ជាតិ
អច្ឆរិយភាពនៃទន្លេមេគង្គរចនាប្រតិទិនឆ្នាំ២០២០ ជាមួយរូបមច្ឆា ដ៏ទាក់ទាញ
×![]()
ខុសពីប្រតិទិនរបស់អង្គការ ស្ថាប័ន និងក្រុមហ៊ុនដទៃ អង្គការអច្ចរិយនៃទន្លេមេគង្គ(Wonder of the Mekong) បានបោះពុម្ពផ្សាយប្រតិទិនឆ្នាំ២០២០ ដោយមានរចនាជាមួយធនធានធម្មជាតិ ពិសេសធនធានមច្ឆា ដែលធ្វើឲ្យប្រតិទិននេះ កាន់តែមានភាពទាក់ទាញ។ នេះមិនមែនជាលើកទី១នោះទេ ដែលអង្គការមួយនេះ រចនាប្រតិទិនក្នុងទម្រង់បែបនេះ។ 
ក្រៅពីមានលេខរ៉ឺម៉ាំងធំៗច្បាស់ៗ ប្រជាពលរដ្ឋអាចទស្សនាសម្រស់ធម្មជាតិ និងធនធានមច្ឆាជាច្រើនប្រភេទជាមួយប្រតិទិនឆ្នាំ២០២០ ដែលបោះពុម្ភផ្សាយដោយអង្គការអច្ឆរិយនៃទន្លេមេគង្គ។ ត្រីទាំង១៣ប្រភេទនៅក្នុងប្រតិទិននេះ សុទ្ធសឹងជាត្រីងាយរងគ្រោះ កំពុងរងគ្រោះ និងជិតផុតពូជ ដែលរស់នៅតាមបឹងទន្លេសាប ទន្លេមេគង្គ ទន្លេបាសាក់ និងស្ទឹងបឹងនានានៅកម្ពុជា។
ការរចនាជាមួយធនធានធម្មជាតិដ៏ទាក់ទាញនេះ ធ្វើឲ្យប្រតិទិនរបស់អង្គការអច្ឆរិយនៃទន្លេមេគង្គមានភាពទាក់ទាញជាងប្រតិទិននានា និងទទួលបានការគាំទ្រ ចាប់អារម្មណ៍ច្រើនពីប្រជាពលរដ្ឋ។ ក្រៅពីបង្កើនសោភណ្ឌភាព និងបង្កើនភាពទាក់ទាញការរចនាបែបនេះ គឺដើម្បីឲ្យប្រជាពលរដ្ឋកម្ពុជាបានស្គាល់ពីប្រភេទត្រី ដែលងាយរងគ្រោះ កំពុងរងគ្រោះ និងជិតផុតពូលទាំងនោះ។ ក្នុងន័យដើម្បីចូលរួមចំណែកថែរក្សា ការពារ និងអភិរក្សធនធានត្រីទាំងនេះ។
ត្រីទាំង១៣ប្រភេទនោះរួមមានត្រីកន្ត្រប់ខ្លា, ត្រីគ្រំ, ត្រីក្រពត, ត្រីបបែលយក្ស, ត្រីសក់, ត្រីត្រសក់ស, ត្រីកាហែក្រហម, ត្រីបីកំណាត់, ត្រីកញ្ចុះថ្ម, ត្រីកៀកស្រង់, ត្រីក្បក, ត្រីក្របីធំ និងត្រីក្របីតឿ។
ក្រៅពីប្រតិទិន អង្គការធ្វើការពាក់ព័ន្ធជាមួយធនធានធម្មជាតិនេះ បានផលិតបៀរដោយរចនាជាមួយរូបត្រីជាច្រើនប្រភេទ ដែលកំពុងរងគ្រោះ ងាយរងគ្រោះ និងប្រឈបនឹងការផុតពូលទៀតផង៕
Tag:
ប្រតិទិន
អច្ឆរិយនៃទន្លេមេគង្គ
© រក្សាសិទ្ធិដោយ thmeythmey.com
