កីឡាអន្តរជាតិ
អន្តរជាតិ
LA Galaxy ទិញ Chicharito ទៅជំនួស Ibrahimovic ដោយផ្តល់បៀវត្សថ្លៃជាងគេនៅ MLS
× LA Galaxy ក្រុមកីឡាបាល់ទាត់នៃលីគកំពូលអាមេរិក (Major League Soccer) បានចុះកិច្ចព្រមព្រៀងទិញយកអតីតខ្សែប្រយុទ្ធ Manchester United កីឡាករ Javier Hernandez ឬ Chicharito ពីក្រុម Sevilla ដោយផ្តល់ប្រាក់ឈ្នួលខ្ពស់បំផុតនៅអាមេរិក។ នេះបើតាមការប្រកាសរបស់ក្លិប Sevilla នៅថ្ងៃទី២១ ខែមករា។
ខ្សែប្រយុទ្ធអន្តរជាតិម៉ិកស៊ិក វ័យ៣១ឆ្នាំរូបនេះ នឹងត្រូវជំនួសតំណែង Zlatan Ibrahimovic ដែលចាកចេញទៅចូលរួមជាមួយក្រុមចាស់របស់គេនៅទឹកដីអ៊ីតាលី AC Milan កាលពីដើមខែមករានេះ។
បើតាមការផ្សាយរបស់ LA Time Hernandez នឹងទទួលបានប្រាក់ឈ្នួលខ្ពស់បំផុតនៅ MLS ក្នុងតម្លៃលើសពី ៧លានដុល្លារអាមេរិកក្នុងមួយឆ្នាំ ដែលនេះមានចំនួនច្រើនជាង Ibrahimovic ដែលទទួលបានពី LA Galaxy ទៅទៀត។
ការទៅចួលរួមជាមួយ LA Galaxy នេះ អតីតកីឡាករបិសាចក្រហម និង Real Madrid នៅសល់កិច្ចសន្យាជាមួយ Sevilla ចំនួន៧ខែទៀត ចាប់តាំងពីរូបគេចាកចេញពី West Ham កាលពីខែកញ្ញា ឆ្នាំ២០១៩។
«ខ្ញុំសូមលាក្លិបមួយដែលខ្ញុំបានចំណាយពេលដ៏ខ្លី ប៉ុន្តែគ្រប់គ្រាន់ដើម្បីរក្សាក្តីស្រឡាញ់ ពិសេសគឺដឹងថាវាមានន័យយ៉ាងដូចម្តេចនៅក្នុងពិភពបាល់ទាត់។ នេះជាការលាគ្នាដោយភាពសោកសៅ ដ្បិតខ្ញុំប្រាកដថាប្រសិនបើខ្ញុំមានពេលច្រើនខ្ញុំនឹងមិនចាំបាច់ចាកចេញឆាប់នោះទេ»។ នេះជាសំណេររបស់ Hernandez ដែលរូបគេបង្ហោះលើបណ្តាញសង្គម Twitter ផ្ទាល់របស់គេ។
LA Galaxy តាំងពីរដូវកាល ២០១៦ មកពួកគេបញ្ចប់រដូវកាលដោយទទួលបានត្រឹមចំណាត់ទី៥ប៉ុណ្ណោះ បន្ទាប់ពីលើកពាន MLS លើកចុងក្រោយ និងជាលើកទី៥ ក្នុងឆ្នាំ២០១៤៕
Tag:
LA Galaxy
Javier Hernandez
© រក្សាសិទ្ធិដោយ thmeythmey.com