ជាតិ
សង្គមជាតិ
ឆ្អឹងកូនដំរីដែលងាប់ដោយសារលង់ទឹក នឹងត្រូវយកធ្វើជារូបសំណាក កូនដំរីដែល ស្លាប់ដោយសារ លង់ ទឹក នៅក្នុង តំបន់អូរលាវ ព្រំប្រទល់ខេត្ត រតនគិរី និងខេត្តមណ្ឌលគិរី ។ រូបភាព៖ ក្រសួងបរិស្ថាន។
× ភ្នំពេញ៖ មន្ទីរបរិស្ថានរតនគិរី នឹងយកសាកសពកូនដំរីមួយក្បាលដែលងាប់ដោយសារលង់ទឹក ទៅកប់ ប៉ុន្តែ ប្រមូលឆ្អឹងរបស់វាមករក្សាទុក និងប្រគល់ឲ្យក្រសួងបរិស្ថាន សម្រាប់ធ្វើជារូបសំណាក។ សាកសពកូនដំរីនេះ ត្រូវបានអ្នកភូមិក្នុងតំបន់អូរលាវ ព្រំប្រទល់រវាង ខេត្តរតនគិរី និងខេត្តមណ្ឌលគិរី ប្រទះឃើញអណ្តែតក្នុងទឹក កាលពីថ្ងៃទី១៥ ខែមករា។
លោក ផុន ខេមរិន្ទ ប្រធានមន្ទីរបរិស្ថានខេត្តរតនគិរី បានបញ្ជាក់ប្រាប់អ្នកសារព័ត៌មានថ្មីៗ តាមទូរសព្ទថា សាកសពកូនដំរីនោះត្រូវបានអ្នកជំនាញត្រួតពិនិត្យរួចហើយថាមិនមែនងាប់ដោយជាប់អន្ទាក់របស់ព្រានព្រៃនោះទេ គឺងាប់ដោយសារលង់ទឹក ព្រោះជើងរបស់វាកៀបនឹងថ្មដែលដើរឆ្លងអូរក្នុងតំបន់អូរលាវ ដែលជាព្រំប្រទល់រវាងខេត្តរតនគិរី និងមណ្ឌលគិរី។
លោកបានបញ្ជាក់ថា មន្ទីរបរិស្ថាន បន្តសហការជាមួយមន្ទីរបរិស្ថានខេត្តមណ្ឌលគិរី ដើម្បីថែរក្សាឆ្អឹងកូនដំរីឲ្យបានល្អប្រសើរ សម្រាប់ទុកឲ្យក្រសួងបរិស្ថានចាត់ចែងធ្វើរូបសំណាក។ លោក ផុន ខេមរិន្ទ ប្រាប់ដូច្នេះថា៖«យើងព្យាយាមយកវាមកកប់សិន ប៉ុន្តែមុននឹងកប់ យើងធ្វើការជាមួយនឹងមន្ទីរបរិស្ថានខេត្តមណ្ឌលគិរីសិន ដើម្បីរកទីតាំងសម្រាប់កប់វា ពេលវារលួយសាច់អស់ យើងនឹងប្រមូលឆ្អឹងរបស់វា យកមករក្សាទុក និងប្រគល់ឲ្យក្រសួងបរិស្ថាន»។
បើតាមលោក ផុន ខេមរិន្ធ ប្រធានមន្ទីរបរិស្ថានខេត្តរតនគិរី សត្វដំរីដែលនៅជាប់ព្រំប្រទល់ខេត្តរតនគិរី និងមណ្ឌលគិរី តែងតែដើរឆ្លងកាត់គ្នាទៅវិញទៅមក ដើម្បីស្វែងរកចំណី។
សូមបញ្ជាក់ថា ប្រទេសកម្ពុជាមានសត្វដំរីសរុបចំនួនប្រមាណជាង៣០០ក្បាល ក្នុងនោះដំរីស្រុកមានចំនួន៧២ក្បាល និងដំរីព្រៃ២៥០ក្បាល។ សម្រាប់សមាគមអភិរក្សដំរីអៃរាវត្តា ក្នុងខេត្តរតនគិរី មានសត្វដំរី៤ក្បាល ក្នុងនោះឈ្មោល៣ក្បាល និងញី១ក្បាល៕
© រក្សាសិទ្ធិដោយ thmeythmey.com