ជាតិ
សង្គមជាតិ
អាមេរិកផ្តល់៧៥០០០ដុល្លារលើការអភិរក្សសម្លៀកបំពាក់ជនរងគ្រោះនៅទួលស្លែង
×![]()
ភ្នំពេញ៖ សហរដ្ឋអាមេរិកបានផ្តល់ប្រាក់ឥតសំណងចំនួន៧៥,០០០ដុល្លារ ដល់កម្ពុជា សម្រាប់អភិរក្សសម្លៀកបំពាក់ជនរងគ្រោះនៅមន្ទីឃុំឃាំងស២១ ឬជាសារមន្ទីរទួលស្លែង។ ថវិកានេះ ត្រូវបានចុះហត្ថលេខាលើកិច្ចព្រមព្រៀងរវាងលោកW. Patrick Murphy ឯកអគ្គរាជទូតអាមេរិកប្រចាំកម្ពុជា ជាមួយលោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ នៅថ្ងៃទី១៦មករា។
បើតាមសេចក្តីប្រកាសព័ត៌មានរបស់ស្ថានទូតអាមេរិក ជំនួយថវិកាខាងលើនេះ បានស្ថិតនៅក្នុងគម្រោងស្តីពី«ការអភិរក្សវត្ថុជាតិពន្ធ នាសតវត្សទី២០ នៅសារមន្ទីឧក្រិដ្ឋកម្មប្រល័យពូជសាសន៍ទួលស្លែង ដំណាក់កាលទី២នៅភ្នំពេញ» ក្នុងការចូលរួមអភិរក្សបេតិកភណ្ឌកម្ពុជា និងបង្ហាញពីកិច្ចសហប្រតិបត្តិការរវាងអាមេរិក ជាមួយអាជ្ញាធរនានារបស់កម្ពុជា ដើម្បីចងក្រងឯកសារពីអំពើឃោឃៅនៅក្នុងសម័យខ្មែរក្រហម។
គម្រោងនេះ អនុវត្តដោយសារមន្ទីរទួលស្លែង ក្រោមជំនួយបច្ចេកទេសរបស់លោកស្រី Julia Brennan ជនជាតិអាមេរិក ដែលជាអ្នកជំនាញផ្នែកការងារអភិរក្សវាយនភណ្ឌ នៅទីក្រុងវ៉ាស៊ីនតោន។ លោកស្រី Julia នឹងជួយបណ្តុះបណ្តាលដល់បុគ្គលិកសារមន្ទីរ ឱ្យមានលទ្ធភាពដែលអាចបន្តការងារគម្រោងដោយខ្លួនឯងបាន ដោយផ្តោតទៅលើការបណ្តុះបណ្តាល ការអភិរក្ស ការកំណត់ស្ថានភាពវត្ថុសម្រាប់អភិរក្ស ការថែទាំវត្ថុទូទៅ ការរៀបចងក្រងឯកសារកាតាឡុកនិងជ្រើសរើសវត្ថុពីសុមច្ច័យវាយនភណ្ឌជាង៥០០០ ដែលអាចដាក់តាំងបង្ហាញបានរយៈពេលយូរ។
កាលពីឆ្នាំ២០១៧ ក្រសួងវប្បធម៌និងវិចិត្រសិល្បៈ បានទទួលថវិកាចំនួន ៥៥,៥០០ ដុល្លារ សម្រាប់គម្រោងអភិរក្សនាដំណាក់កាលដំបូង។ គម្រោងនេះ ជាសមិទ្ធផលដំបូងដែលបង្ហាញពីការខិតខំប្រឹងប្រែងរបស់ក្រុមការងារក្នុងការចងក្រងឯកសារនិងអភិរក្សសម្លៀកបំពាក់ជនរងគ្រោះមន្ទីរស-២១ ដែលរក្សាទុកនៅសារមន្ទីរអស់រយៈពេលជាច្រើទសវត្សរ៍៕
Tag:
សម្លៀកបំពាក់
ស២១
ទួលស្លែង
© រក្សាសិទ្ធិដោយ thmeythmey.com
