អន្តរជាតិ
×![]()
ដោយ: តន ចាន់រិទ្ធារ៉ា
នាយករដ្ឋមន្ត្រីអង់គ្លេស បូរីស ចនសុន នឹងជួបជាមួយមេដឹកនាំប្រទេសអាហ្វ្រិកចំនួន១៦ នៅថ្ងៃទី២០ ខែមករានេះនាជំនួបវិនិយោគដ៏ធំមួយ ដែលអង់គ្លេសនឹងបញ្ចេញសក្ដានុពលរបស់ខ្លួនដើម្បីទាក់ទាញអាហ្វ្រិក។ អង់គ្លេស ដែលនឹងចាកចេញពីសហភាពអឺរ៉ុបនៅពេលខ្លីខាងមុខ កំពុងស្វះស្វែងរកដៃគូពាណិជ្ជកម្មដើម្បីសាងសង់អនាគតថ្មី បន្ថែមពីលើប្រទេសដៃគូនៅតំបន់អឺរ៉ុប។ 
ជំនួបកំពូលវិនិយោគអង់គ្លេស-អាហ្វ្រិកលើកទីមួយ នឹងធ្វើឡើងនៅថ្ងៃទី២០ ខែមករានៅទីក្រុងឡុងដ៍ ចក្រភពអង់គ្លេស ដោយមានប្រទេសអាហ្វ្រិក២១ចូលរួម។ ជំនួបកំពូលនេះ នឹងក្លាយជាឱកាសសម្រាប់អង់គ្លេសក្នុងការបង្កើតដៃគូពាណិជ្ជកម្មថ្មី នៅពេលចាកចេញពីអឺរ៉ុបអំឡុងពេលពីរសប្ដាហ៍ទៀត។
ប្រធានាធិបតីអេហ្ស៊ីប អាប់ឌែល ហ្វាតា អាល់-ស៊ីស៊ី, ប្រធានាធិបតីកេនយ៉ា អ៊ូហ៊ូរូ កេនយ៉ាតា, ប្រធានាធិបតីនីហ្ស៊េរីយ៉ា មូហាម៉ាឌូ ប៊ូហារី និងមេដឹកនាំហ្កាណា ណាណា អាគូហ្វូ-អាដូ សុទ្ធតែមានវត្តមាននៅជំនួបនៅអង់គ្លេស។ ការិយាល័យនាយករដ្ឋមន្ត្រីអង់គ្លេស Downing Street បញ្ជាក់ថា លោកនាយករដ្ឋមន្ត្រី បូរីស ចនសុន នឹងប្រាប់មេដឹកនាំអាហ្វ្រិក និងបណ្ដាក្រុមហ៊ុនមកពីទ្វីបដ៏ធំមួយនេះពីការប្ដេជ្ញាចិត្តដែលអង់គ្លេសចង់ក្លាយជាដៃគូពាណិជ្ជកម្មរបស់អាហ្វ្រិក។
ក្នុងសេចក្ដីប្រកាសព័ត៌មានដោយឡែក រដ្ឋមន្ត្រីទទួលបន្ទុកអភិវឌ្ឍន៍អន្តរជាតិ Alok Sharma និយាយថា សក្ដានុពលសេដ្ឋកិច្ចរបស់អាហ្វ្រិកធំធេងណាស់ ហើយប្រទេសអាហ្វ្រិកចំនួន៨ស្ថិតក្នុងចំណោមប្រទេស១៥ដែលមានសេដ្ឋកិច្ចលូតលាស់ខ្លាំង ព្រមទាំងមានកំណើនប្រជាជនខ្លាំងផងដែរ។ រដ្ឋមន្ត្រីរូបនេះបន្តថា អង់គ្លេសមានធនធានច្រើនដែលអាចផ្ដល់ឲ្យប្រទេសអាហ្វ្រិក។ នេះបើតាមការផ្សាយរបស់ទីភ្នាក់ងារព័ត៌មាន AFP ។
បើតាមរបាយការណ៍របស់ទីភ្នាក់ងារនាំចេញអង់គ្លេស រដ្ឋាភិបាលក្រុងឡុងដ៍ បានផ្ដល់លុយ២,៦ពាន់លានដុល្លារដើម្បីឧបត្ថម្ភឲ្យក្រុមហ៊ុនអង់គ្លេសសម្រាប់ការនាំចេញទៅអាហ្វ្រិកក្នុងរយៈពេល២ឆ្នាំចុងក្រោយ។ ទីភ្នាក់ងាដដែលនេះ ក៏មានបំណងលូកចូលកាន់ជ្រៅក្នុងការវិនិយោគនៅអាហ្វ្រិកទោះប្រឈមមុខហានិភ័យក៏ព្រោះផលប្រយោជន៍ទទួលបានពីការរកស៊ីនៅអាហ្វ្រិកដែលសម្បូរដោយធនធាន ក៏មានច្រើនដែរ។
អង់គ្លេសដែលត្រូវចាកចេញពីអឺរ៉ុបនៅថ្ងៃទី៣១ ខែមករា បានស្វះស្វែងរកដៃគូពាណិជ្ជកម្មឲ្យបានច្រើន ខណៈរយៈពេលក្រោយចាកចេញប្រៀបដូចជាការចាប់ផ្ដើមជីវិតថ្មីដូច្នោះដែរ។ អង់គ្លេស និងអឺរ៉ុបមានពេលមិនច្រើនដើម្បីចរចាលើកិច្ចព្រមព្រៀងពាណិជ្ជកម្មទ្វេភាគីសំដៅរក្សាស្ថានភាពពាណិជ្ជកម្មកុំឲ្យមានបញ្ហាពេលចាកចេញនេះ៕
Tag:
អាហ្វ្រិក
អង់គ្លេស
អឺរ៉ុប
Brexit
© រក្សាសិទ្ធិដោយ thmeythmey.com
