អន្តរជាតិ
លោក Chirstopher Tolkien កូនប្រុសអ្នកនិពន្ធរឿង «The Lord of the Rings» ស្លាប់ក្នុងអាយុ៩៥ឆ្នាំ
× លោក Christopher Tolkien កូនប្រុសរបស់លោក J.R.R Tolkien ដែលជាអ្នកនិពន្ធរឿង «The Lord of the Rings» បានទទួលមរណភាពក្នុងអាយុ៩៥ឆ្នាំ។ នេះបើយោងតាមការប្រកាសរបស់សមាគម Tolkien Society កាលពីថ្ងៃទី១៦ ខែមករា ឆ្នាំ២០២០។
លោក Christopher ជាកូនទី៣របស់លោក J.R.R Tolkien កវីនិពន្ធអង់គ្លេសដ៏ល្បីឈ្មោះ ដែលបានទទួលមរណភាពកាលពីឆ្នាំ១៩៧៣ក្នុងអាយុ៨១ឆ្នាំ។ ស្នាដៃជាច្រើនរបស់លោកត្រូវបានត្រួតពិនិត្យ និងរៀបចំបោះពុម្ពផ្សាយក្រោមការដឹកនាំរបស់លោក Christopher ដែលជាបន្ទុកផ្នែកប្រតិបត្តិប្រចាំសមាគម Tolkien Society។
កើតនៅក្រុង Leeds នៅឆ្នាំ១៩២៤ លោក Christopher បានបញ្ចប់ការសិក្សា និងធ្លាប់ធ្វើជាសាស្ត្រាចារ្យនៅសាកលវិទ្យាល័យ Oxford។ លោកមានចំណែកយ៉ាងសំខាន់ក្នុងស្នាដៃរឿងនិទាន «The Lord of the Rings» តាមរយៈការគូសផែនទីលម្អិតក្នុងសាច់រឿង។ រឿងនេះ មានកំណត់ត្រាលក់ដាច់ជាង១៥០លានក្បាល។
ក្រោយឪពុកទទួលមរណភាពនៅឆ្នាំ១៩៧៣ លោក Christopher បន្តការងារលើស្នាដៃផ្សេងៗទៀត ក្នុងនាមជានាយកប្រតិបត្តិផ្នែកអក្សរសីល្បិ៍នៅ Tolkien Estate ដូចជាការបោះពុម្ពផ្សាយរឿង The Simarillion នៅឆ្នាំ១៩៧៧ និងជួយបញ្ចប់រឿង Fall of Gondolin នៅឆ្នាំ២០១៨ ជាដើម។
លោក Christopher មានបងប្រុសឈ្មោះ John Francis Reuel និង Michael Hilary R. ដែលសុទ្ធតែបានទទួលមរណភាព ដោយបច្ចុប្បន្ន មានតែប្អូនស្រីពៅរបស់លោក គឺលោកស្រី Priscialla Anne អាយុ៩១ឆ្នាំ ប៉ុណ្ណោះដែលនៅរស់រៀនមានជីវិត។
លោក Christopher មានចំណងអាពាហ៍ពិពាហ៍ពីរលើក និងមានកូន៣នាក់។ ចុងក្រោយលោករស់នៅជាមួយលោកស្រី Ballie Klass ដែលជាភរិយាទីពីរនៅតំបន់ជនបទមួយក្នុងប្រទេសបារាំង៕
Tag:
The Lord of the Rings
© រក្សាសិទ្ធិដោយ thmeythmey.com