លោក ត្រាំ បង្ហាញទំនុកចិត្តលើលោក ស៊ី ជិនភីង ក្នុងការដោះស្រាយជំងឺរលាកសួតថ្មី

អន្តរជាតិ

លោក ត្រាំ បង្ហាញទំនុកចិត្តលើលោក ស៊ី ជិនភីង ក្នុងការដោះស្រាយជំងឺរលាកសួតថ្មី

23, Jan 2020 , 5:39 pm

រូបភាព

លោក ដូណាល់ ត្រាំ ប្រធានាធិបតីអាមេរិក អំឡុងបទសម្ភាសន៍ជាមួយទូរទស្សន៍អាមេរិក CNBC ពីវេទិកាសេដ្ឋកិច្ចពិភពលោក នៅទីក្រុង Davos ស្វីស កាលពីថ្ងៃ ២២ មករា ឆ្នាំ២០២០ (CNBC)

ដោយ:

ប្រធានាធិបតីអាមេរិក ដូណាល់ ត្រាំ បានបញ្ជាក់កាលពីថ្ងៃ២២ ខែមករាថា លោកជឿទុកចិត្តលើព័ត៌មានដែលចេញពីប្រទេសចិនលើសំណុំរឿងកូរ៉ូណាវីរុស ដែលបានសម្លាប់មនុស្ស ១៧ នាក់ និងឆ្លងទៅកាន់មនុស្សជិត ៦០០នាក់។ ទន្ទឹមនេះ លោក អះអាងថា អាមេរិក គ្រប់គ្រងស្ថានការណ៍ជំងឺបានទាំងស្រុង ទោះបីបានរកឃើញផ្ទុះមួយករណីកាលពីថ្មីៗនេះក៏ដោយក្តី។

អត្ថបទទាក់ទង

ចិន បិទច្រកចេញចូលទាំងអស់នៃក្រុងវូហាន ដែលជាសម្បុកជំងឺរលាកសួតថ្មី

អាជ្ញាធរអាមេរិក កាលពីថ្ងៃអង្គារ ២១ មករា បានបញ្ជាក់ករណីឆ្លងជំងឺរលាកសួតថ្មីទី១ក្នុងទឹកដីអាមេរិក។ តាមការអះអាងរបស់មន្ត្រីសុខាភិបាលអាមេរិក បុរសជនជាតិអាមេរិកម្នាក់ក្នុងវ័យ ៣០ឆ្នាំ ត្រូវបានគេរកឃើញថាមានផ្ទុកវីរុសពូជកូរ៉ូណាវីរុស បន្ទាប់ពីត្រលប់ពីក្រុងវូហាន មកទឹកដីអាមេរិកវិញនៅថ្ងៃទី១៥ ខែមករា។

ទាក់ទិននឹងរឿងនេះ ក្នុងបទសម្ភាសជាមួយទូរទស្សន៍អាមេរិក CNBC អំឡុងពេលចូលរួមវេទិកាសេដ្ឋកិច្ចពិភពលោក ក្នុងទីក្រុង Davos ប្រទេសស្វីស លោក ដូណាល់ ត្រាំ និយាយដូច្នេះថា៖«យើងគ្រប់គ្រងស្ថានការណ៍បានទាំងស្រុង»។ លោកសង្កត់ធ្ងន់ថា៖«វាគឺគ្រាន់តែមនុស្សម្នាក់ប៉ុណ្ណោះ […] យើងគ្រប់គ្រងស្ថានការណ៍បាន។ ដូច្នេះ វានឹងគ្មានអ្វីអាក្រក់កើតឡើងនោះឡើយ»។

ទន្ទឹមនេះ លោកប្រធានាធិបតី បានអះអាងទៀតថា លោកជឿជាក់ថា ប្រធានាធិបតីចិន លោក ស៊ី ជិនភីង និងមន្ត្រីសុខាភិបាលចិន នឹងបន្តជូនព័ត៌មានអំពីបញ្ហាវីរុសនេះដល់អាជ្ញាធរនៅជុំវិញពិភពលោក។ ឆ្លើយនឹងសំណួរថាតើលោកលោកព្រួយបារម្ភពីតម្លាភាពក្នុងប្រទេសចិន ឬយ៉ាងណានោះ លោក ដូណាល់ ត្រាំ និយាយថា ខ្ញុំជឿទុកចិត្តលើលោកស៊ី ហើយខ្ញុំមានទំនាក់ទំនងល្អជាមួយលោកប្រធានាធិបតីស៊ី។

ត្រឹមថ្ងៃពុធ ២២ មករា អាជ្ញាធរចិន បានបញ្ជាក់ករណីវីរុសបង្កជំងឺផ្លូវដង្ហើមថ្មីនេះចំនួន ៥៧១ ករណី និងអ្នកស្លាប់ ១៧នាក់។ តាមរបាយការណ៍កន្លងទៅ វាមាន ៨ករណីផ្សេងទៀត នៅជុំវិញពិភពលោក។ ប្រទេស ថៃ មាន ៤ ករណី ខណៈសហរដ្ឋអាមេរិក តៃវ៉ាន់ កូរ៉េខាងត្បូង និងជប៉ុន មាន១ករណីរៀងៗខ្លួន។

សូមបញ្ជាក់ថា ការផ្ទុះរាលដាល់នៃវីរុសរលាកសួតប្រភេទថ្មី (អម្បូរកូរ៉ូណាវីរុស) បានចាប់ផ្តើមក្នុងទីក្រុង វូហាន ដែលជាមជ្ឈមណ្ឌលដឹកជញ្ជូនដ៏សំខាន់មួយ ក៏ដូចជាមជ្ឈមណ្ឌលពាណិជ្ជកម្ម និងឧស្សាហកម្មដ៏ចម្បងផងដែរ ហើយបច្ចុប្បន្ន វាក៏បានឆ្លងទៅកាន់ទីក្រុងធំៗរបស់ចិនផ្សេងទៀតដូចជា ប៉េកាំង សៀងហៃ និងហុងកុង។

អាជ្ញាធរចិន កំពុងស៊ើបអង្កេតឫសគល់វីរុសនេះ ទោះបីពួកគេបានបញ្ជាក់ថា ការផ្ទុះឡើងបានផ្តើមចេញពីផ្សារមួយកន្លែងក្នុងក្រុងវូហាន ដោយមានដោះដូរសត្វព្រៃ ហើយវាអាចឆ្លងពីមនុស្សទៅមនុស្សតាមរយៈដំណកដង្ហើម។ ប្រជាជនចិនជាច្រើន បានសម្រេចលុបចោលដំណើរកម្សាន្តពួកគេ ទិញម៉ាស់បិទមុខ និងលែងចេញដើរហើរទៅទីសាធារណៈមួយចំនួន ដូចជា កន្លែងមើលកុន និងផ្សារទំនើប ជាដើម៕