ជាតិ
រោងចក្រកែច្នៃឈើ។ រូបថត៖ លោក នេត្រ ភក្ត្រា រដ្ឋលេខាធិការនៃក្រសួងបរិស្ថាន។
×![]()
ភ្នំពេញ៖ ក្រុមហ៊ុន ស៊ីង បាយអូថេក (ខេមបូឌា) ទទួលបានដី៣,៤ ម៉ឺនហិកតា នៅខេត្តក្រចេះ និងខេត្តស្ទឹងត្រែងពីរដ្ឋាភិបាល សម្រាប់ដាំដើមឈើ៣០លានដើម។ ការដាំដើមឈើនេះ គឺមានលក្ខណៈជាឧស្សាហកម្ម ដែលនឹងចាប់ផ្តើមដាំនៅខែឧសភា ឆ្នាំ២០២០ ដល់២០២២។ ការវិនិយោគនេះ ត្រូវបានក្រសួងបរិស្ថានអះអាងថា ជាការវិនិយោគចម្ការឈើ ដែលជួយកាត់បន្ថយការនាំចូលវត្ថុធាតុដើមកែច្នៃពីបរទេស និងបង្កើតប្រភពឈើប្រើប្រាស់ប្រកបដោយនិរន្តរភាព។ 
លោក លូ ឈូឆាង នាយកក្រុមហ៊ុន ស៊ីង បាយអូថេក លើកឡើងថា ការអភិវឌ្ឍចម្ការឈើ គឺមានគុណតម្លៃក្នុងការផ្គត់ផ្គង់វត្ថុធាតុដើមឈើសម្រាប់ឧស្សាហកម្មកែច្នៃ ខណៈការសាងសង់សំណង់នៅកម្ពុជាកំពុងរីកចម្រើន ជាពិសេសខេត្តព្រះសីហនុ និងរាជធានីភ្នំពេញ។ លោក បានរៀបរាប់ថា ចាប់ពីខែវិច្ឆិកា ឆ្នាំ២០១៩មក ក្រុមហ៊ុន ស៊ីង បាយអូថេក បានចាប់ផ្តើមឈូសឆាយលើផ្ទៃដី៥ពាន់ហិកតា ដោយគ្រោងដាំឈើបានជិត៧លានដើម នៅក្នុងអំឡុងខែឧសភា ឆ្នាំ២០២០។ ដោយឡែក នៅឆ្នាំ២០២១ និង២០២២ ក្រុមហ៊ុននេះ នឹងដាំឈើឱ្យបាន២៥លានដើមទៀត លើផ្ទៃដីផ្សេងទៀតក្នុងខេត្តទាំងពីរខាងលើ។
ក្រុមហ៊ុននេះ បានចុះកិច្ចសន្យា ទិញកូនឈើ១០លានដើមក្នុងមួយឆ្នាំ ពីក្រុមហ៊ុន Angkor Plywood ដើម្បីដាំដុះតាមផែនការអាជីវកម្មរបស់ខ្លួន ព្រោះក្រុមហ៊ុន Angkor Plywood មានវិទ្យាស្ថានបង្កាត់ពូជកូនឈើតាមបច្ចេកទេស។ លោក មើលឃើញថា ចម្ការឈើនេះ នឹងបង្កើតការងារជូនពលរដ្ឋ១០ម៉ឺននាក់ ក្នុងដំណើរការដាំដុះនិងប្រមូលផល ព្រមទាំងការកែច្នៃ ផងដែរ។
លោក បញ្ជាក់ថា៖«ចម្ការឈើដែលដាំនេះនឹងទទួល បានផលក្នុងរយៈពេល៥ឆ្នាំក្រោយការដាំដុះ។ ហើយផលឈើដែលទទួលបាន នឹងត្រូវប្រើប្រាស់ជាវត្ថុធាតុដើមសម្រាប់ការកែច្នៃ បម្រើឱ្យការផលិតកែច្នៃឈើក្នុងប្រទេសដែលកំពុងតែមានតម្រូវការខ្ពស់។ បច្ចុប្បន្នដោយសារតែការផលិតក្នុងស្រុកមិនទាន់គ្រប់គ្រាន់ កម្ពុជាក៏បាននាំចូលឈើកែច្នៃពីបរទេសផងដែរ»។
កន្លែងស្តុកឈើ ដែលកែច្នៃរួច។ រូបថត៖ លោក នេត្រ ភក្ត្រា រដ្ឋលេខាធិការនៃក្រសួងបរិស្ថាន។
លោក នេត្រ ភក្ត្រា អ្នកនាំពាក្យក្រសួងបរិស្ថាន លើកឡើងថា ការវិនិយោគចម្ការឈើនៅកម្ពុជានេះ ពិតជាមានសារៈសំខាន់ណាស់ ព្រោះវានឹងជួយកាត់បន្ថយសម្ពាធមកលើការប្រើប្រាស់ឈើធម្មជាតិ ហើយការបង្កើតឱ្យមានឧស្សាហកម្មកែច្នៃឈើនេះ ក៏នឹងជួយបង្កើតការងារ បង្កើនចំណូលជូនពលរដ្ឋនៅក្នុងតំបន់នោះ និងចូលរួមក្នុងកំណើនសេដ្ឋកិច្ចជាតិ។ លោក បន្តថា ការបង្កើតចម្ការឈើដាំ គឺជាយុទ្ធសាស្ត្រដ៏មានប្រសិទ្ធភាព ដើម្បីទប់ស្កាត់បទល្មើសធនធានធម្មជាតិ និងចូលរួមពង្រឹងការអភិរក្សធនធានធម្មជាតិ ដែលកម្ពុជាមាននាពេលបច្ចុប្បន្ន និងអាចលក់តួនាទីរបស់ព្រៃឈើក្នុងក្របខណ្ឌឥណទានកាបូន។
លោក បន្ថែមថា បច្ចុប្បន្ន កម្ពុជាមានធនធានធម្មជាតិ និងជីវៈចម្រុះដ៏សំបូរបែប។ លោក អះអាងថា ព្រៃឈើគ្របដណ្តប់ប្រមាណ៥០ភាគរយ នៃផ្ទៃប្រទេស ដែលជាអត្រាខ្ពស់បំផុតនៅក្នុងតំបន់អាស៊ីអាគ្នេយ៍។
លោក និយាយថា៖«ការប្រឹងប្រែងក្នុងការគ្រប់គ្រងតំបន់ការពារធម្មជាតិបានល្អប្រសើរ យើងបានលក់ឥណទានកាបូននៅក្នុងដែនជម្រកសត្វព្រៃកែវសីមា ដែនជម្រកសត្វព្រៃព្រៃឡង់ (ក្នុងភូមិសាស្ត្រខេត្តស្ទឹងត្រែង) ដែនជម្រកសត្វព្រៃក្រវ៉ាញខាងត្បូង និងដែនជម្រកសត្វព្រៃតាតៃ ក្នុងក្របខណ្ឌទីផ្សារស្ម័គ្រចិត្ត ដោយទទួលបានថវិកា១១លានដុល្លារ សម្រាប់ទ្រទ្រង់ដល់ការការពារនិងអភិរក្ស ក៏ដូចជាជួយលើកកម្ពស់ជីវភាពរបស់ប្រជាសហគមន៍មូលដ្ឋាន ដែលឆ្លើយតបទៅនឹងគោលការណ៍ហិរញ្ញប្បទាននិរន្តរភាព»៕
រូបថត៖ លោក នេត្រ ភក្ត្រា រដ្ឋលេខាធិការនៃក្រសួងបរិស្ថាន។
Tag:
ឈើ
វិនិយោគ
© រក្សាសិទ្ធិដោយ thmeythmey.com
