រដ្ឋាភិបាលថៃ គ្រោងកាត់បន្ថយពន្ធខ្លះដើម្បីជាអំណោយឲ្យក្រុមហ៊ុនក្នុងការបង្កើនការវិនិយោគក្នុងស្រុក

អន្តរជាតិ

រដ្ឋាភិបាលថៃ គ្រោងកាត់បន្ថយពន្ធខ្លះដើម្បីជាអំណោយឲ្យក្រុមហ៊ុនក្នុងការបង្កើនការវិនិយោគក្នុងស្រុក

21, Jan 2020 , 11:59 am

រូបភាព

ដោយ:

រដ្ឋាភិបាលក្រុងបាងកក គ្រោងនឹងបញ្ចេញអំណោយមួយកញ្ចប់ថ្មីសម្រាប់សហគ្រាស ដើម្បីជាផ្នែកមួយក្នុងការលើកកម្ពស់ក្រុមហ៊ុន ឬសហគ្រាស ក្នុងការបង្កើនការវិនិយោគ និងជាពិសេសនោះដើម្បីជាការលើកទឹកចិត្តដល់សហគ្រាសទាំងនោះ បង្កើតថ្មីកាន់តែច្រើន ស្របតាមយុគសម័យបដិវត្តន៍ឧស្សាហកម្ម ៤.០។ ក្រុងបាងកក រំពឹងថា ឆ្នាំ២០២០ នឹងក្លាយជាឆ្នាំពិសេសសម្រាប់អ្នករកស៊ី និងវិនិយោគ។

បើមិនមានការប្រើប្រួលនោះទេ នាពេលខាងមុខដ៏ខ្លីនេះ រដ្ឋាភិបាលថៃ តាមរយៈក្រសួងហិរញ្ញវត្ថុរបស់ខ្លួន នឹងចេញប្រកាសមួយ ស្តីពីការបន្ថយពន្ធលើការវិនិយោគរបស់សហគ្រាស ឬក្រុមហ៊ុន។ ប្រកាសនេះ គ្រោងនឹងត្រូវអនុវត្តពេញមួយឆ្នាំ ២០២០ ។ នេះបើយោងតាមការចុះផ្សាយរបស់សារព័ត៌មានថៃ បាងកកប៉ុស្តិ៍ នៅថ្ងៃទី១៩ ខែមករា។

តាមប្រភពព័ត៌មានដដែល រដ្ឋមន្ត្រីក្រសួងហិរញ្ញវត្ថុថៃ លោក Uttama Savanayana បានកត់សម្គាល់ថា រដ្ឋាភិបាល មិនទាន់សម្រេចចុងក្រោយលើអត្រានៃការកាត់បន្ថយពន្ធនៅឡើយនោះទេ ក៏ប៉ុន្តែ សេនាធិការផ្នែកហិរញ្ញវត្ថុរបស់រដ្ឋាភិបាលថៃរូបនេះ អាចហ៊ានអះអាងថា ផែនការលើកទឹកចិត្តនេះ ច្រើនជាងផែនការមុនៗដែលរដ្ឋាភិបាលធ្លាប់បានផ្តល់ឲ្យ។

លោករដ្ឋមន្ត្រី បានបន្ថែមថា នៅពេលដែលផែនការលើកទឹកចិត្តនេះ ចូលជាធរមាន នោះវា នឹងត្រូវមានសុពលភាពពេញមួយឆ្នាំ ហើយឆ្នាំ២០២០ ក៏នឹងត្រូវក្លាយជាឆ្នាំការលើកកម្ពស់ការវិនិយោគផងដែរ។ សម្រាប់រដ្ឋាភិបាលថៃ នេះ គឺជាបំណងមួយ ដែលថៃចង់លើកទឹកចិត្តដល់សហគ្រិន ក្នុងការបង្កើនផលិតកម្មការងារថ្មី និងបង្កើតបន្ថែមនូវបច្ចេកវិទ្យាទំនើបៗពីបរទេស នៅក្នុងរោងចក្រ និងក្រុមហ៊ុនរបស់ពួកគេ។

ឆ្លៀតឱកាសនេះផងដែរ លោក Uttama Uttama ក៏បានទទូចឲ្យទាំងធនាគាររដ្ឋ និងឯកជនរបស់ថៃ ជួយបង្កើនការវិនិយោគនៅក្នុងប្រទេស តាមរយៈការផ្តល់កម្ចីបន្ថែមសម្រាប់អ្នកវិនិយោគ និងប្រតិបត្តិករធុរកិច្ចផងដែរ៕