អន្តរជាតិ
លោក ដូណាល់ ត្រាំ ប្រធានាធិបតីអាមេរិក (AFP)
×![]()
សភាតំណាងអាមេរិក នៅថ្ងៃពុធ ១៥ មករា បានអនុម័តសេចក្តីសម្រេចបញ្ជូនមាត្រានៃបទចោទប្រកាន់ប្រឆាំងលោកប្រធានាធិបតី ដូណាល់ ត្រាំ ទៅកាន់ព្រឹទ្ធសភាដើម្បីបើកសវនាការ។ សេចក្តីសម្រេចនេះ បានអនុម័តដោយសំឡេងគាំទ្រ ២២៨ ទល់នឹង ១៩៣ ។ សវនាការនេះ គ្រោងចាប់ផ្តើមនាដើមសប្តាហ៍ក្រោយ។ 
ប្រធានមតិភាគច្រើនក្នុងព្រឹទ្ធសភាមកពីបក្សសាធារណរដ្ឋ លោក Mitch McConnell បានប្រកាសថា មាត្រាទាំងពីរនេះ នឹងត្រូវអានជាផ្លូវការ នៅរសៀល ថ្ងៃ១៦ ខែមករា ។ ក្រោយមក លោក John Roberts ប្រធានតុលាការកំពូលអាមេរិក នឹងស្បថចូលធ្វើជាប្រធានចៅក្រមក្នុងការជំនុំជម្រះនេះ។ បន្ទាប់មកសមាជិកព្រឹទ្ធសភាទាំង១០០នាក់ នឹងត្រូវស្បថចូលកាន់តំណែងជាសមាជិកគណៈវិនិច្ឆយ ហើយសវនាការនេះ នឹងបើកនាថ្ងៃ២១ មករា សប្តាហ៍ក្រោយ។
អ្នកចាត់ការដែលទើបតែងតាំងចំនួន ៧ នាក់ ថ្មីមកពីបក្សប្រជាធិបតេយ្យ នឹងដើរតួនាទីដូចជារដ្ឋអាជ្ញាសំណុំរឿងនេះប្រឆាំងលោកប្រធានាធិបតី ដូណាល់ ត្រាំ ។ ពួកគេ នឹងដឹកនាំដោយលោក Adam Schiff ប្រធានគណៈកម្មាធិការចារកម្មររបស់សភាតំណាង។ ដោយឡែកមេធាវីសេតវិមានអាមេរិក ២ រូប រួមមាន Pat Cipollone និង Jay Sekulow នឹងចូលទៅដឹកនាំក្រុមការពារក្តីលោកប្រធានាធិបតី។
ខណៈតាមនីតិវិធី ទាមទារសំឡេង ២ ភាគ ៣ ក្នុងព្រឹទ្ធសភាដើម្បីកាត់ទោស និងដកហូតប្រធានាធិបតីពីតំណែង ការលើកលែងទោសរបស់លោក ត្រាំ ត្រូវបានគេរំពឹងនឹងកើតឡើង ព្រោះបក្សសាធារណរដ្ឋមានសំឡេងភាគច្រើន។ ទាក់ទិននឹងការបញ្ជូនមាត្រាចោទប្រកាន់នេះទៅព្រឹទ្ធសភាពីសំណាក់សភា លោក ដូណាល់ ត្រាំ បានហៅដំណើរការនេះថាជា ការរៀបចំឆាកល្ខោនឡើងពីសំណាក់សមាជិកបក្សប្រជាធិបតេយ្យ ដែលលោកអះអាងថា «គ្មានការងារធ្វើ»។
សូមបញ្ជាក់ថា លោក ដូណាល់ ត្រាំ ត្រូវបានបោះឆ្នោតចោទប្រកាន់ជាផ្លូវការ កាលពីថ្ងៃ ១៨ ខែធ្នូ ក្រោមបទចោទពីរ។ ការចោទប្រកាន់ទី១គឺ លោក ត្រាំ បានអនុវត្តអំណាចប្រធានាធិបតីដើម្បីបានផលចំណេញផ្ទាល់ខ្លួន ខណៈមិនខ្វាយខ្វល់ ឬប៉ះពាល់ដល់ប្រយោជន៍ជាតិ ដោយដាក់សម្ពាធលើអ៊ុយក្រែនឲ្យជ្រៀតជ្រែកការបោះឆ្នោតជ្រើសរើសប្រធានាធិបតី ២០២០។ ការចោទប្រកាន់ទី២គឺ នៅពេលត្រូវបានចាប់កំហុសបាន, នៅពេលសភាតំណាងបានបើកការស៊ើបអង្កេត និងស៊ើបសួរក្នុងនីតិវិធីដកតំណែងប្រធានាធិបតីនោះ លោកត្រាំបានព្យាយាមរារាំងដំណើរការរបស់សភានេះ៕
Tag:
សហរដ្ឋអាមេរិក
សភាតំណាង
ព្រឹទ្ធសភា
impeachment
© រក្សាសិទ្ធិដោយ thmeythmey.com
