ជាតិ
សម្ដេច ហ៊ុន សែន នឹងជួបវិស័យឯកជន ដើម្បីដោះស្រាយបញ្ហាចាំបាច់ នៅដើមខែមេសាខាងមុខ
×![]()
ដោយ: ថ្មីៗ
ភ្នំពេញ៖ សម្ដេចនាយករដ្ឋមន្ត្រី ហ៊ុន សែន នឹងជួបវិស័យឯកជន លើកទី១៩ នៅថ្ងៃទី១ មេសា ខាងមុខ។ នេះបើតាមចំណាររបស់សម្ដេច ហ៊ុន សែន ដែលបានចារលើលិខិតលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដែលស្នើសុំរៀបចំវេទិការាជរដ្ឋាភិបាល-ផ្នែកឯកជន លើកទី១៩។
វេទិការាជរដ្ឋាភិបាល-ផ្នែកឯកជននេះ រៀបចំឡើងក្នុងគោលបំណងជជែកដោយបើកចំហ រវាងប្រមុខរដ្ឋាភិបាល ជាមួយថ្នាក់ដឹកនាំក្រសួងស្ថាប័នពាក់ព័ន្ធ និងអ្នកធ្វើអាជីវកម្មនៅកម្ពុជា ដើម្បីដោះស្រាយលើបញ្ហាពាក់ព័ន្ធការវិនិយោគ ការធ្វើពាណិជ្ជកម្ម និងការធ្វើធុរកិច្ចជាដើម។
មិនត្រឹមតែប៉ុណ្ណេះ វេទិកានេះ វាក៏អាចជួយឱ្យរដ្ឋាភិបាលរកធាតុចូល សម្រាប់ការដាក់ចេញនូវកំណែទម្រង់ជាកញ្ចប់ ដើម្បីធានាដល់ការធ្វើពាណិជ្ជកម្មរបស់កម្ពុជា ក៏ដូចជាការប្រកួតប្រជែងទំនិញរបស់កម្ពុជា នៅលើទីផ្សារអន្តរជាតិ ដែលជំរុញខឿនសេដ្ឋកិច្ចកម្ពុជា កាន់តែមានភាពរឹងមាំថែមទៀត។
កាលពីថ្ងៃទី២៩ មីនា ឆ្នាំ២០១៩ ប្រមុខរដ្ឋាភិបាល ក៏បានជួបវិស័យឯកជន និងបានដោះស្រាយបញ្ហាសំខាន់នានា ក្នុងសម្រួលដល់ការរកស៊ីរបស់ពួកគេផងដែរ។ ក្នុងវេទិការាជរដ្ឋាភិបាល-ផ្នែកឯកជន លើកទី១៨ គ្រានោះ សម្ដេច ហ៊ុន សែន បានប្រកាសថា សម្ដេចនឹងអាចជួបវិស័យឯកជន២ដងក្នុងមួយឆ្នាំ ដើម្បីដោះស្រាយបញ្ហាណាដែលចាំបាច់ទៀតផង ៕
Tag:
ហ៊ុន សែន
សេដ្ឋកិច្ច
វិស័យឯកជន
© រក្សាសិទ្ធិដោយ thmeythmey.com
