ជាតិ
នយោបាយជាតិ
លោក កឹម សុខា ថាអយុត្តិធម៌ដែលយកវីដេអូ២នាទីដាក់បន្ទុកខ្លួន តែអយ្យការថា វាមានខ្លឹមសារដូចវីដេអូវែង លោក កឹម សុខា មិនចូលក្នុងបន្ទប់សវនាការនាថ្ងៃទី២២ ខែមករា នេះ។ រូបថត AFP
× នាការដេញដោលសួរក្នុងបន្ទប់សវនាការនៃសាលាដំបូងរាជធានីភ្នំពេញ លោក កឹម សុខា បានលើកឡើងពីភាពអយុត្តិធម៌ដែលតុលាការយកវីដេអូរយៈពេលត្រឹមតែ២នាទី ដើម្បីដាក់បន្ទុកលោកពីបទ «សន្និដ្ឋិភាពជាមួយបរទេស។ អ្នកសារព័ត៌មានថ្មីៗ ស្ថិតក្នុងចំណោមអ្នកសារព័ត៌មានដែលទទួលបានការអនុញ្ញាតឲ្យចូលស្តាប់ផ្ទាល់ក្នុងបន្ទប់សវនាការនាល្ងាចរសៀលថ្ងៃពុធ ទី២២ ខែមករា នេះ។
ដំណើរការរយៈពេលប្រមាណ៣ម៉ោង តំណាងអយ្យការ និងលោក កឹម សុខា បានតឹងសរសៃកដាក់គ្នាយ៉ាងខ្លាំងជុំវិញឃ្លីបវីដេអូ ដែលមេដឹកនាំអតីតគណបក្សសង្គ្រោះជាតិរងការចោទប្រកាន់ពីបទក្បត់ជាតិ។ លោក កឹម សុខា ច្រានចោលការចោទប្រកាន់ ហើយថ្លែងថា វាជារឿងអយុត្តិធម៌ ចំពោះការយកវីដេអូត្រឹម២នាទី ធ្វើជាភស្តុតាងដាក់បន្ទុកលើរូបលោក។
អតីតមេបក្សប្រឆាំងរូបនេះ បានតវ៉ាថា វីដេអូខ្លីនោះ គ្មានន័យគ្រប់គ្រាន់ដូចអ្វីដែលលោកបានថ្លែងនោះឡើយ ព្រោះមានការកាត់តពាក្យសម្តីរបស់លោកទៅភ្ជាប់គ្នា ដែលធ្វើឲ្យខុសពីន័យដើម។
ផ្ទុយទៅវិញ តំណាងអយ្យការ លោក ប្លង់ សុផល បានបញ្ជាក់ថា វីដេអូដែលមានរយៈពេល២នាទី មានពាក្យពេចន៍ និងខ្លឹមសារ មិនខុសពីវីដេអូវែងដែលមានរយៈពេល១ម៉ោង ៣នាទី និង១៩វិនាទី នោះឡើយ។
សវនាការនៅរសៀលនេះ បានបញ្ចប់នាវេលាម៉ោង៥ និង១៥នាទី ដោយទាំងវីដេអូខ្លី និងវីដេអូវែង នឹងត្រូវយកជាភស្តុតាង ដើម្បីដំណើរការសវនាការបន្តទៀត។
ជាមួយគ្នានេះ លោក គី តិច បានលើកឡើងថា វីដេអូវែងដែលលោក កឹម សុខា បានផ្តល់នោះ គឺជាកាដូថ្មីសម្រាប់លោក។ តាមរយៈវីដេអូវែងនោះ មេធាវីរដ្ឋាភិបាលបានអះអាងថា លោកមានភស្តុតាងកាន់តែរឹងមាំ ហើយកាន់តែជឿជាក់លើកសំណុំរឿងមួយនេះ៕
© រក្សាសិទ្ធិដោយ thmeythmey.com