ជាតិ
កម្ពុជា-សិង្ហបុរី យកម្ហូប និងគំនូរ រំឭកចំណងការទូត៥៥ឆ្នាំ
× ភ្នំពេញ៖ នៅថ្ងៃទី១៥-២៩ កុម្ភៈខាងមុខ ស្ថានទូតសិង្ហបុរី នឹងរៀបចំកម្មវិធី «សិល្បៈគំនូរលើជញ្ជាំង» (Street Art Fest ++) ដើម្បីអបអរខួបលើកទី៥៥ នៃទំនាក់ទំនងការទូតរវាងកម្ពុជា និងសិង្ហបុរី។ កម្មវិធីនេះ នឹងផ្ដល់ឱកាសឲ្យអ្នកចូលរួមអាចភ្លក្សរសជាតិអាហារ ភេសជ្ជៈ និងមានឱកាសគូរគំនូរជាដើម។ តាមរយៈកម្មវិធីនេះ នឹងប្រមូលថវិកាជួយដល់អង្គការមូលនិធិកុមារកម្ពុជា (CCF) និងអង្គការសិល្បៈខ្មែរអមតៈ។
កម្មវិធី «សិល្បៈគំនូរលើជញ្ជាំង ឬ Street Art Fest ++» នឹងបង្ហាញការរួមបញ្ចូលគ្នារវាងសិល្បៈ និងវប្បធម៌ខ្មែររវាងសិង្ហបុរី។ កម្មវិធីនេះ រៀបចំនៅមជ្ឈមណ្ឌលកម្សាន្ត Worldbridge Arena រយៈពេល ១៤ថ្ងៃ។ Street Art Fest ++ នឹងផ្ដល់ឱកាសដល់អ្នកចូលរួមអាចកម្សាន្តសប្បាយជាមួយនឹងបទភ្លេង អាហារ ផលិតផល សេវាកម្មរបស់ខ្មែរ និងសិង្ហបុរី រួមទាំងការប្រគុំតន្ត្រីដែលចូលរួមដោយសិល្បករទាំងពីរប្រទេស។
ទិដ្ឋភាពនាពិធីប្រកាសផ្សព្វផ្សាយកម្មវិធីStreet Art Fest ++ជាផ្លូវការ
ក្នុងពិធីប្រកាសផ្សព្វផ្សាយកម្មវិធីជាផ្លូវការនៅព្រឹកថ្ងៃទី២១ មករានេះ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានលើកឡើងថា៖ «ដើម្បីអបអរខួបទី៥៥ នៃទំនាក់ទំនងការទូតរវាងកម្ពុជា និងសិង្ហបុរី ក្នុងក្របខណ្ឌ Street Art Fest ++ សហភាពសហព័ន្ធយុវជនកម្ពុជា បានចូលរួមចំណែកដោយផ្អែកលើទំនាក់ទំនងរវាងប្រជាជន និងប្រជាជន»។ លោក ហ៊ុន ម៉ានី បន្តថា Street Art Fest ++ ជាវេទិកាមួយ ដើម្បីឲ្យយុវជនខ្មែរ និងសិង្ហបុរី ចូលរួម និងស្វែងយល់ពីវប្បធម៌ សិល្បៈ និងម្ហូបអាហារជាដើម។
លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា នាពិធីប្រកាសផ្សព្វផ្សាយកម្មវិធីStreet Art Fest ++ជាផ្លូវការ
លោក Michael Tan ឯកអគ្គរដ្ឋទូតសិង្ហបុរីប្រចាំកម្ពុជា បញ្ជាក់ថា៖ «នេះ ជាកម្មវិធីដែលបង្កើនមិត្តភាពរវាងប្រជាជន និងប្រជាជន។ ខ្ញុំសង្ឃឹមថា វាជាឱកាសល្អ។ មិនត្រឹមតែជាចំណងមិត្តភាពរវាងកម្ពុជា និងសិង្ហបុរីទេ ប៉ុន្តែជានិមិត្តសញ្ញានៅពេលដែលប្រទេសទាំងពីរ ប្តេជ្ញាចិត្តសហការជាមួយគ្នា»។ ឯកអគ្គរដ្ឋទូតសិង្ហបុរី បន្ថែមថា កម្មវិធីនេះ នឹងផ្ដល់អត្ថប្រយោជន៍ដ៏ល្អដល់ប្រទេសទាំងពីរ ទាក់ទងនឹងសិល្បៈវប្បធម៌។
លោក Michael Tan ឯកអគ្គរដ្ឋទូតសិង្ហបុរីប្រចាំកម្ពុជា នាពិធីប្រកាសផ្សព្វផ្សាយកម្មវិធីStreet Art Fest ++ជាផ្លូវការ
សូមបញ្ជាក់ថា កម្មវិធី «សិល្បៈគំនូរលើជញ្ជាំង ឬ Street Art Fest ++»នេះ រៀបចំដោយស្ថានទូតសិង្ហបុរី ដោយសហការជាមួយសហភាពសហព័ន្ធយុវជនកម្ពុជា។ នាពិធីប្រកាសផ្សព្វផ្សាយកម្មវិធីជាផ្លូវការ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងលោក Michael Tan ឯកអគ្គរដ្ឋទូតសិង្ហបុរី ប្រចាំកម្ពុជា បានចុះហត្ថលេខាជានិមិត្តរូបក្នុងភាពជាដៃគូសហការដែលមានឈ្មោះថា Community Engagement Partner ដើម្បីជាការប្រកាសចាប់ផ្តើម Street Art Fest ++៕
ទិដ្ឋភាពនាពិធីប្រកាសផ្សព្វផ្សាយកម្មវិធី Street Art Fest ++ជាផ្លូវការ៖
Tag:
សិង្ហបុរី
Street Art Fest
ហ៊ុន ម៉ានី
ស.ស.យ.ក
© រក្សាសិទ្ធិដោយ thmeythmey.com