ពីនេះ ពីនោះ
ព័ត៍មានសុខភាព
×![]()
ដោយ: ថ្មីៗ
ភាគច្រើននៃពួកយើងប្រហែលជាស្គាល់ម្សៅ Baking soda ប៉ុន្តែប្រាកដជាមិនធ្លាប់ដឹងទេថាម្សៅពណ៌សៗនេះមានប្រយោជន៍ចំពោះសុខភាពសម្រស់។ អ្នកអាចរកទិញម្សៅ Baking Soda បានយ៉ាងងាយនៅតាមបណ្ដាផ្សារទំនើបនានា។ 
ថ្ងៃនេះយើង នឹងបង្ហាញឱ្យដឹងពីរបៀបប្រើប្រាស់ម្សៅ Baking Soda ថែរក្សាសម្រស់ ៖
១. កម្ចាត់ស្នាមមុន
អ្វីដែលអ្នកត្រូវធ្វើ គឺគ្រាន់តែលាយម្សៅ Baking soda ២ ស្លាបព្រាបាយជាមួយទឹកធម្មតាបន្តិចរហូតក្លាយជាល្បាយខាប់ៗ។ លាបម៉ាស្សាល្បាយលើតំបន់ស្បែកមុខដែលទទួលរងផលប៉ះពាល់សម្រាប់រយៈពេលពី ២ ទៅ ៣ នាទី ហើយទុកចោលសម្រាប់រយៈពេល ៥ នាទី សឹមលាងសម្អាតចេញជាមួយទឹកធម្មតា។ រូបមន្តនេះក៏ជួយកម្ចាត់ជាតិខ្លាញ់និងកោសិកាស្បែកងាប់ៗចេញផងដែរ។
២. ធ្វើឱ្យធ្មេញសជាងមុន
រូបមន្តនេះមិនត្រឹមតែជួយធ្វើឲ្យធ្មេញសប៉ុណ្ណោះទេ ប៉ុន្តែក៏ជួយកម្ចាត់កំណកកំបោរជាប់ធ្មេញផងដែរ! អ្វីដែលអ្នកត្រូវធ្វើ គឺគ្រាន់តែលាយម្សៅ baking soda ចំនួន ១ ស្លាបព្រាបាយជាមួយអំបិលមួយច្បិចដៃ ហើយដាក់ល្បាយនេះលើច្រាសដុសធ្មេញ រួចចាប់ផ្ដើមដុសសម្អាតធ្មេញរបស់អ្នកជាមួយល្បាយនេះដូចធម្មតាជាការស្រេច។ ទោះជាយ៉ាងណាមិនត្រូវដុសសម្អាតធ្មេញជាមួយម្សៅ baking soda លើសពី ១ ដង ក្នុងមួយសប្តាហ៍ឡើយព្រោះវាអាចបណ្ដាលឱ្យខូចកាចាធ្មេញ។
៣. សម្អាតសក់កម្ចាត់ក្លិនអាក្រក់
អ្វីដែលអ្នកត្រូវធ្វើ គឺលាយម្សៅ Baking soda ចំនួន ១ ស្លាបព្រាកាហ្វេក្នុងទឹកកន្លះពែង រួចកូរឱ្យសព្វ។ កក់សម្អាតសក់ដូចធម្មតាជាមុនសិន សឹមលាងសម្អាតជាចុងក្រោយជាមួយល្បាយ Baking soda ដែលបានលាយទុក។ បន្ទាប់មកលាងសម្អាតសក់ម្ដងទៀតជាមួយទឹកធម្មតាជាការស្រេច។ អនុវត្តម្ដងក្នុងមួយសប្តាហ៍។
៤. កម្ចាត់ក្លិនជើងមិនល្អ
អ្វីដែលអ្នកត្រូវធ្វើ គឺគ្រាន់តែលាយម្សៅ baking soda ចំនួន ១ ស្លាបព្រាបាយ ក្នុងក្ដៅឧណ្ហៗចំនួន ១ លីត្រ។ កូរឱ្យសព្វ សឹមត្រាំជើងក្នុងទឹកល្បាយសម្រាប់រយៈពេលពី ១៥ ទៅ ២០ នាទីជាការស្រេច។ ដើម្បីជាការប្រសើរ ចូររោយម្សៅ baking soda បន្តិចក្នុងស្បែកជើងមុនពេលអ្នកពាក់ចេញក្រៅដោយគ្មានស្រោមជើង។
៥. កម្ចាត់អង្គែ
អ្វីដែលអ្នកត្រូវធ្វើ គឺផ្សើមសក់ជាមុនសិន រួចរោយម្សៅ Baking soda លើសក់ ហើយម៉ាស្សាឱ្យដល់ស្បែកក្បាល។ ទុកចោលសម្រាប់រយៈពេល ១ នាទី សឹមលាងសម្អាតចេញ។ អ្នកក៏អាចកក់សក់ចេញដូចពេលធម្មតាផងដែរដើម្បីលាងជម្រះបានស្អាតសព្វ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com
