កីឡាអន្តរជាតិ
អន្តរជាតិ
លោក Solskjaer ទទូចម្ចាស់ក្លិបឲ្យបើកដៃដល់ខ្លួនដើម្បីទិញកីឡាករបន្ថែម
×
លោក Ole Gunnar Solskjaer ជឿជាក់ថា Manchester United បានចាប់ផ្តើមដោយភាពច្បាស់ក្នុងការកែលម្អក្រុមឡើងវិញ តាមរយៈការបន្ថែមកីឡាករថ្មីចូលនៅខែមករានេះ បន្ទាប់ពីចាញ់ក្រុម Burnley ដល់ទៅ ២-០ នៅក្នុងផ្ទះខ្លួនឯង។
ក្រុមបិសាចក្រហមបានបង្ហាញទម្រង់លេងក្នុងកម្រិតមួយទាបបំផុតក្នុងជំនួបទល់នឹង Burnley នៃក្របខណ្ឌ Premier League សប្តាហ៍ទី២៤ នៅរាត្រីថ្ងៃទី២២ ខែមករា។ ក្នុងការប្រកួតដែលគ្មានវត្តមានខ្សែប្រយុទ្ធ Marcus Rashford ដោយសារបញ្ហារបួសខ្នង Man Utd បានរបូតដល់ទៅ២គ្រាប់នៅ Old Trafford។ Chris Wood និង Jay Rodriguez ជាអ្នករកគ្រាប់បញ្ចូលទីសម្រាប់ជ័យជម្នះរបស់ Burnley នៅនាទី៣៩ និង៥៦។
ក្រោយបរាជ័យយ៉ាងអាម៉ាសនេះ លោក Solskjaer អ្នកចាត់ការទូទៅ Man United អះអាងថាលោកកំពុងព្យាយាមជួយសង្គ្រោះក្រុមឡើងវិញ បើទោះបីមិនទាន់មានការឆ្លើយតបណាមួយលើការគាំទ្រពីសំណាក់ក្រុមប្រឹក្សាភិបាលរបស់ក្លិបក៏ដោយ។
ការលើកឡើងរបស់អ្នកចាត់ការសញ្ជាតិន័រវែសបែបនេះ ស្របពេលបិសាចក្រហមកំពុងផ្សារភ្ជាប់ទៅនឹងការទិញយកខ្សែបម្រើសញ្ជាតិព័រទុយហ្គាល់ Bruno Fernandes ពីក្រុម Sporting CP នៅអំឡុងពេលទីផ្សារដោះដូរកីឡាករខែកមរានេះ។
«យើងកំពុងស្វែងរកវិធីដើម្បីធ្វើយ៉ាងណាឲ្យក្រុមប្រសើរឡើងវិញ ហើយយើងមានគោលដៅរបស់យើង។ នេះជាការបរាជ័យលើកទី២របស់យើងនៅផ្ទះខ្លួនឯង ហើយយើងពិតជាធ្វើមិនបានល្អទេនៅយប់មិញនេះ។ Solskjaer បានប្រាប់ទូរទស្សន៍ BT Sport បែបនេះ។ លោកបន្ថែមថា៖ «ការផ្ទេរកីឡាករជាអ្វីដែលយើងកំពុងធ្វើនៅពេលនេះ។ យើងត្រូវមានភាពច្បាស់លាស់ដើម្បីនាំយកកីឡាករមកចូលរួមឲ្យត្រូវទីតាំងផងដែរ»។
មុនពេលបរាជ័យនេះ Man Utd បានចាញ់ Liverpool ក្នុងលទ្ធផល ២-០ រួចទៅហើយ។ ម្ចាស់ជើងឯកលីគកំពូលអង់គ្លេស២០សម័យមួយនេះ សព្វថ្ងៃឈរនៅលេខរៀងទី៥ មាន៣៤ពិន្ទុ តាមពីក្រោមក្រុមលេខ៤ Chelsea ចំនួន៦ពិន្ទុ។ Man Utd នៅសល់តែឱកាសដណ្តើមយកចំណាត់ថ្នាក់ Top4 ប៉ុណ្ណោះដើម្បីបានកៅអីលេង Champions League រដូវកាលក្រោយ៕
Tag:
Ole Gunnar Solskjaer
Manchester United
© រក្សាសិទ្ធិដោយ thmeythmey.com