ជាតិ
ក្រុងកំពត តាខ្មៅ និងខណ្ឌដូនពេញ ជាប់ជ័យលាភីទីក្រុងទេសចរណ៍ស្អាតអាស៊ាន រូបពីរដ្ឋបាលខេត្តកំពត
× ភ្នំពេញ៖ក្រុងរបស់កម្ពុជាចំនួន៣ រួមមាន ក្រុងកំពត ក្រុងតាខ្មៅ និងខណ្ឌដូនពេញ បានទទួលជ័យលាភីទីក្រុងទេសចរណ៍ស្អាតអាស៊ាន។ រដ្ឋមន្ត្រីទេសចរណ៍អាស៊ាន បានប្រគល់រង្វាន់នេះ នា ក្នុងវេទិកាទេសចរណ៍អាស៊ានឆ្នាំ២០២០ នៅរដ្ឋធានីបានដាស៊េរីបេហ្គាវ៉ាន់ ប្រទេសប្រុយណេ ដែលរៀបចំឡើងកាលពីថ្ងៃទី១៦ មករា ឆ្នាំ២០២០។ នេះបើតាមការផ្សាយលើទំព័រហ្វេសប៊ុកក្រសួងទេសចរណ៍។
កម្មវិធីប្រកួតប្រជែងទេសចរណ៍អាស៊ាននេះ ធ្វើឡើងដើម្បីពង្រឹងភាពទាក់ទាញ និងបង្កើនភាពប្រកួតប្រជែងទីក្រុងទេសចរណ៍អាស៊ាន លើគុណភាពផលិតផល និងសេវាកម្មទេសចរណ៍។ ក្រៅពីនេះ គឺដើម្បីរៀបចំមជ្ឈដ្ឋានរស់នៅរបស់ពលរដ្ឋតាមបណ្តាលទីក្រុង ឲ្យកាន់តែប្រសើរឡើង ព្រមទាំងការអភិវឌ្ឍទីក្រុងប្រកបដោយនិរន្តរភាព។
ទីក្រុងទេសចរណ៍ស្អាតអាស៊ាន ត្រូវបានដឹកនាំរៀបចំដោយក្រសួងទេសចរណ៍កម្ពុជា និងគណៈកម្មាធិការជាតិវាយតម្លៃទីក្រុងស្អាត តាំងពីឆ្នាំ២០១១ ដោយមានការគាំទ្រពីរដ្ឋមន្ត្រីទេសចរណ៍អាស៊ាន។ ស្តង់ដារទីក្រុងទេសចរណ៍ស្អាតអាស៊ាននេះ បានអនុម័ត និងដាក់ឲ្យអនុវត្តជាផ្លូវការ កាលពីវេទិកាទេសចរណ៍អាស៊ានឆ្នាំ២០១៥។ គណៈកម្មាធិការជាតិវាយតម្លៃទីក្រុងស្អាតបាននឹងកំពុងជំរុញចលនាប្រឡងប្រណាំងទីក្រុងស្អាត ទាំងនៅកម្រិតថ្នាក់ជាតិ និងកម្រិតតំបន់អាស៊ាន សំដៅចូលរួមដល់ការជំរុញការកសាងទីក្រុងឆ្លាតវៃ (Smart City) នៅក្នុងតំបន់អាស៊ាន៕
© រក្សាសិទ្ធិដោយ thmeythmey.com