ជាតិ
នយោបាយជាតិ
×![]()
នៅព្រឹកថ្ងៃទី១៦ ខែមករា នេះ សាលាដំបូងរាជធានីភ្នំពេញ បន្តបើកសវនាការលើសំណុំរឿងលោក កឹម សុខា ពីបទ «សន្ទិដ្ឋិភាពជាមួយបរទេស» បន្ទាប់ពីដំណើរការពេញមួយថ្ងៃ កាលពីថ្ងៃពុធ។
លោក កឹម សុខា បានស្នើឲ្យមានការចាក់ផ្សាយចេញទៅខាងក្រៅ ជុំវិញដំណើរការសវនាការ ហើយលោកក៏បានទាមទារឲ្យចាក់ឃ្លីបវីដេអូដែលលោកបាននិយាយទាំងស្រុង។
តុលាការ ចោទប្រកាន់ថា បទល្មើសរបស់លោក កឹម សុខា គឺកើតឡើងតាំងពីឆ្នាំ១៩៩៣មក ដោយពឹងផ្អែកលើវីដេអូឃ្លីបមួយ ដែលលោក ថ្លែងក្នុងពិធីជួបសំណេះសំណាលជាមួយអ្នកគាំទ្រនៅប្រទេសអូស្ត្រាលី កាលពីឆ្នាំ២០១៣។ ក្នុងវីដេអូឃ្លីបនោះ លោក និយាយថា «ចាប់តាំងពីឆ្នាំ១៩៩៣មក» រដ្ឋាភិបាលអាមេរិក តែងហៅទៅលោកជួបម្តងក្នុងមួយឆ្នាំ ដើម្បីជជែកពីដំណើរការប្រជាធិបតេយ្យនៅកម្ពុជា។
ប្រធានអតីតគណបក្សប្រឆាំងរូបនេះ បន្តថា រដ្ឋាភិបាលអាមេរិក ឲ្យលោក យកគំរូតាមប្រទេសយូហ្គោស្លាវី និង ប្រទេសស៊ែប៊ី ក្នុងការផ្លាស់ប្តូរមេដឹកនាំ។ លើសពីនេះ លោក ថែមទាំងអះអាងថា រដ្ឋាភិបាលអាមេរិក បានជួលអ្នកជំនាញនិងសាស្ត្រាចារ្យនៅអាមេរិកនិងនៅកាណាដា ឲ្យជួយផ្តល់យោបល់ជូនលោក ពីយុទ្ធសាស្ត្រនៃការផ្លាស់ប្តូរមេដឹកនាំកម្ពុជា។ លោក បញ្ជាក់ដូច្នេះថា៖«ខ្ញុំ ធ្វើតាមក្បួន មានយុទ្ធសាស្ត្រប៉ុណ្ណឹងហើយ បើមិនជោគជ័យទៀត ខ្ញុំ មិនដឹងថាយ៉ាងម៉េចទេ»។
ក្រោយវីដេអូឃ្លីបនោះ ត្រូវបានបង្ហោះលើបណ្តាញសង្គម សមត្ថកិច្ច ក៏សម្រុកចូលទៅចាប់លោកដល់គេហដ្ឋាន នៅថ្ងៃទី២រំលងអធ្រាត្រ ឈានចូលថ្ងៃទី៣ ខែកញ្ញា ឆ្នាំ២០១៧ ហ់ើយដឹកទៅឃុំនៅពន្ធនាគារត្រពាំងផ្លូងក្នុងខេត្តត្បូងឃ្មុំ ក្រោមបទចោទសន្ទិដ្ឋិភាព ហៅថា បទគប់គិតជាមួយបរទេស ដើម្បីផ្តួលរំលំរដ្ឋាភិបាល៕
Tag:
កឹម សុខា
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
