស្ទិកចេញ ដំណាំនឹងមានពន្លក ហើយបើដាំនៅរដូវប្រាំងកសិករត្រូវស្រោចទឹក ២ដងក្នុង១ថ្ងៃ ពេលព្រឹក និងល្ងាច។ បន្ទាប់ពី ២០ថ្ងៃក្រោយមក កសិករត្រូវយកទៅដាក់ក្នុងកន្ទោងផ្សាំរយៈពេល៥ថ្ងៃទើបពេលដាំទទួលបានលទ្ធផលល្អ។

ក្រោយពីការបណ្ដុះរួច កសិករត្រូវភ្ជួរដីឲ្យបានច្រើនដង ដើម្បីឲ្យដីម៉ដ្ឋល្អ និងដាក់ជីកប៉ុស្តពីលើ (ធ្វើដូចពេលព្រួសកូនបណ្ដុះ)។ បន្ទាប់ពីនោះ កសិករក៏ត្រូវធ្វើរង ដើម្បីដាំ និងលើកកម្ពស់រងប្រវែង ២តឹក ត្រូវធ្វើឲ្យចន្លោះគុម្ពមានប្រវែងស្មើគ្នាត្រឹម ៤តឹក និងគម្លាតពីមួយទៅមួយប្រវែង ៦តឹក (ដាំមួយជួរក្នុងមួយរង)។

គិតពីរយៈពេលដាំរហូតបាន ១សប្ដាហ៍កសិករត្រូវថែមជីនៅគល់នៃដើម ដូចជាជីលាមកសត្វ ជីកប៉ុស្ត សម្អាតស្មៅ និងស្រោចទឹកឲ្យសើមជាប្រចាំ។ កសិករត្រូវជម្រះស្មៅចាស់ចេញដើម្បីឲ្យពន្លឺព្រះអាទិត្យចូល ហើយនឹងទទួលបានផ្លែថ្លោសធំល្អ ហើយកសិករក៏ត្រូវដាក់ជីកប៉ុស្ត និងស្រោចទឹក ២-៣ថ្ងៃម្ដង៕

(ដកស្រង់ចេញពីសៀវភៅកសិករជោគជ័យនៃមជ្ឍមណ្ឌលសិក្សា និងអភិវឌ្ឍន៍កសិកម្មកម្ពុជា)