ឧត្តរមានជ័យ៖ គណៈកម្មការរៀបចំព្រឹត្តិការណ៍ថ្មើរជើងទៅកាន់តំបន់ប្រវត្តិសាស្ត្រចុងក្រោយនៃរបបខ្មែរក្រហម សម្រេចបន្ថែមប្រភេទកីឡាមហាជន និងបង្កើតកម្មវិធីកម្សាន្តមួយចំនួននៅឆ្នាំនេះ។ ការបន្ថែមសមិទ្ធផលនេះ គឺក្នុងគោលបំណងដើម្បីអភិវឌ្ឍន៍ព្រឹត្តិការណ៍កីឡាទេសចរណ៍មួយនេះឲ្យកាន់តែមានភាពទាក់ទាញ ក៏ដូចជាបង្កើតភាពសប្បាយរីករាយជូនប្រជាពលរដ្ឋនៅស្រុកអន្លង់វែង។ ជាពិសេស ចង់កែប្រែមុខមាត់ស្រុកអន្លង់វែង ដែលទីតាំងបញ្ចប់សង្គ្រាមស៊ីវិលចុងក្រោយនៃរបបខ្មែរក្រហម ឲ្យក្លាយជាទិសដៅទេសចរណ៍ស្រាវជ្រាវប្រវត្តិសាស្ត្រដ៏ទាក់ទាញនៅកម្ពុជា។
ព្រឹត្តិការណ៍ថ្មើរជើងទៅកាន់តំបន់ប្រវត្តិសាស្ត្រចុងក្រោយនៃរបបខ្មែរក្រហមនៅឆ្នាំនេះ នឹងផ្លាស់ប្តូរមុខមាត់ទាំងទំហំនៃការរៀបចំ និងភាពទាក់ទាញ។ ការផ្លាស់ប្តូរមុខមាត់នេះ គឺបន្ទាប់ពីគណៈកម្មការរៀបចំបានសម្រេចបន្ថែមព្រឹត្តិការណ៍កីឡានិងបង្កើតកម្មវិធីកម្សាន្ត ក៏ដូចជាបង្កើនថ្ងៃនៃការរៀបចំជាដើម។ អ្វីដែលគួរឲ្យចាប់អារម្មណ៍រាល់ការរៀបចំព្រឹត្តិការណ៍កីឡា គឺចូលរួមនិងសហការពីស្រុកមួយចំនួននៅប្រទេសថៃ។
នាកិច្ចប្រជុំត្រួតពិនិត្យការងារតៀមរៀបចំព្រឹត្តិការណ៍រត់ប្រណាំងអន្លង់វែង លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានបញ្ជាក់ថា គណៈកម្មការរៀបចំនឹងដាក់កីឡាចំនួន៦ប្រភេទឲ្យចូលរួមប្រកួតនិងសម្តែងនៅឆ្នាំនេះរួមមានរត់ប្រណាំង ជិះកង់ ប្រណាំងទូកខ្នាតតូច ចំបាប់មហាជន ល្បុក្កតោ និងប្រដាល់គុនខ្មែរ ខណៈឆ្នាំមុនមានរត់ប្រណាំង និងដើរថ្មើរជើង។ គណៈកម្មការ ក៏បានបង្កើនពេលវេលារៀបចំផងដែរ ដោយប្រព្រឹត្តទៅចាប់ពីថ្ងៃទី៧-៩ ខែកុម្ភៈ ឆ្នាំ២០២០ ខណៈឆ្នាំមុនមានតែមួយថ្ងៃប៉ុណ្ណោះ។
បើតាមលោក វ៉ាត់ ចំរើន ការបន្ថែមសកម្មភាពកីឡា និងបង្កើនពេលវេលារៀបចំ គឺដើម្បីធ្វើឲ្យព្រឹត្តិការណ៍សមិទ្ធផលទេសចរណ៍មួយនេះមានលក្ខណៈប្លែក និងទាក់ទាញកាន់តែខ្លាំងពីមួយឆ្នាំទៅមួយឆ្នាំ។ ជាពិសេស ដើម្បីពង្រីក និងអភិវឌ្ឍន៍សមិទ្ធផលនេះឲ្យក្លាយចលករដ៏មានប្រសិទ្ធិភាពក្នុងការទាក់ទាញភ្ញៀវទេសចរឲ្យមកកម្សាន្តនៅកម្ពុជា។
ព្រឹត្តិការណ៍ដែលរៀបចំដោយក្រសួងទេសចរណ៍ សហការជាមួយគណៈកម្មាធិការជាតិអូឡាំពិកកម្ពុជានិងរដ្ឋបាលខេត្តឧត្តរមានជ័យមួយនេះ គឺធ្វើឡើងក្នុងគោលបំណង ដើម្បីបង្កើននិងរឹតចំណងសាមគ្គីភាពរវាងកម្ពុជា-ថៃឲ្យកាន់តែល្អប្រសើរ ក៏ដូចជាទាក់ទាញភ្ញៀវទេសចរ និងផ្សព្វផ្សាយពីតំបន់ទេសចរណ៍ប្រវត្តិសាស្ត្រនៅខេត្តឧត្តរមានជ័យ ជាពិសេសស្រុកអន្លង់វែង។ ការបញ្ជ្រាបការយល់ដឹងទាក់ទង់នឹងប្រវត្តិសាស្ត្រនៃការកកើតនិងបញ្ចប់សង្គ្រាមស៊ីវិលនៃរបបខ្មែរក្រហម និងអបអរខួប២០ឆ្នាំនៃការទទួលបានសន្តិភាព ក៏ស្ថិតក្នុងគោលបំណងនៃព្រឹត្តិការណ៍នេះផងដែរ។ នេះបើតាមការបញ្ជាក់របស់លោក វ៉ាត់ ចំរើន។
រដ្ឋលេខាធិការក្រសួងទេសចរណ៍រូបនេះបានបន្ថែមថា គោលបំណងសំខាន់មួយទៀតនោះ គឺក្រសួងទេសចរណ៍ចង់កែប្រែស្រុកអន្លង់វែងដែលជាទីតាំងចុងក្រោយនៃការបញ្ចប់សង្គ្រាមស៊ីវិលនៃរបបខ្មែរក្រហមឲ្យក្លាយជាគោលដៅទេសចរណ៍ស្រាវជ្រាវប្រវត្តិសាស្ត្រដ៏ទាក់ទាញសម្រាប់ភ្ញៀវទេសចរជាតិនិងអន្តរជាតិ។ ជាពិសេស ចង់បង្ហាញមហាជនថា អន្លង់វែងដែលជាស្រុកធ្លាប់រាំរ៉ៃដោយសង្គ្រាមស៊ីវិលមានសន្តិភាពពេញលេញ។ ព្រោះមានអ្នកសារព័ត៌មានអន្តរជាតិ និងអ្នករស់នៅក្រៅប្រទេសមួយចំនួននៅគិតថា ស្រុកអន្លង់វែងស្ថិតក្នុងស្ថានភាពអសន្តិសុខ។ នេះបើតាមការអះអាងរបស់លោក វ៉ាត់ ចំរើន។
អភិបាលរងខេត្តឧត្តរមានជ័យ លោក ឌី រ៉ាដូ មានសុទិដ្ឋិនិយមខ្ពស់ចំពោះព្រឹត្តិការណ៍ថ្មើរជើងទៅកាន់តំបន់ប្រវត្តិសាស្ត្រចុងក្រោយនៃរបបខ្មែរក្រហមក្នុងការចូលរួមអភិវឌ្ឍន៍ និងលើកកម្ពស់សេដ្ឋកិច្ចក្នុងខេត្តឧត្តរមានជ័យ។ លោកអះអាងថា ព្រឹត្តិការណ៍នេះ មិនត្រឹមតែជួយផ្សព្វផ្សាយពីតំបន់ទេសចរណ៍ និងទាក់ទាញភ្ញៀវទេសចរណ៍ប៉ុណ្ណោះទេ ថែមទាំងជួយជំរុញការអភិវឌ្ឍន៍ហេដ្ឋារចនា និងទាក់ទាញវិនិយោគគិនឲ្យមកបោះទុករកស៊ីនៅស្រុកអន្លង់វែងទៀតផង។
លោក ឌី រ៉ាដូ អភិបាលរងខេត្តឧត្តរមានជ័យ, រូបភាពពី Cambodia SEA Games 2023
សម្រាប់ព្រឹត្តិការណ៍រត់ប្រណាំងចម្ងាយ៣គីឡូម៉ែត្រ និង៥គីឡូម៉ែត្រ គណៈកម្មការគ្រោងរៀបចំឲ្យមានអ្នកចូលរួមត្រឹមតែ១៥០០នាក់ប៉ុណ្ណោះ ខណៈភាគីថៃអនុញ្ញាតឲ្យចូលរួមចំនួន៧៥០នាក់។ ការចូលរួមរបស់កីឡាករកីឡាការិនីជាសិស្សានុសិស្សនិងប្រជាពលរដ្ឋជាតិនិងអន្តរជាតិ មិនទាមទារឲ្យបង់ប្រាក់នោះទេ តែត្រូវរ៉ាប់រងលើការចំណាយថ្លៃអាហារ ធ្វើដំណើរ និងស្នាក់នៅ។ ការរត់រៀបចំនៅលើខ្នងភ្នំដែរ ដោយចេញដំណើរពីច្រកអន្តរជាតិជាំឆ្ពោះទៅពើយតាម៉ុក(ផ្ទះកណ្តាលតាម៉ុក)។
ចំណែកកីឡាប្រណាំងកង់ចម្ងាយ១០គីឡូម៉ែត្រគ្រោងធ្វើឡើងក្នុងរង្វន់ចន្លោះពី៧០០ទៅ៨០០នាក់ ដោយបើកឲ្យភាគីថៃចូលរួមជាង៣០០នាក់។ រីឯប្រដាល់គុនខ្មែរមិត្តភាពអន្តរជាតិគ្រោងរៀបចំចំនួន១២គូ ដែលជាការប្រកួតរវាងកីឡាករកម្ពុជា និងកីឡាករថៃ។ ជាមួយគ្នានេះ ការប្រណាំងទូកខ្នាតតូច ក៏មានការចូលរួមពីភាគីថៃផងដែរ។ ដោយឡែក កីឡាចំបាប់ធ្វើឡើងបែបមហាជនដោយបើកសេរីឲ្យមហាជនចូលរួម និងការសម្តែងគុនល្បុក្កតោ។ ក្រៅពីព្រឹត្តិការណ៍កីឡា ក៏មានការប្រគំតន្ត្រី និងការតាំងបង្ហាញស្តង់ពិព័រណ៍ផលិតផលជាតិនិងអន្តរជាតិផងដែរ៕