ជាតិ
×![]()
ដោយ: ផាត ដាណេ
ភ្នំពេញ៖ ក្រសួងអប់រំ យុវជន និង កីឡា ប្រកាសជ្រើសរើសគ្រូបង្គោល៨០នាក់ សម្រាប់បណ្ដុះបណ្ដាលគ្រូ ដែលបង្រៀននៅកម្រិតមធ្យមសិក្សាទុតិយភូមិ លើមុខវិជ្ជា៦ គឺ គណិតវិទ្យា រូបវិទ្យា គីមីវិទ្យា ជីវវិទ្យា ផែនដីវិទ្យា និង ព័ត៌មានវិទ្យា។ នេះបើតាមសេចក្តីជូនដំណឹងរបស់ក្រសួងអប់រំ យុវជន និងកីឡា ថ្ងៃទី១៣ ខែមករា។
សម្រាប់លក្ខខណ្ឌក្នុងការជ្រើសរើស គ្រូបង្គោល ត្រូវមានក្របខណ្ឌកម្រិតឧត្តម និងកំពុងបម្រើការងារក្នុងវិទ្យាស្ថានជាតិអប់រំ និងគ្រូឧទ្ទេសថ្នាក់ជាតិ។ គ្រូបង្គោល ត្រូវមានសញ្ញាបត្រចាប់ពីបរិញ្ញាបត្រជាន់ខ្ពស់ឡើងទៅ លើមុខវិជ្ជាដែលជ្រើសរើស និងមានបទពិសោធន៍បង្រៀនយ៉ាងតិច៥ឆ្នាំ។
គ្រូបង្គោល ត្រូវចេះភាសាអង់គ្លេស និងមានជំនាញផ្នែកកុំព្យូទ័រច្បាស់លាស់។ គ្រូបង្គោល ក៏ត្រូវមានវិជ្ជាជីវៈខ្ពស់ ក្នុងការបំពេញការងារ និងមានសីលធម៌ល្អ រួមទាំងគោរពពេលវេលាផងដែរ។
សម្រាប់អ្នកដែលមានចំណាប់អារម្មណ៍ អាចបំពេញពាក្យ និងភ្ជាប់មកជាមួយនូវជីវប្រវត្តិសង្ខេប រូបថត សញ្ញាបត្រជាន់ខ្ពស់ជាច្បាប់ចម្លង និងត្រូវមានវិញ្ញាបនបត្ររដ្ឋបាលបញ្ជាក់ផងដែរ។ ក្រសួង ប្រាប់ឲ្យបេក្ខជន ទៅទទួលពាក្យនៅវិទ្យាស្ថានជាតិអប់រំ ដោយត្រូវផុតកំណត់ការទទួលពាក្យ នៅថ្ងៃទី១៨ ខែមករា ឆ្នាំ២០២០។
ក្នុងការជ្រើសរើស បេក្ខជន ក៏ត្រូវឆ្លងកាត់ការសម្ភាស នៅថ្ងៃទី២០ ខែមករា ហើយលទ្ធផលនឹងចេញក្រោយការសម្ភាសរយៈពេល១សប្ដាហ៍៕
Tag:
គ្រូបង្គោល
© រក្សាសិទ្ធិដោយ thmeythmey.com
