ជាតិ
នយោបាយជាតិ
លោក កឹម សុខា អះអាងម្ដងទៀតថា ខ្លួនមិនដែលគាំទ្រជនបរទេស និងខ្មែរ ដែលប្រឆាំងកម្ពុជាឡើយ រូបពីហ្វេសប៊ុកលោក មុត ចន្ថា មន្ត្រីជំនិតលោក កឹម សុខា ប្រធានអតីតគណបក្សសង្គ្រោះជាតិ
× ភ្នំពេញ៖ «ចោទខ្ញុំច្រឡំ!»។ នេះជាសំណេររបស់លោក មុត ចន្ថា ដែលបានស្រង់សម្តីលោក កឹម សុខា មេដឹកនាំអតីតគណបក្សសង្គ្រោះជាតិ យកមកសរសេរលើហ្វេសប៊ុកផ្លូវការខ្លួន។ មន្ត្រីជំនិតលោក កឹម សុខា រូបនេះ បានបញ្ជាក់ថា មេដឹកនាំខ្លួន បានបដិសេធរាល់ការចោទប្រកាន់របស់តុលាការកន្លងមក។
មុនមួយថ្ងៃ នៃការបើកសវនាការលើលោក កឹម សុខា នៅថ្ងៃទី២២ មករានោះ លោក កឹម សុខា បានបញ្ជាក់ជំហរជាថ្មី តាមរយៈលោក មុត ចន្ថា ថា លោកមិនដែលគាំទ្រជនបរទេស និងខ្មែរ ដែលប្រឆាំងកម្ពុជាឡើយ។
លោក មុត ចន្ថា បានស្រង់សម្តីលោក កឹម សុខា ដូច្នេះថា៖ «ទាំងពេលកន្លងមក ពេលបច្ចុប្បន្ន និងទៅអនាគត កឹម សុខា មិនត្រូវរ៉ូវ (ឃុបឃិត) និងមិនគាំទ្រអ្នកណាក៏ដោយ កុំថាឡើយបរទេស សូម្បីតែខ្មែរគ្នាឯងក៏ដោយ ដែលមានចេតនា ឬធ្វើអំពើនាំឲ្យប្រទូសរ៉ាយខូចខាតដល់ប្រជាពលរដ្ឋខ្មែរ ឬនាំឲ្យមានការឈ្លានពានប្រឆាំងនឹងព្រះរាជាណាចក្រកម្ពុជា ជាដាច់ខាត»។
កាលពីថ្ងៃទី១៥ មករា សាលាដំបូងរាជធានីភ្នំពេញ បានបើកសវនាការជំនុំជម្រះក្តីលោក កឹម សុខា ប្រធានអតីតគណបក្សសង្គ្រោះជាតិ ដែលជាប់ចោទពីបទ«គប់គិតជាមួយបរទេស» តាំងពីអំឡុងឆ្នាំ២០១៣ ដើម្បីផ្តួលរំលំរដ្ឋាភិបាល តាមពាក្យបណ្ដឹងរបស់មេធាវីរដ្ឋាភិបាល។ សវនការនេះ គ្រោងដំណើរការនីតិវិធីរយៈពេល៣ខែ ទើបអាចបញ្ចប់ ក្រោមហេតុផលវាជារឿងក្តីធំ។
តែយ៉ាងណាលោក កឹម សុខា ដែលកំពុងស្ថិតនៅក្នុងដំណើរការនីតិវិធីបើកសវនារបស់តុលាការនេះ បានច្រានចោលទាំងស្រុងរាល់ការចោទប្រកាន់មកលើខ្លួន និងទាមទារឱ្យទម្លាក់បទចោទទាំងនោះ។ ក្នុងគ្រាដែលតុលាការផ្ដើមសវនាការ កាលពីថ្ងៃទី១៥ មករានោះ ប្រធានអតីតគណបក្សសង្គ្រោះជាតិរូបនេះ បានបង្ហោះសារនៅលើហ្វេសប៊ុកខ្លួន យ៉ាងដូច្នេះថា៖« «ខ្ញុំមិនបាននាំរដ្ឋបរទេស ឬភ្នាក់ងារបរទេសណាមកប្រទូសរ៉ាយ ឬឈ្លានពាន ព្រះរាជាណាចក្រកម្ពុជាឡើយ។ ខ្ញុំមិនបានប្រព្រឹត្តដូចការចោទនេះទេ ជាពិសេសខ្ញុំមិនបានប្រព្រឹត្តនូវអំពើទាំងឡាយណាដែលនាំឲ្យប៉ះពាល់ដល់ផលប្រយោជន៍ប្រទេសជាតិឡើយ»។
លោក កឹម សុខា បានអះអាងទៀតថា សកម្មភាពរបស់លោកកន្លងមក គឺផ្តោតលើសិទ្ធិមនុស្ស និងលទ្ធិប្រជាធិបតេយ្យ ដោយអហិង្សា និងសន្តិវិធីស្របតាមរដ្ឋធម្មនុញ្ញកម្ពុជា ។ ចំណែកសកម្មភាពនយោបាយរបស់លោកវិញ គឺផ្តោតលើការបោះឆ្នោតដោយសេរី ត្រឹមត្រូវ យុត្តិធម៌ ដែលឆ្លុះបញ្ចាំងពីឆន្ទៈរបស់ប្រជាពលរដ្ឋខ្មែរ៕
Tag:
កឹម សុខា
មុត ចន្ថា
នយោបាយ
© រក្សាសិទ្ធិដោយ thmeythmey.com